Nutartigaq 15:55: Inatsisartut siulittaasuata uppernarsarpaa paasissutissanik isertuussanik ataatsimiititaliap ilaasortaasa ilaannit siammarterisoqarsimanera naammagittaalliuteqartoqarsimasoq. 

- Siulittaasoqarfimmit ilungersunartorujussuartut nalilerparput ajornartorsiutillu aaqqinneqarnissaa siunertaralugu suliamik aallartitsisoqareerpoq, Inatsisartut siulittaasuat Mimi Karlsen nalunaaquttap akunnera ilivitsungajak unillatsiareernerup kingorna oqallinneq ingerlaqqimmat. 

Taassumali erseqqissumik oqaatiginngilaa paasissutissat sorpiaat sumullu aammalu kimit siammarneqrsimanersut.

---

Aalisarnermut piniarnermullu Naalakkersuisoq, Kim Kielsen (S), Naalakkersuisut aalisarnermut inatsisissatut siunnersuutaannut allannguutissatut siunnersuuteqarpoq aalisarnermut ataatsimiititaliap kissaataanik naapertorlugu.

Inuit Ataqatigiit aalisarnermut politikkikkut oqaaseqartartuat, Kristian Jeremiassen partii sinnerlugu aamma oqaaseqaateqarpoq.

Oqaaseqaall naammassiinnariaraa siullersaalluni IA-mut apeqquteqarumalluni nalunaartoq, Karl Tobiassen (S), apeqquteqarani qinnuiginnippoq ataatsimiinneq unitsinneqarallassasoq.

Taanna qinnuteqaateqarnermini tunngavilersuivoq nammineq paasitinneqarsimanini naapertorlugu paasissutissat isertuussat  aalisarnermut, piniarnermut nunalerinermullu ataatsimiititaliap pigisaasa  saqqummiunneqarsimammata, taamaammallu nammineq Inatsisartut siulittaasoqarfianut saaffiginnissuteqarsimanerarpoq tamatumunnga tunngatillugu.

Inatsisartut siulittaasuat Mimi Karlsen (IA) qinnuteqaammut akuersivoq aalajangerlunilu nalunaaquttap akunnera affaq unikkallarnissamik.