Peqataajunnaarneq uissuummissutaasoq
Kalaallit Nunaat siunnersuisooqatigiinnit tunuarpat, tamanna sakkortuumik kinguneqarsinnaavoq, taama naliliineq nipeqarpoq.
Múte B. Egedep naalakkersuisutigoortumik suleqatigiinneq unitsikkallaraa, qallunaat savalimmiullu tusagassiorfiini oqaluuserineqarpoq, franskillu nutaarsiassaqartitsiviannit AFP-mit ingerlateqqinneqarpoq.
Leiff Josefsen
Kalaallit Nunaata qisuariarnera Savalimmiut paasilluarpaa. Taama Savalimmiut inatsisartuini ilaasortat marluk, Johan Dahl Erling Eidesgaardilu, partiinit assigiinngitsunit marlunninngaanneersut, lagtingillu Nordisk Rådimi ilaasortaatitai oqarput.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit siunissami taamaallaat
atuarneqarsinnaajumaassapput.
Atuarluarna.
- Nunat avannarliit suleqatigiinneranni peqataatinneqannginnerput kanngunaannarpoq, Erling Eidesgaard Savalimmiuni TV-qarfimmut radioqarfimmullu Kringvarpimut oqarpoq.
Kalaallit Nunaat peqataajunnaarallarnermik ”naammaginninnani” nunat avannarliit suleqatigiinnerannit tunuavippat, tamanna annertoorujussuarmik kinguneqarsinnaasoq, politikeri Savalimmiuneersoq tikkuaavoq:
- Nordisk Rådimi nunat allat eqqarsarluaqqissaartariaqarput, Johan Dahl Kringvarpimut oqarpoq.
Siumumeersoq Doris J. Jensen Inatsisartut Nordisk Rådimut sinnissaata aapparaa. Taassuma «Naalakkersuisutigoortumik» suleqatigiinnerup unitsikkallarneqarnera soorunami maluginiarpaa, taamaammallu maanna pissutsit isumaliutigai, taanna AG-mut oqarpoq.
- Inissalli unitsikkallarpiuk?
- Sapaatip akunnerata tulliani nalunaaruteqarnissara naatsorsuutigaara. Maanna aalisarnermut inatsisissamut piffissaq tamaat atorparput. Kingornalu Nordisk Rådi Siumumi eqqartussavarput, Islandillu siunnersuisooqatigiinni sinniisuutitai aamma oqaloqatigissavakka, taanna akivoq.
Immikkut ajornartorsiornartoq
Múte B. Egede sapaatip akunnerani kingullermik ammasumik allagaqarluni nammineq «naalakkersuisut siuttuattut siunnersuisooqatigiinni naalakkersuisutigoortumik politikikkut sulinini unitsikkallarlugu» nalunaaruteqarmat, nutaarsiassaq ingerlaalerpoq.
Aalajangerneq ilaatigut saqitsaannermik, AG-p sapaatip akunnerani kingullermi aviisimi nassuiagaanit aallaaveqarpoq, tassanilu Nordisk Rådip siulittaasoqarfiata Savalimmiut, Åland Kalaallillu Nunaat naalagaaffiit siuttuisa Sverigemi aasaanerani ataatsimiinnissaannut qaaqquniarnagit aalajangernermit ilaatigut aallaaveqarpoq.
Peqataajumajunnaarnerit itinerusumik aamma patsiseqarpoq, taannalu Nordisk Rådiinnarmut tunngassuteqanngilaq. Naalakkersuisut annertusiartortumik nunat tamat akornanni ataatsimeeqatigiiffinni siunnersuisooqatigiinnilu tamakkiisumik ilaasortaanerup avataaniitinneqartuarnerit naammagiunnaariartorpaat. Naammaginninnginneq taamaattoq aamma Savalimmiuni atuuppoq, taakkulu sisamariarlutik Nordisk Rådimi tamakkiisumik ilaasortanngornissaq qinnuteqaatigisarpaat, iluatsitsiviunngitsumilli.
Naalakkersuisut nunanut allanut politikikkut nassuiaataanni, 23. maj Vivian Motzfeldtimit Inatsisartunut saqqummiunneqartumi , immikkoortoq annertooq Nordisk Rådimut Kalaallillu Nunaata pisortatigoortumik taasisinnaatitaannginneranut immikkoortinneqarpoq.
- Tamanna Danmarkip naalagaaffiup aaqqissuussaanerani, naalagaaffimmi immikkoortut marluk naalagaaffimmit ataatsitut taaneqartup iluaneersuni naalagaaffiup ikkikkuualuttuisa marluk amerlanerilluunniit isumaqatigiinngeratarsinnaanerannik, aaqqissuussallu ataatsip iluani imminnut akerlilerlutik taaseratarsinnaanerannik Danmarkip akuersaarumannginneranik patsiseqarpoq, qallunaat tunngavilersuutaannut nassuiaammi taama allassimasoqarpoq. Taamaakkaluartorli Naalakkersuisut naapertorlugit pissutsit attanneqarsinnaajunnaaqqapput. Kalaallit Nunaat tamatigut nunani avannarlerni naalagaaffiit qullersaasa ataatsimiinnissaannut tamatigut qaaqquneqarneq ajorpoq, naak Issittoq oqallisaagaluartoq. Tamanna 2023-mi nunat avannarliit Finlandimi ataatsimiinneranni pivoq.
Tamannalu pisuni Kalaallit Nunaata suliassaqarfinni tigoriigaani nunat avannarlerni suliarinnittoqartillugu «immikkut ajornartorsiornartartoq» oqaatigineqarpoq.
