Nuup mittarfissuani ataasiaannarluni isumannaallisaavikkoorsinnaalernissaq kinguartinneqaqqittoq

Timmisartorlutik Nuup mittarfissuaniit angalasut København aqqusaaraangassuk nassatanik aallertarfikkooqqaarlutik ilanngaaserisoqarfikkooqqaarlutillu mittarfissuarmit anisinnaasarput.

Tamanna Nuup mittarfissuata ataasiaannarluni isumannaallisaavikkoorfeqalernissaata, tassa One Stop Securiteqalernissaata (OSS) EU-mit suli akuerineqannginneranik pissuteqarpoq. 

Taamaammat Europa aqqusaarlugu angalasut ataasiaannarnatik suli isumannaallisaavikkoortariaqartarput, tamannalu timmisartumut ilaaffissaminnut allamut ikiartornissamut angumersinngitsooratarsinnaanerulersarnerannik kinguenqarpoq.

Mittarfiit One Stop Securityllit EU-p isumannaallisaanermut piumasaaqaataanik naammassinnissimasuusarput.

Nuup mittarfissua 2024-mi novembarimi ammartinnagu EU-Kommissionimit misissorneqareersimanissaa OSS-eqalernissaatalu akuerineqareersimanissaa aallaaqqaataaniilli pilersaarutaagaluarpoq. Tamannali 2025-mi aasakkut pisussanngolugu kinguartinneqarpoq. 

– Angumerinngitsoorparpulli, Greenland Airportsit pisortaanerat Jens R. Lauridsen Sermitsiamut oqarpoq.

– Unammillernartorpaaluit allat upernaaq ulapputigingaatsiarpagut, pingaarnersiuisariaqarsimallutalu, taanna oqarpoq.

 Siusinnersukkut ilimasaarneqarsimasut

Nuup mittarfiata OSS-eqalernissaata 2025-mi aasakkut akuerineqarnissaa ilimananngitsoq, angallannermut tunngasuni qullersaqarfiup tassa Trafikstyrelsenip Greenland Airportsinut Qaqortumi 2024-mi septembarimi ataatsimiinnermi nalunaarutigisimagaa Sermitsiami siusinnerusukkut allaatigaarput.

AAMMA ATUARUK

Naalakkersuisut Nuuk Mittarfimmut anguniagaq piviusorsiunngitsoq mianersoqqussutigaat

Trafikstyrelsenip tamanna Jens R. Lauridsenimut Narsarsuami tamatuma kingornatigut ataatsimiinnermi erseqqissaassutigeqqissimagaa kingornatigut aamma uppernarsivarput. 

Akuerineqalertornissaa Trafikstyrelsenip ilimanannginnerareeraluaraa, iluatsinnissaa Greenland Airportsip soormitaavamiuna aalajangiusimaannaraa? 

– Ilimasaarneqarneq allanillu periarfissaqarneranik nukingisaarinermi ilisimatinneqarneq allaassuteqarput. Taamaammat iluatsissaqqaartoq upperisimavarput, iluatsissagaluarpallu tamatumunnga piareersimasugut qullersaqarfillu oqaloqatigiissutigaarput, Jens R. Lauridsen oqarpoq. 

Iluatsinnissaanummi piariingajalerpisi? 

– Aap, ukiaru akuerineqarnissarput naatsorsuutigaarput. Iluatsissaqqaarneranut isumalluarpunga, pisortaq oqarpoq.

Isumalluartuarsinnartoq

Nuup mittarfissua misissorneqariaannanngorpat, Trafikstyrelsnip tamanna nalunaarutigisussaassavaa. Taamaalioreerpat, EU-p nakkutilliisuutitaasa takusaallutik misissuiartortussaassapput. Tamatuma pinissaanut utaqqineq ukiup ataatsip missaanik sivisussuseqarsinnaasoq siusinnerusukkut nalunaarutigineqarpoq. Tamannali Greenland Airpotsip nutaamik anguniagaqarnissamut uniinnassutiginngilaa.

– Sumiiffiit ilaanni pilertornerujussuusartoq takusareerparput, Jens R. Lauridsen erseqqissaavoq. 

Maannamut kinguartitsisoqattaareerpoq. Pisortatut isumalluarpallaalaartannginnerpit?

– Isumakuloqqajaavallaartuusimagaluaruma atuuffigisanniissanngikkaluarpunga. Suliavut iluatsissaqqaartut upperaara, suliatsinnullu tunngatillugu angusaqarluarniartuusariaqarlunga. Ukiut tallimat qaangiutsinnagit OSS-eqalerumaartugut aamma oqaannarsimasinnaagaluarpunga, tamanna qularnanngivissumik ilumoorluinnarsimassagaluarpoq. Suliavulli iluatsissinnaaqqullugit nukingisaarisarnissara suliassama aamma ilagaat, Jens R. Lauridsen oqarpoq. 

Nuummi mittarfiit akuerisamik OSS-ilittortaqanngillat. Kangerlussuarmi mittarfik peqarnikuuvoq, Nuummili mittarfeqarfik silaannarmi angallannermi nunatsinni angallaffiunerpaanngornerata kingunerisaanik peqarunnaarluni.

Ilulissani mittarfissuassap ammarneraniit ullormi siullermi aamma OSS-eqlereersimanavianngitsoq, Greenland Airportsit pisortaat oqarpoq. Ilulissani mittarfissualiorneq Nuummi mittarfissualiornerminngarnit allaaneruvoq. Tassa Ilulissani mittarfissuassaq ammarneqartinnagu ingerlanneqalereertinnagulu EU-miit takusaalluni misissuiartortoqarnavianngitoq, Jens R. Lauridsen nassuiaavoq.