Syfilis assigiinngitsorpassuartigut ersertarmat »ilaarsillaqqittutut« nalunnginneqarpoq.
Kalaallit Nunaanni nappaatip siaruaannerata suli annertusiartortoq nakorsaaneqarfiup allakkiaani atuarneqarsinnaavoq.
Syfilis assigiinngitsorpassuartigut ersertarmat »ilaarsillaqqittutut« nalunnginneqarpoq.
Kalaallit Nunaanni nappaatip siaruaannerata suli annertusiartortoq nakorsaaneqarfiup allakkiaani atuarneqarsinnaavoq.
- Taamaammat syfilis nunatsinni suli annertuumik atugaavoq sulilu siaruaatilertorluni. Ukiorpanni 2011-i tikillugu nunatsinni syfilis qaqutigooqaaq. Tamatuma kingorna syfilisimik tunillatsittut amerliartulertorput maannalu innuttaasut peqqissusaannut annertuumik ajornartorsiutinngorluni. Nunatsinni syfilisip atugaanera EU-mi/EEA-mi nunani ilaasortani 29-ini agguaqatigiissillugit 44-riaataata missaanik annertuneruvoq, allakkiami syfilisertut 2023-mi 2024-milu nalunaarsorneqarsimasut aallaavigalugit suliarineqartumi allassimavoq.
Syfilisimik siorna tunillatsissimasut katillugit 213-it, inunnut 208-inut agguataarsimasut nalunaarutigineqarput. Ukiup siulianut sanilliullugu appariaateqalaarpoq. Amerlanerit ukioqatigiit 20-t 24-llu akornanni suiaassutsini tamani nassaarineqarput, tassa 25 procenti.
65-it sinnerlugit ukiulinni angut ataasiinnaq paasineqarpoq. 55-illu sinnerlugit ukiulinni angutit tallimat arnallu marluk paasineqarput. Ajornartorsiullu aalajangersimasoq ataaseq allakkiami tikkuarneqarpoq: Syfilisimik tunillanneqarsimasuni nalunaarsorneqartuni ukiukitsut pingasut nassaarneqarput, tassa meeqqat qulit 15-illu akornanni ukiullit.
Aamma sunniutit ilaat qanoq ersersinneqarsimasut allakkiami erseqqissarneqarpoq:
- Syfilisertuni aqqaneq marlunni kinguaassiuutitigut ikeqarneq, marlunni timikkut ikeqarneq nalunaarutini allassimapput, 13-inilu sumi ikeqarneq nalunaarsimanani. Syfilisertuni marlunni kinguaassiuutitigut aniorneqarneq nalunaarutini allassimavoq, sisamanilu sukkut aniorneqarneq nalunaarsimanani.
Angutit angutillu
Kinguaassiuutitigut tunillaattartumik nappaateqartut amerlanersaat Nuummi nassaarineqarsimasut nakorsaanerup ilisimatitsissutigaa – katillugit 69-it; 2022-mut sanilliullugu ikileriarput. Ilulissani 35-iupput, taakkualu amerleriarput. Aasianni aamma amerleriartut. Kalaallit Nunaannili tamarmi tunillaassuuttoqarsinnaavoq, taamaattumillu mianersorneqartariaqarluni.
- Syfilisimik nappaateqartuttut nalunaarutigineqartut pillugit paasissutissat 2023-imeersut naapertorlugit, suiaaqatimik atoqateqarnikkut tunillatsittoqarsimanngilaq. Tassa angutit suiaaqatiminnik atoqateqarlutik tunillatsittoqarsimanngilaq, allakkiami allaqqavoq.
Eqqarsariaallannarpoq. Ingammik Danmarkimut sanilliukkaanni.
- 2021-mi syfilisimik tunillatsissimasut 634-t nalunaarutigineqarput, taakkunannga 73 procentit angutaapput anguteqatiminnik atoqateqartartut, Statens Serum Institut paasissutissiivoq.
Nappaatip malunniutaanut ilaapput ikit manngertut annernanngitsut.
- Ersittumiissinnaavoq soorlu usummi imal. utsuit eqqaanni, aammali inuttaanit malugineqanngitsumiissinnaalluni, soorlu illissap paavani qutsissumi, erlummi iggissamiluunniit. Syfilis nakorsarneqanngitsoq, qaammatip ataatsip marlullu akornanni qaangiuppata aak aqqutigalugu timimut siaruaassinnaavoq, kissarneqalersitsisinnaalluni, niaqorlutitsisinnaalluni, timi tamakkerlugu aniorninititsisinnaalluni ameraasatigullu assigiinngitsunik ersiuteqalersitsisinnaalluni
Syfilisimik tunillaassuunnera usuup puuanik atuinikkut unitsinneqarsinnaavoq, mianersortumik atoqatigiinnikkut, tunillatsissimasutut pasitsaassinikkut misissortinnikkut taavalu tunillatsissimagaanni katsorsartinnikkut. Syfilis aamma anaanamit naartumut tunillaassinnaavoq. Allakkiami erseqqissarneqarpoq syfilisimik tunillatsissimaneq nutaajunersoq imaluunniit siusinnerusukkut syfilisersimanermeersoq (aaqqinnikoq) tamatigut paasineqarsinnaanngitsoq. Syfilisimik tunillatsissimasut tamakkerlugit nalunaarsorneqarsimannginnerat aamma pisimasinnaavoq. Taakku eqqarsaatigalugit kisitsisit isiginiarneqassapput.
