NAATSORSUUSERISIMASUMUT EQQARTUUSSINEQ
Paasisaq: Naatsorsuuserisuusimasoq peqquserlunnermut allakkanillu eqqunngitsunik suliaqarsimasutut siornatigut pineqaatissinneqarsimavoq
KNI A/S-imi naatsorsuuserisuusimasoq, peqquserluttuliorsimasutut allakkanillu eqqunngitsunik suliaqarsimasutut unnerluutigineqartoq, pingasunngornermi eqqartuussivimmi naggammik sassartinneqarpoq. Naggataarutaasumik oqaaseqarnermi unnerluussisussaatitaasup unnerluutigineqartoq siornatigut 2006-imi pineqaatissinneqarsimasoq oqaatigaa. Spæncomimi pisortaanermini checkinik 5 millionit koruuninut, momsimullu akitsuutinut 23 millionit koruuninut peqquserlussimasutut pisuutinneqarluni ukiuni sisamani paarnaarussassanngortinneqarsimavoq.
Dagen i dag handlede om dokumentation, personlige forhold og procedure.
Dorthea Reimer-Johansen
KNI-mi naatsorsuuserisuusimasoq pingasunngornermi naggataamik sassartinneqarpoq, tassani uppernarsaatinik saqqummiussineq inuttullu atugai sammineqarput.
Paasisalli angisuut aamma eqqartuussinermi unnerluussisussaatitaasup saqqummiuppai.
Unnerluutigineqartormi 2006-imi peqquserlussimasutut allakkanillu eqqunngitsunik suliaqarsimasutut ukiuni sisamani parnaarussaasussatut eqqartuunneqareersimavoq.
Unnerluussisussaatitaasup eqqartuussinerit pineqaatissiinerillu inernerinut tunngasut paasissutissat assigiinngitsut uppernarsaatigalugit saqqummiuppai.
Unnerluutigineqartoq taamani 2006-imi aningaasanik 5 millionit koruunit nalinganut checkinik peqquserlussimasutut pisuutinneqarpoq, taassuma saniatigut aamma momsinut 23 millioninit ikinnerunngitsunut aamma peqquserlussimalluni. Suliffeqarfimmi Spæncomimi pisortaasimasoq (maanna unnerluutigineqartoq, aaqq.) unnerluutigineqarnerminut taamani nassuerpoq.
Nutaarsiassaqartitsiviit naapertorlugit aningaasaqarnermut pisortaasimasoq suliffeqarfimmi Danmarkimiittumi Spæncomimi sulisitsisuni illuminik sanaartoqqinniarluni uupakaasiarisimavaa. Ukioq 2007-imi misiliummik iperagaavoq.
'Ajornanngeqaaq', taamani Spæncomimi aningaasaqarnermut pisortaasimasoq sooq aningaasanut millionilikkaanut peqquserlussimanerluni eqqartuussivimmi taamani aperineqarami akivoq.
Unnerluussut nutarterneqartoq
Uppernarsaatinik saqqummiussinerup kingorna ippassaammat ilisimannittutut apersorneqartup, KNI-mi aningaasaqarnermut pisortaanerup, nassuiaataanut unnerluutigineqartoq oqaaseqartinneqarpoq.
Eqqartuussinerup naggataani uppernarsaatit, soorlu politiinut nalunaarutiginninnerit, atsiornernik misissuinerit aningaasanillu bankikkut nuussuinerit saqqummiunneqarput. Tassani atsiornerit eqqunngitsut unnerluutigineqartup suliarisimasai uppernarsarneqarput.
Naggataarutaasumik oqaaseqarnermi unnerluussisussaatitaasoq oqaaseqarnermini ilaatigut oqaatigaa unnerluutigineqartup pisut allanut nalorninarsarsimagai, taamaalilluni KNI A/S-imi aningaasaqarnermut tunngasut nammineq kisimi ilisimasimalersimallugit. Unnerluussisussaatitaasoq naapertorlugu unnerluussummi allaqqasut tamarmik uppernarsarneqarput, ilanngullugulu oqaatigalugu unnerluutigineqartup pinerlunnermi periaaserisartagaa aaqqissuulluagaasartoq.
KNI A/S-imi aningaasaqarnermut pisortaaneq nassuiaasinneqareersorlu unnerluussisussaatitaasup unnerluussut nutarsarpaa, ukiunilu pingasuni pingasuniluunniit aappaa avillugu pineqaatissinneqarsimasunut inissiisarfimmut inissinneqassasoq piumasaralugu.
Unnerluussutillu allaqqanera allanngortillugu ima: "... pisinnaatitaanngitsumik 1.695.652,19 millionit koruunit ataannagit aningaasarsisimasoq, KNI A/S-ilu 3.049.524,17 millionit koruunit ataannagit annaasaqarsimasoq“.
- Uppernarsarneqanngilaq!
Unnerluutigineqartup illersuisuata illersukkani pinngitsuutinneqarnissaa suli attappaa. Illersuisormi isumaqarpoq KNI A/S-imi aningaasaqarnermut pisortaq suliamut akisussaaqataasoq, taassumammi unnerluutigineqartoq akissarsialerivimmi systemimut ilanngunneqarnissaa akuerisimammagu.
Taassuma aamma tikkuarpaa atsiornerit ilumuunginneragaasut uppernarsaatissaqanngitsut, ilumut unnerluutigineqartup suliarisimanerai. Taassuma sullitani peqquserlunnissaminut siunertaqarsimannginnerarpaa. Unnerluussisussaatitaasup unnerluutigineqartup siornatigut pineqaatissinneqarsimanera maanna suliamut aamma attuumassuteqannginnerarpaa.
Unnerluutigineqartorli pisuutinneqassappat ukiuni marlunni pineqaatissinneqarsimasunut inissiisarfimmut inissinneqarnissaa piumasaraa.
Eqqartuussinerup inernera sisamanngornermi maajip ulluisa 16-ani nalunaaqutaq ataatsimut nalunaarutigineqassaaq.
KNI A/S-imi naatsorsuuserisuusimasoq siornartigut pineqaatissinneqarsimanera KNI A/S-ip atorfinitsinnginnerani ilisimasimaneraa Sermitsiaq paasiniaavoq.
