Peqqinnissaqarfimmi USA-mik suleqateqalernissaq oqaluuserineqarpoq
Peqqinnissaqarfimmi suleqatigiinnerulernissamut periarfissat misissorneqarnissaat USA-p Kalaallit Nunaatalu Joint Committee aqqutigalugu aalajangerpaat.
Kalaallit Nunaanni, USA-mi Danmarkimilu atorfilittat Washingtonimi ataatsimeersuarnermi peqataapput, tassani suleqatigiinnerup nalilersorneqarnera pivoq
Assiliisoq: Namminersorlutik Oqartussat
Sapaatip-akunnerata siuliani Kalallit Nunaata USA-llu akornanni Joint Committeemi suleqatigiinnermik pilersitsiviulluni Igalikumi isumaqatigiissutip, taassumunngalu nalunaarutip atsiorneranit ukiunik 20-nngortorsiorneq, ataatsimiinnermi malunnartinneqarpoq.
- Nunat akornanni suleqatigiinnerup patajaallisarnissaa, qitiusumillu suleqatigiissutigut akimorlugit ataatsimut anguniakkat suli ineriartortinneqarnissaat siunertaralugu ataatsimiinneq ingerlanneqarpoq, ataatsimiinnernit oktobarip 21-ani 22-anilu Washington DC-mi ingerlanneqartunit ataatsimoorussamik oqaaseqaammi allassimavoq.
- Amerikkami naalakkersuisoqarfiit ingerlatsiviillu arlaqartut Kalaallit Nunaata aallartitanut qaaqqusisuupput, naalakkersuisoqarfiillu tamaasa akuutinneqarnerisigut soorlu takornarialerinerup ineriartortinneqarnissaa, peqqinnissaqarfik, ilisimatusarnernik pilersitseqatigiinneq, ilinniartitaanikkut kulturikkullu paarlaasseqatigiittarneq pillugu suleqatigiinnerullu itisilernissaanik siammasinnerunissaanillu aningaasaliinerillu atasinnaasut qulakkeerneqarnissaat ersersarissarneqarlutik, ataatsimoorussamik oqaaseqaammi allassimavoq.
Siunissami suleqatigiinnermi pingaarnersiuinerit nutaat saqqummiunneqarput, tamatumunngalu atatillugu peqqinnissaqarfiup iluani suleqatigiinnissaq misissorneqassasoq isumaqatigiissutigineqarpoq.
Makku misissorneqarput:
- Niuerneq aningaasaliinerillu
- Nukissiuuteqarneq aatsitassallu
- Ilinniartitaaneq kulturikkullu avitseqatigiinnerit
- Avatangiisit ilisimatusarnerlu
Ataatsimiinnerni takornariaqarneq immikkut ukkanneqarpoq, tassami United Airlinep Nuup New Yorkillu akornanni 2025-p aasaani nutaamik angallavimmik ammaaneratigut "pingaartumik takornarialerinikkut suleqatigiinnerup nukittorsarneqarnissaanut pitsaasumik tunngavissaqarmat", ataatsimiinneq pillugu Naalakkersuisut oqaaseqaatiminni ilisimatitsipput.
- Taamaattumik takornarialerinerup piujuartussamik ineriartortinneqarnissaani nunanit allanit nunatsinniillu aningaasaliissutit sunniutigisinnaasaasa ineriartortinneqarnissaannut suleqatigiinneq qanoq periarfissiisinnaassanersoq ataatsimiinnermi eqqartorneqarpoq. Najukkami suliffeqarfinnut najukkamilu inuiaqatigiinnut iluaqutissat suleqatigiinnikkut annertusarniarneqassapput, ilutigisaanillu avatangiisinut sunniutissat annikillisarniarneqassallutik, Naalakkersuisut allapput.
Ataatsimeersuarnermi kalaallit atorfilittat namminersorlutik oqartussanit nunanullu allanut tunngasunut naalakkersuisoqarfimmeersuupput.
