ULLOQ UNNUARLU NALUNAARUSIAQ
Nuup akiani illuaraq ikuallattoq
Nuummi innuttaasut arlallit sapaatiummat ualikkut Nuup akiani putsumik qernertumik takunnipput. Kissarsuut petruuliatortoq ikuallannermut pissutaasoq politiit oqarput.
Nuup akiani putsumik qernertumik innuttaasut takusaqarsimasut ernumassuteqartut arlallit, Kalaallit Nunaanni Politiinut saaffiginnissimapput.
Sapaammi ualikkut nalunaaqutaq 17.46 politiit kalerrinneqarput, tamatumalu kingorna politiit Nuummilu qatserisartut angallammik alapernaarsuiartortitsisimapput.
- Paasinarsivoq illuaraq ikuallattoq. Illuaraq nungussimavoq. Sumiiffimmi kisimiittoqarpoq, taannalu illuaqqamik piginnittuuvoq, Kalaallit Nunaanni Politiini pigaartut pisortaat Anette Ostenfeldt, Sermitsiap nittartagaatigut aviisimut oqarpoq.
Ajutoorneq
Illuaqqami kissarsuut petruuliatortoq ikuallatsitsisuusoq misissuinerit takutikkaat, pigaartut pisortaat ilisimatitsivoq. Politiit paasissutissaat naapertorlugit piginnittua uusimavoq, namminerli Nuummut apuussinnaasimavoq, pigaartut pisortaat oqarpoq.
- Pisoq pillugu killisiuinerit naammassineqareerput. Ikuallanneq ajutoornikkut pivoq, pigaartut pisortaat oqarpoq.
