Oqalutsinik pisariaqartitsineq pingasoriaatinngortoq

Aaqqissuussineq nutaajunerusoq soraarummeernermi ilitsoqqussaralugu oqaatsit atornissaannik periarfissiisoq Ilisimatusarfimmi ilassilluarneqarpoq.

- Ilinniartut 60-it soraarummeernerminni oqalutseqarput, Ilisimatusarfimmi ilinniarnermut pisortaq Rosa Lorentzen oqaluttuarpoq.

Soraarummeernermi oqalutseqarsinnaaneq intsisitigut qulakkeerneqarpoq tamanna ilinniartut kissaatigippassuk. Taamaalillutik ilinniartut kalaallisut oqaasillit danskisut soraarummeertussat oqalutseqarnissaminnik qinnuteqarsinnaapput, ilitsoqqussaralugu oqaatsisik atorusukkunikkit.

- 2023-mili soraarummeernermi oqalutseqarnissaq periarfissaalermalli ilinniartut 60-it tamanna atoreersimavaat, Rosa Lorentzen oqarpoq.

Siorna oktobarimi ilinniartut soraarummeernerminni oqalutseqartut 20-iupput.

- Ilinniartut soraarummeernerminni oqalutseqarnissaminnik qinnuteqartut amerlassusaat semesterimiit semesterimut nikerarpoq. Soraarummeernerminnili ilitsoqqussaralugu oqaatsimik atorsinnaanerat nuannaarutigisupilussuuaat, Rosa Lorentzen oqarpoq.

Arnarulunnguaq Hoseassen, Ilisimatusarfimmi isumaginninnermi siunnersortinngorniartoq ukiup pingajussaanik ingerlatsisoq maleruagassamik nutaamik atuisut ilagaat.

- Periarfissaq nuannerluinnarpoq, nuannareqaaralu kalaallisut oqalullutalu allassinnaalernerput. Oqilisaataasupilussuuvoq, suut tamarmik ajornannginnerulerlutik, Arnarulunnguaq Hoseassen AG-mut oqarpoq.

Ilinniarnini aallartittussaallugu danskit oqaasii isumaliutigisupilussuuai.

- Allassimavoq ilinniarneq soraarummeernerillu danskisut ingerlanneqassasut, ilinnialersinnangalu piffissaq sivisooq atorlugu isumaliutigaara sapissannginnerlugu, oqarpoq.

Angusarissaarnerusoq

Aallaqqaammut Ilisimatusarfik juunimi 2022-mi taamatut aaqqissuussinissamik misileraaniarluni suliniuteqarpoq.

Ilisimatusarfik allappoq ajornartorsiut tamanna pillugu ilinniartut aperisartut – misileraallunilu Ilisimatusarfik ilinniartunut arfinilinnut toqqakkanut misileraanissamik neqerooruteqarpoq, aasaanerani atuanngiffeqarnissaq 2023-mi aallartinngitsoq isumaginninnermut siunnersortitut soraarummeernissaanni.

Arnarulunnguaq Hoseassen ilinniaqataalu siusinnerusukkut oqalupput qanoq ajornannginnerutigissagaluartoq soraarummeernerminni namminneq oqaatsitik atorsinnaasuugunikkit, taamatut aaqqissuussineq suli atuutilinngitsoq.

- Oqaloqatigiissutigaarput qanoq ajornannginnerutigissagaluartoq nammineq oqaatsivut atorlugit allattuugutta immaqalu angusarissaarnerulluta nammineq oqaatsivut atortuugutsigik, Arnarulunnguaq Hoseassen oqaluttuarpoq.

Soraarummeernermini oqalutseqarpoq, aammali danskisut soraarummeertarluni.

- Maluginiarpara angusakka appasinnerusut danskisut soraarummeeraangama, kalaallisut oqalullunga soraarummeertarninniit, Arnarulunnguaq Hoseassen oqaluttuarpoq.

- Allatsinnanga suut tamaasa niaqunni nutseqqaartariaqanngilakka. Iluaq! Nammineq oqaatsit atorlugit allanneq ajornannginneroqaaq, akunnerpassuarni qarasaasiap saniinnani, oqarpoq nangillunilu:

- Oqaluttariarsornikkullu soraarummeernerit paatsuuinani oqalussinnaalluni ajornaatsumik oqalussinnaalluni, oqarpoq.

Ilisimatusarfimmi ilinniartut amerlanersaat kalaallisut oqaaseqarput, ingammilli oqaluttariarsorluni soraarummeernermi danskit oqaasii atorneqartussaapput soraarummeersitsisoq censoriluunniit peqqutigalugit.

- Ilinniartitsinerit ilaat kalaallisut ingerlanneqartarput ilinniartitsisoq kalaaliummat. Assersuutigalugu soraarummeernerit ilaat danskisut ingerlanneqartarput, naak ilinniartitsisut kalaaliugaluartut, Arnarulunnguaq Hoseassen oqarpoq.

Maannali ilinniartut ilitsoqqussaralugu oqaatsitik atorsinnaavaat naak ilinniartitsisoq allamiuugaluartoq.

- Iluaqutaaqaaq, aamma inuttut, oqarpoq.