Peqatigiiffiup Kalaallit Nunaanni politiit ikilerneqarsimasut ikiorniarai
Thin Blue Line Denmark politiinik sullissinerminni ikilerneqarsimasunik sullissisuuvoq. Peqatigiiffik maanna Kalaallit Nunaanni aamma aallussilissaaq. Peqatigiiffiup pisortaa naapipparput.
Stinne Ølshøj Nuummi politeeqarfiup eqqaani. Thin Blue Line Denmarkimi 2024-mili pisortaavoq.
Assit: Morten Okkels
- Nammineerlunga politiunngilanga, kisianni tamanna pingaartitarilersimavara. Inuit politiinut saaffiginnikkaangata inuiaqatigiit pisariaqartillugu politiinik aamma paarsisinnaasut pilersikkusuppakka,“ Stinne Ølshøj, Thin Blue Line Denmarkimi pisortaq oqarpoq.
Tamanna peqatigiiffiata sulissutigisarpaa, qanittukkullu aallartitat marluk Nuummut tikeraarput, tassanilu peqatigiiffik piusoq oqaluttuaralugulu siunissami Kalaallit Nunaanni suliffissaqarsinnaanertik paasiniarpaat. Tassani politiinit allanillu tikilluaqquneqarput, pisortaq oqaluttuarpoq.
– Kikkut ikiorsinnaanerlugit qanorlu ikiuisarnerluta oqaluttuarisarparput. Arlaatalu ornissagaatigut neriuutigisarparput. Danmarkimi misilittakkavut saqqummiuppavut, najugaqartuniilli ikiorneqarnissaq pisariaqartipparput, Stinne Ølshøj oqarpoq.
“Titarneq amitsoq tungujortoq” Thin Blue Line Denmarkikkut atiminnik isumassarsiorfigisimasaat qanoq isumaqarpa? Assigiinngitsunik paasineqarsinnaavoq. Henriup siulersuisuneersup oqaaseq tajaq assimi atukkani iluaqutigalugu ima nassuiarpaa: Politiit tassaapput titarneq amitsoq tungujortoq innuttaasut inatsisinik malinnittut malinninngitsullu akornanniittoq. Titarneq atasussaavoq, taamaanngippat inuiaqatigiit ajornatorsiulissapput.
Thin Blue Line Denmark aallaqqaammut sulianut aalajangersimasunut atatillugu ilaqutariinnik ikiuinermi katersisartussatut pilersaarutaasimagaluarpoq. Politiilli - atorfillit atorfeqarunnaarsimasullu - sullissinerminni ikilerneqarsimasut ikiorneqarnissaat, pisariaqartinneqarmat ataatsimoornissaq eqimattanullu pilersitsinissaq pisariaqartinneqartoq paasineqarpoq.
– Attaveqaqatigiinnermik 2016-imiilli aaqqissuussisarpugut, tassani politiit naliminnik peqateqartarlutillu qanimut naapitsisarput. Tassaasinnaavoq Østrigimut angalaneq imaluunniit umiarsualivimmi saunagus-erneq, tassani issiaqatigiittoqartarpoq inuunermilu unammillernartut naligisat peqatigalugit oqaloqatigiissutigineqartarput. Taamatuttaaq eqimattanngorluni ataasiakkaarluniluunniit katsorsartinnerit neqeroorutigisarpagut, Stinne Ølshøj oqarpoq.
Nuummi Hotel Hans Egedemi paasissutissiilluni ataatsimiinnermiit.
SULINEQ ILUNGERSUNARTOQ
Politiitut sulinerup ilungersunartuunera ulorianartuuneralu ilaatigut VIVE-p – Kalaallit Nunaanni atugarissaarnermut misissuisarfiup – 2020-mi nalunaarusiaani uppernarsarneqarpoq.
Kalaallit Nunaanni politiit 10 procentingajaat PTSD-mik nalaataqartut, 14,6 procentillu uippakajaalersartut nalunaarusiami inerniliunneqarpoq.
Kalaallit Nunaanni politiit 38 procentii minnerpaamik ataasiarlutik inuunerminnik navianartorsiortitsisumik misigisaqarsimasut, soorlu aallaaneqarsimasut, sakkulinnit saassunneqarlutik imaluunniit aqqunarluinnarlutik VIVE-p misissuinerata takutippaa.
Thin Blue Line Denmark qallunaat aningaasaqarnermut inatsisaannut siorna ilannguppoq, naalagaaffimmiillu tapiissutigineqartartut periarfissanik unammillernartunillu nutaanik pilersitsisimapput.
- Taamaalilluta immikkut ilisimasalinnik neqeroorutit assigiinngitsorpassuit pilersissinnaalerlugillu najukkami attaveqarluarnerulerpugut.
– Maanna Kalaallit Nunaanni ilisimasaqarnerulernissarput piffissanngorpoq. Maani assigiinngitsualuit Danmarkimi sungiusimasatsinniit allatut suliarineqartartussaassapput, Stinne Ølshøj oqarpoq.
ThinBlue Line Denmarkimiit maanna angerlarallarpugut. Ukioq mannali kingusinnerusukkut tikeraaqqinniarsarissaagut, neriuppugullu Kalaallit Nunaanni suliniuteqarnitsinni tapersersuisunik suleqataasunillu amerlanerusunik attaveqateqalersinnaassalluta.
