Nuup mittarfia qimagutititsisoqareersorlu ammaqqinneqartoq

Nuup mittarfiani kalerrisaarut marlunngornerup ullaavani aallartimmat inuit illumiit qimagutitinneqarput.

Greenland Airports Facebookimi quppernermini allappoq.

Kalerrisaarinermut pissutaasoq paasineqareerluni qimagutitinnerlu atorunnaarsinneqartoq, Greenland Airports nalunaaqutaq qulingiluat qaangilaaraa allappoq.

Greenland Airports pisup nalaani eqqissisimasumik torersumillu iliuuseqartoqarneranut qujavoq.

Suna pissutaalluni kalerrisaarutip aallartissimanera paasissutissiissutigineqanngilaq.

Nuup Mittarfiani qaartartumeerinissamik sioorasaarisoqarsimasinnaanera pissutaalluni ukioq manna marloriarluni qimagussortitsisoqarnikuuvoq. Marsip apriilillu qaammataani taama pisoqarpoq.