Parnaarussivinni sulisut peqatigiiffiata taaguutit allanngornerat qujamasuutigaa
Kalallit Nunaanni Pinerluttunik Isumaginnittoqarfiup aqqa allanngorpoq, taavalu inissiisarfiit paarnaarussivittut taagorneqartalertussanngorlutik. Atinik allannguineq sulisut peqatigiiffiannit iluarineqarpoq.
Bo Yde Sørensen Parnaarussivinni sulisut peqatigiiffiani 2019-imi maajimi siulittaasunngorpoq.
Assi: Fængselsforbundet
Kalaallit Nunaanni Pinerluttunik Isumaginnittoqarfik Kalaallit Nunaanni Parnaarussivinnik (KNP) ateqalissaaq, tamannalu Parnaarussivinni sulisut Peqatigiiffianni nuannaarutigineqarpoq.
– Danmarkimi Pinerluttunik Isumaginnittoqarfik allatut ateqalerpat Kalaallit Nunaanni Pinerluttunik Isumaginnittoqarfik soorunami aamma allatut ateqalissaaq - aterlu soorunami kalaallisuujussalluni. Atsiinikkut suleqatigiinnerup pingaarutillip pitsanngorsarneqarnera erseqqissumik takutinneqassaaq, ilaatigut pillaariaatsit aaqqissuunneqaqqinneratigut, peqatigiiffimmi siulittaasuq Bo Yde Sørensen oqarpoq.
Parnaarussivinni sulisut Peqatigiiffiata parnaarussivinni nakkutilliisunik allanillu Pinerluuteqarsimasunik Isumaginnittoqarfimmi sulisunik aaqqissuussivoq.
Kalaallit Nunaanni pineqaatissinneqarsimasunut inissiisarfiit taamatut taagorneqarunnaarnissaat peqatigiiffiup aamma taperserpaa. Aalajangiineq oqaluttuarisaanermut ilannguttoq, Bo Yde Sørensen oqarpoq.
– Parnaarussivinnik taaneqartalissapput, tamannalu Danmarks Fængselip Kalaallit Nunaannilu Parnaarussiviit qanoq pitsanngorsarneqarnissaat pillugit pilersaarutitut ersarissutut isigaara. Pineqaatissinneqarsimasut inuiaqatigiinnut akuliuteqqinnissaannut, suliassatta pingaarnerit ilaattut, ataatsimut ingerlaarfeqarnertut, oqarpoq.
Kalaallit Nunaanni parnaarussiviit peqatigiiffimmullu ilaasortallu pillugit suli iliuuseqartoqangaartariaqartoq, Bo Yde Sørensenip aamma eqqaasitsissutigaa.
– Atip nutaap unammilligassavut aaqqinnavianngilai. Allannguisoqalerneranulli takussusiivoq – tamannalu taperserparput, peqatigiiffiup siulittaasua oqarpoq.
Atit allanngortinneqartut 2026-mi aasakkut pinerluttulerinermut inatsimmut allannguutigineqartussamut atatillugu atuutilersinneqassapput, Naalakkersuisulli taaguutit nutaat maannakkut atulereerpaat.
