KL

DK

Nuup eqqaani pisulluni angalaartarfik nutaaq atoqqaarfissiorneqartoq

Visit Nuup pisulluni angalaarnermik nuannarisalimmik suleqateqarluni Nuup Kapisillillu akornanni pisulluni angalaartarfik nalunaaqutsersimavaa.

Pisulluni angalaarnermik nuannarisalik Valdemar Wilhjelm Geisler suleqatigalugu aqqut nalunaaqutserneqarsimavoq, taannalu oqaluttuarpoq aqqutip ingerlavigiuminaassinnaasup akulikitsumik ersarissumillu nalunaaqutserneqarnissaa immikkut pingaaruteqarsimasoq.
Thomas Munk Veirum
Tusagassiortoq
Saqqummersinneqarpoq

Illoqarfiit pingaarnersaata kommuniani takornariaqarnermut ingerlatsiviup, Visit Nuup, pisulluni angalaarfissaq Nuummit Kapisilinnut nalunaaqutserneqarsimasoq naammasseqqammerpaa.

Aqqut Nuup pisuttuarfigiuminartuunissaanut iluaqutaassaaq:

- Nuummi pisulluni angalaarnissamut takornariarnissaq assut ujartorneqartartoq misigisarparput. Nuup Kapisillillu akornanni aqqut malikkukku Nuup timaa immikkuullarissoq aqqutigissavat, pisullutillu angalaartartorpassuit ujartortagaannik ulikkaarpoq.

- Tikeraartut ilaat pisulluni angalaartartutut misilittagaqarluartuupput, amerlasuulli angalaarnermi nassuiaasartumik ilagisaqarnissartik orniginartinnerusarpaat. Takornariat taakku assigiinngitsut marluk orniginartissinnaasaannik neqeroorutinik ineriartortitsineq suliaraarput, Sara Nissen, Visit Nuummi Destination Manageri, tusagassiuutinut nalunaarummi oqarpoq.

- Kukkulluni ingerlanissaq pinaveersaartinneqarpoq

Visit Nuup pisulluni angalaarnermik nuannarisalik Valdemar Wilhjelm Geisler suleqatigalugu aqqummik pilersaarusiorsimavoq.

Pisulluni angalaartarfittut aqqutip nutaamik nalunaaqusersorneratigut pisullutik angalaartartut isumannaatsumik pitsaanerpaamillu aqquteqarnissaat ilaatigut qulakkeerneqartoq, taanna oqarpoq.

- Aqqutip nutaap nalunaaqutsersorneratigut aqqummi qooqqut amerlaqisut akornanni kukkulluni ingerlanissaq pinaveersaartinneqassaaq, saniatigullu tammartoqarnissaanut taamalu ulorianartorsiortoqarnissaanik pinaveersaartitsisoqassalluni. 

- Aqqutit tikikkuminaappasikkaangata akulikitsumik ersarissumillu nalunaaqutsersuisarnissaq uatsinnut pingaaruteqarluinnarsimavoq, Valdemar Wilhjelm Geisler oqarpoq.

Kapisillit illersorniarlugit angalaarfissarlu inunnut tikikkuminarsarumallugu Kapisilinni kuup qulaani ikaartarfiliortoqarnissaa aamma sulissutigineqartoq, Visit Nuuk ilisimatitsivoq.

Ikaartarfiup 2024-mi ukiakkut imaluunniit 2025-mi upernaakkut naammassinissaa naatsorsuutigineqarpoq.  Tamatuma saniatigut najugaqartunut takornarianullu iluaqutaasussamik Nuup timaani masarsuit oqquisarfiillu aqqaneq-marluk aqqutigalugit ikaartarfiliornissaq sulissutigineqarpoq.

visit nuuk vandreturisme inuiaqatigiit kapisillit nuuk samfund turisme

ATORFIIT Se alle jobs

Powered by Labrador CMS