Palasi: Oqaluffimmit ilisaasinnaavutit ilagiinnit ilaasortaajunnaarsimagaluaruilluunniit
Kuisimanngitsunut ilagiinnulluunniit ilaasortaajunnaarsimasunut toqusut inaanik peqalernissaq kommunalbestyrelsimi ilaasortamit, Navarana Lennert-Andersenimiit (IA) kissaatigineqarpoq. Qanigisaasulli aliasungaartillugit ilisinissamut naleqqussarsinnaaneq inuppalaarsinnaanerlu pisariaqarsinnaasut Sisimiuni palasip naqissuserpaa. Aamma toqukkut qimaguttoq kuisimanngikkaluarpalluunniit ilagiinniilluunniit ilaasortaajunnaarsimagaluarpat.
Arkivfoto. Leiff Josefsen
Kuisimanngitsunut, ilagiinnit anisimasunut allatulluunniit upperisalinnut toqusut inaannik peqalernissaq Navarana Lennert-Andersenip Qeqqata Kommuniani kommunalbestyrelsimut siunnersuutigereeraalu, Sermitsiaq Sisimiuni palasimut saaffiginnippoq.
Toqusoqarsimatillugu qimagaasut aliasunnertik inuulluaqqusinissartillu pisariaqartittarmassuk, torersumik kusanartumillu ilisinissaq amerlanernit kissaatigineqartarmat politikeri siunnersuuteqarpoq.
Palasip, Louis Sigurdsenip ullumikkut ilisinerit qanoq aaqqissuunneqarsinnaanersut oqaluttuarai.
- Toqugumamiatagooq, kuisimanngikkuma ilagiinniilluunniit anisimaguma, taava ilaquttakka qanoq iliussappat?
- Ilaquttappit annaagunitsit, taava nammineerlutik kommunimut attaveqassapput, taakku iliveqarfinni assaasarmata.
Katersortarfiit atorneqakkajuttarput, kisianni
qaqutigoortorujussuuvoq. Soorlu namminneq katersortarfimmi oqaaseqarlutik
erinarsoqatigiillutilluunniit, taava tassanngaanniit iliveqarfiliaallugu, palasi Louis Sigurdsen oqaluttuarpoq.
Taamaakkaluartoq oqaluffimmit ilisaasinnaavutit
Palasip, Louis Sigurdsenip ilanngullugu oqaluttuaraa ilaqutaasut nalusimagaangamikku qanigisartik toqukkut qimagussimasoq ilagiinnit ilaasortaajunnaarsimasoq aliasungaatsiartartut. Assersuuteqarporlu:
- Angut ataaseq ilagiinniit anisimavoq ilaquttaminullu oqanngiivilluni. Taava aatsaat toqoreermat arnaata paasivaa ernermi ilagiinnit ilaajunnaarsimanera. Taava paasitipparput ernera taama sullinneqarnissaminut piumajunnaarsimammat nalinginnaasumik oqaluffimminngaanniit ilisaasinnaanngitsoq. Aatsaat iluamik anaanaa aliasunneruliinnarpoq. Taama pisoqarmat ilaqutaasut sapinngisarput tamaat sullittussaavagut.
Palasip toqukkut qimaguttoq oqaluffimmit ilisaanissaa sulissutigissallugu aalajangerpoq:
- Aporfilersuiniartanngilagut, ilaqutaasut uanga eqqarsaatiginerusarpakka. Palasimiit
palasimut immaqa allaanerusinnaassaaq. Kisianni assersuutigalugu anaanaasoq
qanigisaasullu pinerullugit, taakkumi isumagisussaagatsigit sapinngisatsinnik,
taava oqaluffimmit ilisivugut.
- Imatut kipparitsiginngilagut oqassalluta
"ilagiinnit aninikuugavit, tassa ilisaasinnaajunnaarputit
oqaluffimminngaanniit", soorunami inuttaata kissaatigigaluarpaa
taamaakkusunnani, kisianni anaanaasumut sakkortungaarmat aatsaat paasillugu,
ikiornikuuarput taamaalillugu.
Navarana Lennert-Andersenip Sisimiuni toqusut inaat kiisalu toqusunut ikuallaavimmik pilersitsisoqarnissaanik kissaataa Qeqqata Kommuniani kommunalbestyrelsimi aqagu sisamanngornermi oqaluuserineqassaaq.
