Paasisavut 2024-mi ajugaaniuteqataasussat toqqarneqarput

Ilisimatusartunik paasisaminnik innuttaasunut Paasisavut 2024-mi saqqummiussissallutik Katuami sassartussanik tallimanik Arctic Hubimi toqqaasoqareersimalerpoq.  

 21-nit tallimat

 Sapaatip-akunnerata matuma siuliani naliliisartut saqqummiussillaqqinneqqusaannermut peqataasussanik toqqaaniarlutik naapeqatigiimmata qinnuteqaateqarsimasut 21-upput. 

Qinnuteqaateqartut tamarmik ph.d.-upput Kalaallit Nunaanni ilisimatusarnermik suliaqartut. Taakkulu Paasisavut-mi paasisaminnik tamanut paasiuminartumik saqqummiussillaqqinneqqusaatissapput. 

- Nuannaarutigeqaarput 21-t Paasisavut-mut peqataanissamut qinnuteqarsimammata. Naliliisartunit tusarpara ukioq manna qinnuteqaasiarineqartut torraaqisut. Taamaattumik aalajangiinissaq imaannaasimanngilaq, Jula Maegaard-Hoffmann, Arctic Hubip Paasisavut-mik aaqqissuiffiusup allattoqarfiani pisortaasoq, oqarpoq. 

Naliliisartulli qinnuteqartunit ajugaaniuteqataasussanik tallimanik toqqaasinnaasimapput. 

- Tulluusimaarutigaarput ukioq mannattaaq saqqummiussisartut piginnaaneqarluaqisut tallimat assigiinngeqisunik tallimanik ilisimatusaatigalugu suliniutillit ilisaritissinnaagatsigit. Aamma nunatsinni ilisimatusarfigineqartut assigiinngiiaarlutillu pingaaruteqassusiat toqqarneqartuni taakkunani erseqqissarneqarluarneqarsoraavut, Jula Maegaard-Hoffmann oqarpoq. 

Ukioq manna Paasisavut-mi ajugaaniuteqataasussat ukuupput:

 • Kirstine Eiby Møller inuit ilagiillu kristumiut assigiinngitsut naapeqatigiinnerat tamatumalu inuit inuiaqatigiittut inuunerminni atugaannut sunniutai pillugit ph.d.- nngorniuteqarpoq: ‘Nunasiaataanermi kulturikkut naapeqatigiinnerit’. 

• Mie Møller Kalaallit Nunaanni coronamik nappaalanersuaqarnerani suleriaaseq pillugu ph.d.-nngorniuteqarpoq: ’Kalaallit Nunaanni COVID-19-imik nappaalanersuaqarneranut isiginnittaatsit’. 

• Lokesh Jain sermersuup killingani sikkussat taakkualu silap pissusiata allanngoriartorneranut sunniutai pillugit ph.d.-nngorniuteqarpoq: ’Sikkussat serminik iigartartunik allanngoriartortitsinerannik takussutissiaq’. 

• Regine Møller Isertumi innuttaasut piujuartitsilluni ineriartortitsinermut isiginnittaasiat pillugu ph.d.-nngorniuteqarpoq: ’Piujuaannartitsisumik ineriartortitsineq: Nunasiaatillit periusiinik attassiinnarneq, nunasiaataajunnaarsarneq Iserdormiullu isiginnittaasiat’. 

• Natacha Severin ilaatigut Kalaallit Nunaanni qalerallit ’jelly fish’-imik taaneqartartumik sarajappallaartumik nerpeqalertarnerat pillugu ph.d.-nngorniuteqarpoq: ’Kalaallit Nunaanni qalerallit uumassusilittut allanngorarnerat – Piujuartitsinermik, pitsaassutsimik nioqquteqarnermilu nalingannik pitsanngorsaaneq (Qaleralik)’.

Iserneq akeqanngilaq 

Katuami saqqummiussillaqqinneqqusaannermi ajugaaniuteqataasut minutsini tallimaannarni ph.d.-nngorniutitik inersuarmi tusarnaarianut KNR-ikkullu toqqaannartumik isiginnaaqataasunut tamanut nassuiassavaat. 

Ukioq manna naliliisartuusussat tassaapput Minik Rosing, Nukâka Coster-Waldau aamma Rosannguaq Rossen. 

Taakku ajugaasumik toqqaassapput. Paasisavut-mi ajugaasoq minutsit tallimaannaat ingerlaneranni ilisimatuutut misissukkaminik paasiuminartumik, sunniuteqarluartumik tulluartumillu saqqummiussisinnaassaaq, taakkua ilisimatuussutsimut tunngasortaanik ataqqinnilluni.

 Ajugaasoq 50.000 kr.-inik akissarsisinneqassaaq. Katuamut Paasisavut 2024-mik isiginnaariarlunilu tusarnaariarneq akeqanngilaq, aamma kikkut tamarmik tikilluaqqusaapput.