Oqaluttaasarnissamut tunngasoq isorineqaqisoq peerneqartoq
Peqqinnissaqarfimmi sulisut oqaluttaasarnissaannut tunngasoq, angusat pillugit allakkiami sulisut kattuffianni PPK-mi ilaasortat maanna taasissutigisaanni, peerneqarpoq.
Assi: Dronning Ingrids Hospital
Isumaqatigiissutaat nutaaq peqqinnissaqarfimmi sulisut atuuttoq kattuffimmut PPK-mut (Peqqinnissaq Pillugu Kattuffiit) ilaasortanit sapaatip akunnerata siuliani sakkortuumik isornartorsiorneqarlunilu akerlilerneqarpoq. Peqqinnissaqarfimmi sulisut suleqatiminnut oqaluttaasarnissaasa isumaqatigiissummi allassimanerata kinguneranit sulisut pisussaaffeqalernissaattut paasineqarsinnaanera pineqarluni.
Naalakkersuisut tassunga aamma akuersaannginnertik nalunaarutigaat, maannalu angusat pillugit allakkiami peerneqarsimalerpoq. Isumaqatigiinniartut PPK Namminersorlutillu Oqartussat kattuffiup ilaasortaanut sapaatit akunnerata siuliani tallimanngornermi ilisimatitsipput.
Pisoq paatsoorneqartoq illuatungeriit nalunaarutigaat ajuusaarutigalugulu. Oqaatsit taakkua pillugit ima paasititsisoqarpoq:
- Peqqissaasut namminneq kissaateqarnertik tunngavigalugu akissarsiaasa assigiinngissutaat aaqqinniarsarineqarsimavoq, taamaalillunilu suleqatiminnut kalaallisut oqaaseqartuunngitsunut oqalutsitut naatsorsuutigineqartarneq atuukkunnaarsinniarneqarluni.
- Tamanna tunngavigalugu angusat pillugit allakkiami ilanngunnearpoq. Maannakkut allatorluinnaq sunniuteqartoq takuarput. Taamaattumik immikkoortoq tamanna angusat pillugit allakkiami peerneqassasoq illuatungeriit isumaqatigiissutigaat, nalunaarummi PPK-mit Namminersorlutillu Oqartussanit atsiorneqartumi allassimavoq.
Isumaqatigiissummi oqaaseqatigiit akerleriissutaasartut imaapput:
"Illuatungeriit isumaqatigiipput, peqqinnissaqarfimmi sulisut tamarmik, oqaatsit assigiinngitsut atorlugit suleqatitik ulluinnarni sulinerminni suliassat ilaattut ikiortassagaat. Tamanna pingaartumik atuuppoq sullissanut passussinermi ingerlanneqarnissaa pillugu paasissutissanik ingerlatitseqqiinermi oqaatsitigut ikiuineq pisariaqartinneqaraangat imaluunniit peqqissaanermik suliallit assigiinngitsut nappaammik suussusersiorneranni atorneqartartussaatillugu, tamannalu oqaatsit assigiinngitsut atorlugit suleqatigiinnermi pissusissamisoorlunilu pisariaqartinneqarpoq. (...)"
