Pave Leop Italiamiu inuusuttoq toqoreernikoq iluartuutitanngortippaa
Carlo Acutis 2006-mi 15-nik ukioqarluni toquvoq, ukiullu 19-t qaangiunneranni Ruumami Peterspladsimi iluartuutitanngortinneqarpoq.
Carlo Acutis kinguaariinni Y-ni ”millennial”-imiluunniit siullermi katuullit ilagiissuinit iluartuutitanngortinneqarpoq.
Assi: Matteo Minnella/Reuters/Ritzau Scanpix
Pave Leo XIV sapaammi
Italiamiumik inuusuttuaqqamik Carlo Acutisimik iluartuutitanngortitsivoq.
Carlo Acutis 15-nik
ukioqarluni 20026-mi aammigut kræfterluni toquvoq, katuullillu ilagiit
oqariartuutaannik internetimi siaruarterisarnini pissutigalugu ”Guutip
influenceriatut” taagorneqarluni.
Taama nutaarsiassaqartitsivik
AFP allappoq.
Carlo Acutisip sunngiffimmi
ilaa annertooq qarasaasiamut kodeliorlunilu spillernermut atortarsimavaa,
taamatullu aamma upperisani pillugu allanut oqaluttuartarluni.
Tamatuma saniatigut
meeraanermini ullut tamaasa oqaluffiliartarpoq, illoqarfimminilu Milanomi
angerlarsimaffeqanngitsunut nerisassanik sinngullu puuinik agguaasarluni.
Carlo Acutisip
iluartuutitanngortinneqarnera malinnaaffiginiarlugu amerlasuut Ruumap qeqqani
Vatikanimi Peterskirkimi kateripput. Iluartuutitanngortitsineq najuuttut
assamminnik ersaartaannerini ingerlanneqartoq, AFP allappoq.
Carlo Acutis timaa coorpunik
qarlilik Nikenillu sneakersilik Italiami illoqarfimmi Assisimi ilerfiup
initaani igalaaminilerlugu takusassiarineqarpoq.
Inuit 800-t missaanni
Peterspladsimut takkuttut pisoq sioqqutitsiarlugu Assisimit, illoqarfimmit
ukiuni akullersuarneersumi, katuullillu upperisaq pillugu ingerlaartunit
ornikkumaneqartartumeersut, immikkut qimuttuitsunut ilaallutik Ruumaliarput.
Carlo Acutisip
iluartuutitanngortinneqarnera Assisimi isiginnaaruterujussuakkut
malinnaavigineqarsinnaavoq.
Acutis 1991-mi Londonimi
inunngorpoq mikisuullunili angajoqqaani Italiamiut Italiamut nooqatigai.
Italiami illoqarfissuarmi Milanomi peroriartorpoq.
Vatikanip tupinnartuliat
marluk Carlos Acutisimeersutut akuerai. Tupinnartuliat, katuullit ilagiit taagugaat,
Acutisip toqoreernerani pisimapput.
Tupinniartuliaq siulleq Brasiliamiup
meeqqap aqajaqqup sanilequtaani qaqutigoortumik kræfteqarnerminit ajorunnaarsinneqarnerani
pivoq, aappaalu ilinniagaqartup Costa Ricameersup annertuumik ajoqusersimalluni
ajorunnaarnerani pilluni.
Pisuni tamani ilaqutaasut
Carlo Acutisip meeqqamik napparsimasumik ilinniagaqartumillu ajoqusersimasumik
ikiuunnissaanik qinupput.
