Danskit naalakkersuisuisa Ittoqqortoormiini mittarfiliornissamut Qaqortumilu umiarsuarnut talittarfiliornissamut aningaasaliinerat ajunngilaq, kisianni sulinermi minitaqartoqarpoq, Pele Broberg isumaqarpoq.
Inatsisartuni partiini maanna illuatungiliuttutuami Naleqqami siulittaasuuvoq.
Danskit naalakkersuisuisa Ittoqqortoormiini mittarfiliornissamut Qaqortumilu umiarsuarnut talittarfiliornissamut aningaasaliinerat ajunngilaq, kisianni sulinermi minitaqartoqarpoq, Pele Broberg isumaqarpoq.
Inatsisartuni partiini maanna illuatungiliuttutuami Naleqqami siulittaasuuvoq.
Naalakkersuisut illuatungiliuttunik Inatsisartunilluunniit aalajangiinermut peqataatinneqannginnerat isornartorsiorpaa.
- Illuatungiliuttutut Inatsisartunullu ilaasortaasutut naalakkersuisooqatigiit tungaannit ilisimatinneqanngilagut. Suliniutit arlaannaalluunniit pillugit ilisimatinneqanngilagut.
Aningaasaliissutit Folketingimi akuerineqaqqaartussaanerat isumaqatigiissummi marlunngornermi saqqummiunneqartumi allassimavoq. Inatsisartunili akuerineqaqqaartariaqarnera allassimanngilaq.
Partiit naalakkersuisoqataasut tassaapput Demokraatit, Inuit Ataqatigiit, Siumut aamma Atassut. Taakku Inatsisartuni 31-usuni 23-nik ilaasortaatitaqarlutik amerlanerussuteqarluarput, taamaattumillu isumaqatigiissut Inatsisartuni taasissutigineqassagaluarpat tapersenissaqarluarluni.
Naalakkersuisulli suleriutsit eqqortut malillugit iliorsimasussaagaluartut Pele Broberg isumaqarpoq. Pissaanermik tigumminnittut pissaaneqarpallaannginnissaat qulakkeerniarlugu innuttaasut naalakkersueqataanerannik ingerlariuseqarneq tikkuarpaa.
Tunngaviusoq naak?
Kalaallit napparsimasut Danmarkimut katsorsartikkiartortarnerannut aningaasartuutit Danmarkimit akilerneqartalissasut isumaqatigiissummi aamma allasimavoq.
Naleqqamit taanna oqariartuutaasarnikuuvoq. Taamaattumik taama aalajangiisoqarnera Pele Brobergip akerlerinngilaa. Qallunaat akisussaaffigisariaqaraat taanna isumaqarpoq.
Isumaqatigiissulli 2029-p tungaanut atuuppoq, tamatumalu kingorna Danmarkimit suli akilerneqartassanersoq qulakkeerneqarani. Qallunaat akisussaaffigisariaqaraat taanna isumaqarpoq.
- Danskit naalagaaffiata susassaqarfik akisussaaffigaa, taamaattumik naalagaaffik innuttaminut akisussaassanersoq suli tunngaviusumik aalajangerneqanngilaq.
- Danskit naalakkersuisui uagutsinnut ajunngisaarnermikkut annanniarsarisutut ipput, eqqoriaannarsinnaavarpullu qallunaat qinersingajalernerannut tunngassuteqartoq, Pele Broberg oqarpoq.
Amerikamiut kissaataat
Kalaallit Nunaanni attaveqaasersuutinut aningaasaliinerit kalaallit namminneq kissaataannit tunngaveqartut, Mette Frederiksen oqarpoq.
Qaqortumili umiarsuarnut talittarfittaarnissamik politikkikkut anguniagaqartoqarneranik takussutissanik nassaarniarneq ajornakusoorpoq, Nalerarlu aalajangiinermut peqataatinneqarnikuunngimmat taama pingaarnersiuisoqarneranut suna pissutaanersoq nammineerluni inerniliissutigineqaannartariaqarpoq.
- Danskit naalagaaffianit suliniutit aallartinneqarusunneranerat paasisinnaavaarput, taakkumi amerikamiunit piumasarineqarput. Ittoqqortoormiuni mittarfik Qaqortumilu talittarfik eqqarsaatigalugit. Amerikamiummi kissaatigaat, taamaammallu qallunaaniit suliarineqarusunnera paasisinnaalluarlugu, oqarpoq.
Mittarfissaq umiarsuarnullu talittarfissaq sakkutuunit sakkutuujunngitsuniillu atorneqassasut Naalakkersuisut siulittaasuata Jens-Frederik Nielsenip (S) uppernarsarnikuuaa.
Talittarfilli takornariaqarnermut aamma iluaqutaasinnaasoq eqqaaneqarpoq. Taannartaali upperiuminaatsoq Pele Broberg isumaqarpoq.
- Illoqarfinnimi tamani talittarfeqarpoq, taakkulu umiarsuarnik takornariartaatinik sullissisarput aningaasanilli atuiffigineqarumanatik. Qaqortumi talittarfiup allilerneqarnialersaarneranut sakkutooqarnermik patsiseqarsimassasoq kisiat nalunngilarput. Taannami amerikamiunit kissaatigineqarsimassaaq. Taamaammat umiarsuit takornariartaatit pillugit patsisissarsiorneq ajunngilaq. Sinnerimi?
