Paasiniaasartut: Qinersineq nunanit allanit sunnerneqanngilaq
Inatsisartunut qineqqusaartoqarnerani inuit attaveqaqatigiittarfiisigut eqqunngitsumik paasissutissiinernik takussaavoq, naalagaaffinniilli allaniit aaqqissuussaasumik sunniiniartoqanngilaq, isertortumik paasiniaasartut FE aamma PET naliliipput.
Inatsisartunut qinersinermut atatillugu paasissutissat eqqunngitsut allanngortinneqarsimasullu ingammik inuit attaveqaqatigiittarfiisigut siammarterneqartarsimapput, Politiit isertortumik paasiniaasartuisa Illersornissaqarfiullu paasiniaasartuisa nalunaarutigaat.
Assi: Oscar Scott Carl
Inatsisartunut qinersineq naammasseqqammersoq nunanit tamalaanit soqutigineqartorujussuuvoq, illersornissaqarfiullu isertortumik paasiniaasartut (FE) politiillu isertortumik paasiniaasartuisa (PET) nalunaarutaat naapertorlugit qinersineq ingammik inuit attaveqaqatigiittarfiisigut eqqunngitsumik paasissutissiinernik siammarteriffiuvoq.
Qinersinerli "naalagaaffiit allat kilitsissiaqarfiinit tupaallannartunik imaluunniit ataqatigiissarlugit eqqunngitsinik paasissutissiilluni sunniiniarnernik eqqorneqarsimanngilaq“.
Isertortumik paasiniaasartut taakku marluk taamatut naliliisartut PET pingasunngornermi allappoq.
FE-p PET-illu Inatsisartunut qinersineq Kalaallit Nunaanni oqartussat suleqatigalugit nakkutigisimavaat.
Oqartussaasut nunanit allanit, ingammik nunanit allanit isertortumik paasiniaasartunit, qinersineq sunnerniarneqarsimanersoq nakkutigisimavaat, tamaaliortoqarsimaneranilli takussutissaqanngilaq.
Paasissutissat eqqunngitsut allanngortitalluunniit inuit attaveqatigiittarfiini
Paasissutissalli eqqunngitsut imaluunniit allanngortinneqarsimasut, ingammik inuit attaveqaqatigiittarfiisigut, siammarterneqarsimapput.
Paasiniaasartut naapertorlugit qineqqusaarnermi inuit attaveqaqatigiittarfiini assigiinngitsunik eqqunngitsumik imaluunniit allaasaarluni salloqittaatinik, ilaatigut qallunaat kalaallillu politikeriusuusaartut, takussaasoqarpoq:
- Aammattaaq kalaallit politikeriisa inuillu politikeriunngitsut oqaaseqaataat
nammineq anguniakkat ersersinniarnerinut isumaannut uniuuttumik atorniarneqartarput.
- Paasissutissat eqqunngitsut tamakku – kina nassiussisuunersoq apeqqutaanani – oqaluuserisat
uniorlugit avissaartuutsitsiniarnermut ilapertuutaasinnaasarput, tamakkulu nunat allat
sunniiniarnerminni paasissutissat uniorlugit atorniarsinnaasarsinnaapput, PET allappoq.
