Peqqissutsimut ministerip Kalaallit Nunaannut tikeraarnermini spiralilerneqarsimasunut taarsiinissaq eqqartussavaa
Danskit peqqissutsimut ministeriat Sophie Løhde Kalaallit Nunaannut tikeraarpoq. Peqqissutsimut naalakkersuisup Anna Wangenheimip ataatsimeeqatiginerani Danmarkip Kalaallillu Nunaata peqqissutsimut tunngasuni suleqatigiinnerat eqqartussavaat.
Sophie Løhde Nuummut tikeraarnermi saniatigut Maniitsoq Qeqqatalu Kommuniani nunaqarfik Atammik aamma tikeraassavai.
Assi: Sebastian Elias Uth/Ritzau Scanpix
Danskit peqqissutsimut ministeriat Sophie Løhde (Venstre) ataasinngornermi Kalaallit Nunaannukarpoq. Peqqissutsimut Inunnullu Innarluutilinnut Naalakkersuisoq Anna Wangenheim (D) ataatsimeeqatiginissaa ilaatigut pilersaarutaavoq.
Taanna nunamut namminermut peqqissutsimullu ministereqarfimmit tusagassiuutitigut nalunaarutigineqarpoq.
Ministerit taakkua marluk Danmarkip Kalaallit Nunaatalu peqqinnissaqarfimmut tunngatillugu suleqatigiinneq qanoq pitsanngorsarneqarsinnaanersoq eqqartussavaat.
Aamma spiralilersuineq pillugu suliaq qanorlu taarsiissuteqartoqassanersoq oqaluuserineqassapput. Ministeriuneq Mette Frederiksen (Socialdemokraterne) danskit naalakkersuisui saammaateqatigiinnissamut aningaasaateqarfimmik, ilaatigut arnanut spiralilersuinermut suliami eqqugaasunut taarsiissuteqarfiusinnaasumik, pilersitsiniarnerat septembarimi nalunaarutigaa.
- Arnat aqqusaarsimasatik pillugit oqaluttuaat qanoq uannut sunniuteqarsimanerat oqaasinngorsinnaanngilara. Taamani pisimasut eqqortuliornerunngillat, arnanullu ilaqutariinnullu kalaaliusunut annertuumik kinguneqarnikuullutik.
- Kalaallit niviarsiaqqat arnallu sumiginnagaanikuunerat ajoraluartumik allanngortissinnaanngilarput, akisussaaffilli tigusinnaavarput. Taamaattumik kalaallit arnat utoqqatserfigineqarput tamarmillu immikkut taarsiiffigineqarnissaat danskit naalakkersuisuinit kissaatigineqarluni, Sophie Løhde oqarpoq.
Arnat 1992-ip kingorna akuersiteqqaarnagit naartunaveersaasersorneqarsimasut taarsiivigineqarnissamik qinnuteqarsinnaalersut Naalakkersuisut tallimanngormat nalunaarutigaat.
Danmarkimi katsorsartinnissamut periarfissat pitsaanerit
Sophie Løhdep tikeraarnerani, spiralilersuineq pillugu suliap eqqartorneqarnerata saniatigut kalaallit Danmarkimi katsorsartikkiartortut Danmarkimi peqqinnissaqarfimmi neqeroorutinut periarfissaasa ajornannginnerulersinneqarnissaat, pingaarnertut sammineqassaaq.
Danskit naalakkersuisui Naalakkersuisullu 2026-miit 2029-mut 1,6 milliardit koruuninik aningaasaliisoqassasoq septembarimi isumaqatigiissuteqarput. Aningaasat taakku kalaallinut Danmarkimut peqqissariartortunut aningaasartuutit Danmarkimit akisussaaffigineqalerneranut ilaatigut atorneqassapput.
Aammattaaq peqqinnissaqarfimmi atorfillit pitsaanerusumik qanoq qulakkeerneqarsinnaanerat oqaloqatigiissutigineqassaaq.
- Kalaallit Nunaanni peqqinnissaqarfik annertuunik unammilligassaqarpoq, naalakkersuisullu innuttaasut iluaqutigisassaannik peqqinnissaqarfinnni neqeroorutit ineriartortinnissaat pingaartippaat.
- Tamanna danskit tungaannit tapersersorusupparput. Anna Wangenheimillu Danmarkip Kalaallit Nunaatalu qanoq suleqatigiissinnaanerat pillugu, tassa kalaallit peqqinnissaqarfiannik pitsanngorsaanissamik aamma kalaallit napparsimasut Danmarkimi peqqinnissaqarfimmi ikiorneqarnissaanut qulakkeerinninnissamut, oqaloqatiginissaa qilanaaraara., Sophie Løhde oqarpoq.
Peqqissutsimut ministerip Nuummi Dronning Ingridip Napparsimmavissuanut pulaassaaq. Aamma Nuup avataani peqqinnissaqarfiit qanoq ingerlerat paasisaqarfiginiarlugu Maniitsoq Qeqqatalu Kommuniani nunaqarfik Atammik tikaraassavai.
