Peqqinnissaqarfiup spiralilersuisimanernemut paasissutissat ilisimatusartunut tunniukkumanngikkai
Napparsimmaviup inunnut ataasiakkaanut paasissutissaatai pineqartut akuersissuteqartinnagit tunniussineq nipangersimasussaatitaanermut piumasaqaammut unioqqutitsinerusinnaasoq Kalaallit Nunaanni Peqqinnissaqarfik isumaqarpoq.
Ministeriunerup 2023-mi tikeraarneranut atatillugu Nuummi akerliussutsimik takutitsisut.
Leiff Josefsen
Spiralilersuisimanermut suliamut tunngatillugu qulaajaasoqarnissaa Danmarkimi Kalaallit Nunaannilu isumaqatigiissutaavoq. Taamaattumik 2023-mi arlaannaannulluunniit attuumassuteqanngitsumik 1991-imiit, peqqinnissaqarfimut tunngasut Danmarkimiit angerlaanneqarnissaata tungaanut, qanoq pisoqarsimaneranik qulaajaasussamik pilersitsisoqarpoq.
Ukiuni qulikkuutaani 1991-p tungaanut Kalaallit Nunaanni arnat tusindillit spiralilersorneqarput, ilaat akuersissuteqaratik.
Ilisimatusartulli paasissutissanik pisariaqartunik tamanik pissarsiniarnerminni ajornartorsiuteqartarnerat pissutigalugu misissuineq immaqa ilaannakoorsinnaasoq Berlingske allappoq.
– Maannakkut paasissutissat ilaat pissarsiarinissaannut akuersissuteqarpugut, sinnerilu pillugit oqaloqatigiinneq ingerlallun, Nunatta inuisa peqqissusiannik ilisimatusarfimmi ilisimatusartoq Tenna Jensen oqarpoq.
Nipangersimasussaaneq piumasaqaataasoq
Inuit pillugit napparsimmavimmi paasissutissaatigineqartut pineqartut eqqarsaatigalugit tunniunneqarsinnaanngitsut Peqqinnissaqarfimmi pisortaq Tina Amondsen oqarpoq:
– Inuusut qanittukkulluunniit toqusimasut pillugit napparsimmavimmi allattorsimaffiit akuersissuteqaqqaartinnani pissarsiarineqarsinnaanngitsutut nalilerneqarsimapput, tamannami inuit taakkua Kalaallit Nunaanni Peqqinnissaqarfimmut attaveqarneranni nipangersimasussaatitaanermik unioqqutitsinerussammat, Berlingskemut oqarpoq.
Ilisimatusartut ajornartorsiut siusinnerusukkut, tassa juunimi 2024-mi, nalunaarutigaat. Misissuinerallu septembarip aallaqqaataanut 2025-mut kinguartinneqarpoq.
Tamatuma saniatigut Naalakkersuisut 1991-ip kingorna pisimasut qulaajarniarlugit assingusumik suliniuteqarput.
