Oquk nukissamillu annaasaqarneq akiorniarlugu inissianut piumasaqaatit nutaat

Tusarniaassutitut siunnersuut inissialiornissami inissialluunniit pioreersut nutarsarneqassatillguit nutaanik arlalinnik piumasaqaateqarfiusoq Naalakkersuisut saqqummiuppaat.

CO2-mik aniatitsineq annikilisarniarlugu isugutaallu kingunerisaanik ajornartorsiutaasinnaasut pinaveersaartinniarlugit sanaartornermi maleruaqqusaq arlalitsigut allanngortinneqassaaq.

Nukissamik sipaarneq

Malittarisassat nutaat malillugit nutaanik sanaartornermi kiassarnermut silaannarissarnermullu piumasaqaatit nutaat aqqutigalugit ilaatigut nukissap atorneqartup 25-niit 30 procentit palillugit appartinnissaa anguniagaavoq. 

Naatsumik oqaatigalugu allannguutit makkuupput:

• Illuliani nutaani kiassarnermut silaannarissarnermullu nukissiamik atuinermut piumasaqaatit sukaterneqarput, taamaalilluni atuinissaq 25-30 pct-inik annikillisinneqarluni.
• Illuni pioreersuni allanngortiterinermi nukissiamik atuinnginnerulernerit piviusunngortinnissaat pillugit piumasaqaatit atuutsinneqalerput.
• Illup sannai aamma illuliornermi atortut isugutaqqusaanngitsut pillugit piumasaqaatit atuutsinneqalerput, iserternermi oqoqalersinnaaneranut aarlerinartorsiortitsisussaammat.
• Pujuliornernut kalerrisaarutinik inissiani, akunnittarfinni ilinniartut inaanni il.il. sarfamik pilersuinermut aalajangersimasumik atassuserlugit, atortulersuisarneq pillugu piumasaqaatit atuutsinneqalerput.
• Illuliani tikikkuminartitsinissaq pillugu piumasaqaatit erseqqissarneqarlutillu titartaganngorlugit takussutissianik tunngavilersorneqarput.
• Sanaartugassamut pilersaarusiornermut tunngavissat, illup sannaannik suliaqarneq misissuisarnerlu, Kalaallit Nunaanni, nunami namminermi eurocodes-inut ilanngussanik ataatsimoortunik atuutsitsilernikkut, nutarterneqarput.
• Siunissami (maannamuugallartoq ukiuni marlunni) illuliat nutaat, sannaasa najummisuini ajutoornermi annertuumik sunniuteqarsinnaanera aarlerinaate-qartut, siunnersortinit akuersissummik allagartaqartunit sanaartugassartai pilersaarusiorneqassasut misissorneqartassasullu, atuutsinneqalerpoq (taamaaliornermi kommunit illuliani pisariusuni illut sannaanik misissuinermik suliaqartarunnaassallutik).

Aningaasartuutit qaffattut

Malittarisassat nutaat naapertorlugit inissialiornermi aningaasartuutit qaffassapput, sanaartukkalli attartussusaa isigissagaanni suliniutit aningaasartuutaassanngitsutut ilimagineqartut ilisimatitsissutigineqarpoq.

- Nutaanik inissialiornermi nukissamik atuinermut piumasaqaatinik sukaterinertut siunnersuut naapertorlugu sanaartorneq akisunerulissaaq. Akitsornerali nukissamik atuinermi sipaaruteqarnermit taarserneqassasoq naatsorsuutigineqassaaq. Nukissamik atuinermi sipaarutit ataatsimut isigalugu silap pissusianut pitsaasumik sunniuteqarnissaata saniatigut pisortat nukissamik pilersuinerisa annertusarnissaannik pisariaqartitsineq annikillissammat inuiaqatigiit aningaasaqarnerannut iluaqutaassaaq.

Ilanngunneqanngitsoq

Illuutini pioreersuni piumasaqaatit nukissamik sipaarutaasussat “nukissamik atuinermi sipaarut aningaasaliinermut sanilliullugu imminut akilersinnaappat aatsaat suliarineqassasoq” naqissuserneqarpoq.

- Tamanna isumaqarpoq illuutit piumasaqaatit malillugit allanngortiterneqartussanngorpata allanngortiterinermut aningaasartuuteqartariaqartoq, nukissamilli atuinermi sipaasuteqartoqassammat aningaasaliineq imminut akilerumaartoq ilisimatitsissutigineqarpoq.

- Aammattaaq isugutak pillug piumasaqaatit sukateriffigineqarnera sanaartornermi aningaasartuutit qaffannerinik kinguneqassasoq ilimagineqassaaq. Sanaartukkat attartunerunissaa anguneqartussaassaat, siunissamilu aningaasartuutigisimasat imminut taamaalillutik akilertussaassapput.

Nuukkiartuaartoqassasoq

Sanaartornermi maleruaqqusami allannguutit ukiup affaa siulleq nuukkiartuaarfissaqartumik ukiortaami atuutsinneqalissasut siunertaavoq, tassani sanaartornermi maleruaqqusat nutaat pisoqqalluunniit 2006-imeersut malinneqassanersut nammineq aalajangerneqarsinnaavoq.

Siunnersuut tusarniaassutigineqartoq tamakkiisoq tuugassaq una toorlugu atuaruk

Siunnersuummut tusarniaassutigineqartumut akissuteqarnissamut tunniussiffissaq kingulleq 2024-mi oktobarip sisamaannut ullulerneqarsimavoq.