Nuup mittarfia qimagutititsisoqareersorlu ammaqqinneqartoq: E-sikaritsi kalerrisaarummik aallartitsisoq

Greenland Airportsimiit itisiliinerit ilanngullugu nutarterneqarpoq

Nuup mittarfiani kalerrisaarut marlunngornerup ullaavani aallartimmat inuit illumiit qimagutitinneqarput.

Greenland Airports Facebookimi quppernermini allappoq.

Kalerrisaarinermut pissutaasoq paasineqareerluni qimagutitinnerlu atorunnaarsinneqartoq, Greenland Airports nalunaaqutaq qulingiluat qaangilaaraa allappoq.

Greenland Airports pisup nalaani eqqissisimasumik torersumillu iliuuseqartoqarneranut qujavoq.

Suna pissutaalluni kalerrisaarutip aallartissimanera paasissutissiissutigineqanngilaq.

Nuup Mittarfiani qaartartumeerinissamik sioorasaarisoqarsimasinnaanera pissutaalluni ukioq manna marloriarluni qimagussortitsisoqarnikuuvoq. Marsip apriilillu qaammataani taama pisoqarpoq.

E-cigarettip pujua ikuallattoqartillugu kalerrisaarummik aallartitsisoq

Greenland Airports e-cigaretti qimarngutitsinermut pissutaasoq Sermitsiamut allakkatigut paasissutissiivoq.

Timmisartoqarfiup iluani e-cigarettimik pujortartoqarmat ikuallattoqarneranik kalerrisaarut aallartippoq, mittarfiullu illutaaniit inuit qimagussortinneqarlutik:

- Erseqqissaatigissavarput mittarfiup iillutaata iluani pujortaqqusaanngimmat imaluunniit pujortarfioqqusaanngitsuni allani, Greenland Airports allappoq nangillunilu:

- Ikuallattoqartillugu kalerrisaarut aallartikkaangat mittarfiup illutaaniit qimagutsitsisoqartarnera suleriaatsimut aalajangersimasumut ilaavoq. Tamanna isumannaallisaanermut tunngassuteqarpoq, kalerrisaarinermi navianartuusinnaasutut isigineqartarpoq.

Angalasut malittarisassanik ataqqinninnissaat neriuutigigaa

Greenland Airports qimagussortitsineq angalasunut aamma timmisartortitseqatigiiffinnut mittarfimmilu sulisunut akornutaasinnaasoq erseqqissaavoq. Sulisunut taamatut pisoqartillugu isumannaatsumik qimagutsitsisoqarnissaanik qulakkeerinnittussanut nukippassuarnik atuiffiusarluni.

- Taamaattumik angalasut tamarmik malittarisassat ataqqissagaat neriuutigaarput, pujortarfiillu aalajangersimasut atortassallugit. Ataatsimoorluta angalaneq pitsaasoq isumannaatsorlu peqataaffigisinnaavarput, timmisartoqarfimmeersut oqarput.