KL

DK

Pele: Inatsisartunut tullinnguuttunut arsaq tunniunneqarli

Naleqqap siulittaasuata, Pele Broberg isumaqarpoq Kalaallit Nunaat tunuarsimaartariaqanngitsoq naalagaaffinngornissamut periarfissat, isummani naapertorlugu amerikamiut soqutiginninnerat annertooq pissutigalugu pilersinneqarsimasut atorluassallugit. Taassuma nunatsinni aqutsisunut kaammattuutigaa innuttaasut Inatsisartunut qinersinermikkut isummernissaat piaartumik isumagineqartariaqartoq.

Naleqqap siulittaasua Pele Broberg: - Massakkorpiaq inissisimaffeqarpugut ullumikkut Inatsisartuusut sulinerisa naggatissaanut ullut qaangiutilerlutik, suliassallu Inatsisartunngorumaartussanut nassiussuunneqarlutik, taamaattumik pissusissamisuussaaq Inatsisartunut tullinnguuttunut arsap ingerlateqqinnissaa, tamannalu taamaallaat pisinnaavoq qinersisoqarneratigut.
Jensine Berthelsen
tusagassiortoq
Saqqummersinneqarpoq

Naalakkersuisut siulittaasuat, Múte Bourup Egede (IA) marlunngornermi, Naalagaaffinngornissamut Nunanullu allanut Naalakkersuisoq, Vivian Motzfeldt (S) peqatigalugu tusagassiortunik katersortitsivoq "Ulluni makkunani pisut aallaavigalugit".

Tusagassiortunik katersortitsineq innuttaasunut eqqissisaalluni ingerlanneqarpoq USA-p præsidentiata Trumpip nalunaarutigisartagaasa Kalaallit Nunaat "pisiariniarlugu aqussinnaaneralu" soqutigisaanik aallaaveqartumik. Tamatuma saniatigut Naalakkersuisut siulittaasuata nalunaarutigaa Inatsisartuni partiit tamarmik qalipaatitik piunnaarlugit USA-p soqutiginninneranut tunngatillugu ataatsimoortut.

Taamaattoqarneranik uppernarsaavoq Naleqqap siulittaasuat, Pele Broberg. Taanna erseqqissaavoq, partiit ataatsimoorutaat marluusut:

  • Amerikamiunngorusunngilagut, danskiunngorusunngilagut, kisianni kalaaliorusuppugut.
  • Naalakkersuisut Inatsisartutillu qanoq iliuuseqarnerannut avataanit akunnermiliuttoqarani suliat ingerlanneqassapput.

Pele Brobergip oqaluttuarivaa, partiit Naalakkersuisut peqatigalugit ataatsimeeqatigiittarnerat pingasoriarluni maannamut pisimasoq, USA-mut tunngatillugu ilisimatitseqatigiinneq aammalu ataatsimoortumik peqatigiinnissaq qulakkeerniagaalluni, Brobergillu oqaatigaa tamanna pissusissamisoortoq, tassa nunatsinni partiit ataatsimik oqaqarlutik oqalunnissaat, suliami Kalaallit Nunaannut pingaaruteqarluinnartumik ingerlasoqarnerani.

- Kisianni arsaq inatsisartussanut ingerlateqqinneqartariaqarpoq

Taamaattorli partiit "ikioqatigiinnissamik isumaqatigiinnerat" Naleqqamit peqataaffigineqaraluartoq Broberg isumaqarpoq Inatsisartunut qinersinissaq pisariaqartoq, taamaalilluni Inatsisartut nutaat piaartumik suliamik tigusisinnaanissaminnut periarfissaqalissammata.

- Kalaallit Nunaanni inuiaqatigiinni saassunneqanngilagut taamaalillutalu navianartorsiunngilagut. Akerlianilli periarfissat pilersinneqarput namminiilivinnissaq pillugu ingerlariaqqinnissamut. Kisianni tamanna atorluarneqanngilaq, tassami ullumikkut killiffitsinni aqutsisut atorunnaalersut aquummik tigumminnipput, iliuuseqarsinnaanerallu killeqartorujussuulluni, qinigaaffimmi naaliivikkami.

- Taamaattumik Naalakkersuisut siulittaasuata Inatsisartunut qinersinissaq nalunaarutigisariaqarpaa taamaalillunilu Inatsisartunut nutaanut iliuuseqarsinnaassuseqarluartunut isumaqatigiinniarnernillu ingerlatsinissaminnut periarfissaqarluartunut ingerlateqqillugu, Pele Broberg (N) oqarpoq.

usa valg til inatsisartut 2025 samfund politik pele broberg naleraq inuiaqatigiit trump

ATORFIIT Se alle jobs

Powered by Labrador CMS