Nuup ilaani innaallagiaaruttoqaqqittoq
Nuussuup Qinngorpullu ilaa sisamanngornermi ullaakkut innaallagiaarupput.
Assi: Kassaaluk Kristensen
Nutarterneqarpoq: Nuussuarmi innaallagissamik pilersuineq tamakkiisumik ingerlaqqilertoq, sumiiffimmilu nalinginnaasumik ingerlatsisoqaqqilertoq, Nukissiorfiit nalunaarput.
Nuummi innaallagiaaruttoqartoq Nukissiorfiit ullup aappassaa nalunaaruteqarput.
Ajutoortoqarnera pissutaalluni Nuussuarmi Qinngorpumilu sumiiffiit ilaat innaallagiaarussimapput.
Nukissiorfiit ajoqut aaqqinniarlugu suliaqarput.
Nuussuaq pingasunngornermi nalunaaqutaq 07.00-imiit 13.00 missaata tungaanut aamma innaallagiaqanngilaq.
Nuussuarmi pingasunngormat sarfaaruttoqarnera kabelit ajutoornerannik pissuteqartoq Nukissiorfiit Sermitsiamut paasissutissiissutigaat.
Nutartigaq: Qamittoorneq kabelip artukkerneqarneranik pissuteqartoq
Pingasunngormat pisup kingunerisaanik kabeli artukkerneqarmat qamittoortoqartoq Nukissiorfiit Facebookimi quppernerminni allapput:
- Inoqutigiit illui ikittunnguit eqqaassanngikkaanni sumiiffimmut pilersuineq tamangajammi iluarseqqinneqarpoq. Inoqutigiit illui kingulliit sarfamik pilersugarineqaqqilernissaat sulissutigaarput.Pilersuineq tamakkiisumik iluarseqqippat nutaanik ilalersuutinik saqqummiussaqassaagut, Nukissiorfiit allapput.
