POLITIIT
Paamiuni savimmik kapoorineq – arnaq Nuummut aallarunneqarpoq
Peqqinnissaqarfik arnamik Paamiuneersumik savimmik kapoorneqarsimasumik Dronning Ingridip Napparsimmavissuanut Nuummut aallarussivoq.
Assiliisoq: Leiff Josefsen
Arfininngorneq nal. 13:14 Kalaallit Nunaanni Politiinut nalunaarutiginnittoqarpoq Paamiuni savimmik kapoorisoqarnera pillugu. Tamanna politiit nakkutilliisuutitaasa pisortaata Jørgen Madsenip oqaluttuarivaa.
- Pinerluffigitissimasoq arnaavoq, taannalu peqqinnissaqarfimmit Nuummut aallarunneqartussanngortoq. Arnaq ilisimavoq, kisianni savimmik kapoorneqarsimanerminit ajoqusersimavoq. Pinerluttoq aamma arnaavoq, taannalu politiinit tigusarineqareerpoq, Jørgen Madsen oqarpoq.
Biili angerlarsimaffimmiitiinnarneqarli
Paamiuni savimmik kapoorisoqarsimanerata saniatigut, politiit aamma ulapipput imigassartorsimallutik biilertunik unitsitsiniarlutik.
Nakkutilliisuutitat pisortaat Jørgen Madsen inassuteqarpoq inuit fiisteriassagunik biili angerlarsimaffimmut qimattassagaat, assersuutigalugu juullimi nereqatigiinnermi peqataaniarunik.
- Imigassartorsimalluni biilernissaq inerteqqutaaginnaanngilaq, aamma inuit ulorianartorsiortinneqarnissaannut aarleriaateqarpoq, taamaattumik inassutigaarput biili angerlarsimaffimmut qimanneqartassasoq, assersuutigalugu juullimi nereqatigiinnermi peqataaniarunik, vagtchef Jørgen Madsen naggasiivoq.
