Pelep naalakkersuisooqatigiinnissamut isumaqatiginninniarnerit pakatsissutigigai
Namminiilivinnissaq pillugu apeqqut Demokraatit Naleqqallu akornanni naaperiarfiusinnaasimanngilaq. Naleqqap siulittaasua naapertorlugu Demokraatit qineqqusaarutitik malikkumanngimmassuk taama pisoqarpoq.
Inatsisartunut marsip aqqarngani qinersinermi Naleqqap ilaasortai pingasunik amerleriarput. Pele Broberg Aki-Matilda Høegh-Damilu partiimi qinerneqarnerpaapput.
Assi: Emil Stach
Naleraq Naalakkersuisooqatigiinnissamik isumaqatiginninniarnernit anisoq Demokraatit siulittaasuata Jens-Frederik Nielsenip ataasinngorneq ualisoq nalunaarutigaa.
Isumaqatiginninniarnermiilli anisitaasimallutik Naleqqap siulittaasua Pele Broberg oqarpoq.
- Nalunaaqutaq 14.06 qaaqquneqaratta namminiilivinnissaq kissaatigigatsigu naalakkersuisooqatigiumaneqarata paasitinneqarpugut, oqarpoq.
Naleraq Inatsisartunut marsip aqqarngani qinersinermi partiit anginersaasa tulliattut inissippoq, taakku Inatsisartuni ilaasortaat pingasunik amerlanerulerlutik.
Taamaattumik siulittaasup naammagisimaarinngisaa naalakkersuisooqatigiinni nutaani inissaqannginnini pissutigalugu, Pele Brobergip naatsorsuutigaa Demokraatit Inuit Ataqatigiinnik isumaqatigiissuteqassasut.
- Soorunami pakatsinalaarpoq, tassami sapaatip-akunnerini marlungajanni isumaqatigiinniareerluni illuatungaaniit aaqqiisoqarnissaanik isumaqarluni taamaattoqannginnera soorunami nuannersuinnaanngilaq.
Namminiilivinnissaq pillugu isumaqatigiinnginneq
Demokraatit naapertorlugit Namminersorneq pillugu inatsimmi §21-p atuutilersinneqarnissaanut apeqqummut partiit isumaqatigiissinnaannginnsamik Naleraq isumaqatiginninniarnernit anivoq.
Demokraatit arriinnerusumik ingerlarusuttut Naleraq sukkanerusumik atuutilersitserusuppoq. Tuaviornertulli paasineqassanngilaq.
- Naamik, tuaviuuteqanngilagut. Suliat peqqissaarullugit sulivugut.
- Danmark peqatigalugu peqatiginaguluunniit pilersaaruteqarpugut, aamma naalagaaffiup tapiissutaai ilanngullugit ilanngunnagillu pilersaaruteqarluta. Assigiinngitsorpassuarnik pilersaaruteqarpugut. Taamaattumik tuaviorneraaneq oqaluttualiaavoq tusagassiortunit pinngortoq, Pele Broberg oqarpoq.
Namminersorneq pillugu inatsimmi allassimasoq Pele Brobergip innersuussutigisimavaa. Tassa kalaallit namminiilivinniarlutik aalajangerpata Kalaallit Nunaata danskillu naalakkersuisui isumaqatiginninniarlutik aallartissapput.
Namminersorneq pillugu inatsimmi § 21
§ 21. Kalaallit Nunaata namminiilivinnissaanik
aalajangerneq inuiaat kalaallit aalajangernerannik
tunngaveqassaaq.
Imm. 2. Imm. 1-imi pineqartutut ittumik aalajangiisoqarpat Kalaallit Nunaata namminiilivinnissaa piviusunngortinniarlugu Naalakkersuisut
aamma Danmarkimi naalakkersuisut akornanni
isumaqatigiinniarnerit aallartinneqassapput.
Imm. 3. Naalakkersuisut Danmarkimilu naalakkersuisut Kalaallit Nunaata namminiilivinnissaata
piviusunngortinnissaanik isumaqatigiissutaat
pissaaq Inatsisartut akuersinerannik tunngaveqartumik aamma Kalaallit Nunaanni innuttaasunik
taasisitsinikkut akuerineqassalluni. Aammattaaq
taamatut isumaqatigiissuteqarneq Folketingip
akuersineratigut pissaaq.
Imm. 4. Kalaallit Nunaata namminiilivinnerata
kingunerissavaa Kalaallit Nunaata imminut naalagaaffittut oqartussaaffigilernera.
Tassa Kalaallit Nunaata susassaqarfiit suli angerlaassimanngisai pillugit qanoq iliortoqassanersoq aamma §21-mik atuutsitsilernerup kingorna qanoq pisoqassanersoq paasiniarneqaqqaartariaqarlutik.
Demokraatit qineqqusaarutaanni “namminiilivinnissamut aqqut maanna aallartittoq” allassimavoq, aamma namminiilivinnissamut pilersaarutit pillugit Danmarkimik isumaqatiginninniarfissanngortoq.
Nalerarli naapertorlugu taakkua tunuarterput.
- Demokraatit qineqqusaarutiminnik malinnikkusunnginnerat pivoq. Tamannalu eqqumiilliornarpoq, oqarpoq.
llluatungiuliuttunngoqqittut
Qanorluunniit pisoqaraluarpat Naleraq illuatungiliuttutut inisseqqinnissaa ilimanarsivoq. Naleraq IA-mik 2021-mi naalakkersuisooqateqaleraluarpoq, ukiorli ataaseq qaangiummat suleqatigiikkunnaarlutik. Taamaattumik partii ukiuni kingullerni pingasuni illuatungiliuttutut inissisimapput.
Partiili qinigaalluaraluarluni illuatungiliuttutut inisseqqinnissaa Pele Brobergip annilaangatiginngilaa.
- Demokraatit suliaminnut tunngatillugu uagutsinnit tapersersorneqarnissartik naatsorsuutigissanngilaat.
- Tassa illuatungiliuttutut inissisimalerluta suliniutitta piviusunngortinnissaat iluatsinniarsarisassavagut. Qinigaaffinni kingullerni marlunni, 2018-imi 2021-milu, allanik Naalakkersuisut siulittaasunngortitsisarpugut. Maannali taama pisoqassanngilaq, tamannalu ajorinngilarput, Pele Broberg oqarpoq.
Naalakkersuisooqataannginnissaminnik kinguneqaraluarpalluunniit politikkikkut anguniakkatik iperaannarunnarnagit oqaatigaa.
-Siuariartortoqarnissaa ineriartortoqarnissaalu piumasaraavut. Allat taamaaliorusunngippata illuatungiliuttutut inissinneeqarnissarput ajorinngilarput. Taakku aalajangerpaat, uaguunngitsoq.
