Peqqinnissaqarfik isumaqatigiissutaasimasumit aningaasartuuteqarneruvoq
2024-mut aningaasanut inatsit akuerineqarmat isumaqatigiissutigineqartumit IST-mi (Namminersorlutik Oqartussat ingerlatsinermut, sanaartornernut taarsigassiisitsisarnernullu missingersuutaat) sinneqartooruteqarnissaq 91,8 millionit koruuninik appasinnerusoq, ukiup qaammataani arfinilinni siullerni missingersuutit takutippaat. Ingammik peqqinnissaqarfimmi aningaasartuutinik atuinerusoqarsimavoq.
Namminersorlutik Oqartussat 2024-mut aningaasanut inatsimmi sinneqartoorutissanut eqquisumik atuinerusimasut, missingersuutit nutaat takutippaat.
Leiff Josefsen
Aningaasanut inatsimmi politikkikkut killiliussanik eqquutsitsinissamik qulakkeerinnittussamik Aningaasaqarnermut Naalakkersuisoqarfik nutaamik missingersuusiorpoq.
Aningaasanut inatsit akuerineqarmat IST-mi 292,4 millionit koruuninik sinneqartooruteqarnissaq naatsorsuutigineqarpoq. Ukiup affaata siulliup kingorna sinneqartoorutit allatut isikkoqalersimapput, 224,9 millionit koruuniussaallu naatsorsuutigineqarluni. 2024-mut sinneqartoorutit allanngorluinnarsinnaasut erseqqissarneqarpoq, tassami akileraartarnermut tunngatillugu „malunnaatilimmik qaffakkiartortumik nikingassuteqartoqarsinnaasoq“ oqaatigineqarpoq.
26 millionit koruuninik atuineruneq
Aningaasanik atuineruneq naalakkersuisoqarfimmit naalakkersuisoqarfimmillu allamit allamut siammaseqaaq, ingammillu peqqinnissaqarfimmi naatsorsuutigineqartumit atuinerusoqarsimavoq.
Peqqinnissaqarfimmi amigartoorutaasut 26 millionit koruuniusutut naatsorsorneqarsimapput.
Amigartooruteqarfiusut (atuiffiuneruffiit):
- Peqqissutsimut: 31,7 mio. kr.
- Napparsimasunik angallassinernut pinasuartumillu angallassinernut: 10,5 mio. kr.
- PPK-mi isumaqatigiissummut: 8,5 mio. kr.
- Nuna tamakkerlugu nakorsaaserisoqarfimmut: 4,9 mio. kr.
- Tarnikkut napparsimasunik inissiisarfimmut: 3,1 mio. kr.
Sinneqartooruteqarfiusut (atuinikinneruffiit):
- Kigutit nakorsaannit kiffartuunneqarnermut: 8,9 mio. kr.
- Nunani allani tarnikkut katsorsartinnermut: 8,6 mio. kr.
- Nuna tamakkerlugu peqqinnissakkut ilinniartitaanikkullu suliniutinut: 6,5 mio. kr.
- Napparsimasunut taarsiissutinut: 5,2 mio. kr.
- Ataatsimoorussanik kalerriilluni sianertarfimmut: 1,7 mio. kr.
- Dr. Ingridip Napparsimmavissuanut naalakkersuisoqarfimmullu: 2,0 mio. kr.
Aningaasaqarnermut Akileraartarnermullu Naalakkersuisoqarfik aamma 47,5 millionit koruuninik amigartooruteqarpoq. Tamatumunnga ilaatigut EU-mik suleqateqarnermut isumaqatigiissummit 56 millionit koruuninik ikinnerusunik aningaasaliiffigineqarnermik pissuteqartoq nassuiaataavoq, tamannalu aningaasanik tunniussinerup kinguaattoortarneranik pissuteqarpoq.
Naalakkersuisoqarfinni allani, maluginiarnartumik assigiinngissuteqarfiusuni, atuineruneq ima isikkoqarsimavoq:
Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik: 13,7 mio. kr.
Isumaginninnermut, Ilaqutariinnermut, Suliffeqarnermut Nunamullu Namminermut Naalakkersuisoqarfik: 4,3 mio. kr.
Ineqarnermut Attaveqaasersuutinullu Naalakkersuisoqarfik: 0,6 mio. kr.
Akiliisinnaassuseqarneq
Namminersorlutik Oqartussat akiliisinnaassusaat qaammatini aqqaneq-marlunni kingullerni 885 millionit koruuninit 1.208 millionit koruuninut nikerarsimavoq.
Missingersuutinik malitseqartitsineq Inatsisartunut ilaasortanut nassiunneqarnikoq "isumalluutitsinnut periusissanik pisariaqartunik, politikkikkullu pingaarnersiuilluni aalajangiinissamut sakkussaasoq pingaarutilik", Aningaasaqarnermut Akileraartarnermullu Naalakkersuisoq Erik Jensen erseqqissaavoq.
