Periarfissaq kingulleq: Sulisitsisut takornariaqarnermut inatsisissaq aarleqqutigigaat

Oqaatsit ”tigusinissaq” aamma ”tunngavissiaasoq pineqartoq saneqqullugu” takornariaqarneq pillugu inatsisissami toqqissisimannginnermik nassataqartoq Sulisitsisut isumaqarput. Taakku eqqartuussinerit akisusinnaasut nukkiornarsinnaasullu siunissami pinngitsoortinnissaat pillugit erseqqissaasoqarnissaa piumasaraat.

- Oqariartuutaasoq tunngavigalugu inatsisiliortoqassappat, tassalu tigusinissamik aammalu eqqartuussivikkut misiliisinnaanermik pisoqarsinnaaneq ulorianartorsiutaanngitsoq, taava ilisimatitsissutigisinnaavarput tamanna ilumuunngimmat, Sulisitsisut pisortaat Christian Keldsen Inatsisartut Inuussutissarsiornermut ataatsimiititaliaanut inatsisissaq pillugu saaffiginnissutimini allappoq.

Kingunerisassaa

- Inatsisissatummi siunnersuummi oqaasertaliunneqartuni tigusisoqarsinnaanermik akerliliinermi innersuussutigineqarpoq siunnersuummi tigusisinnaanermik aalajangersagaq. Taamaattumik tamatuma kingunerissavaa suliffeqarfiit pioreersut, 49%-imik qaffasinnerusumik Kalaallit Nunaanni najugaqartuunngitsunik pigineqartut, automatiskimik immikkut ilusiliussamik akuersissusilersinnaanissaat, taamatut iliornikkut piginnittuunermut atatillugu piumasaqaataasut saneqqutaarneqarsinnaasunngorlugit, Sulisitsisut pisortaat ataatsimiititaliamut novembarip 15-iani saaffiginnissutimini allappoq. Sulisitsisut pisortaat Ilisimatuup dr. Jur. Frederik Waage allakkiaanut, ataatsimiititaliami ilaasortanut nassiunneqarnikuusumut, innersuussivoq.

- Kissaatiginartipparput inatsimmut oqaasertaliussani erseqqissumik allanneqassasoq ingerlatsiviit piusut immikkut akuersissummik tunineqarsinnaasut, taamatut iliornikkut paatsuunganartuerutsillugu aammalu inatsisiliortut inatsisitigut inissisimaneq pillugu toqqissisimalersitsisinnaaqqullugit, aalajangiinissat eqqartuussivikkoortussaajunnaarsillugit allatulluunniit allaffissornikkut aalajangiiffigineqarsinnaajunaarlugit, Christian Keldsen naqissusiivoq.

Aningaasat sumut pissappat?

Takornariaqarneq pillugu inatsisissatut siunnersuummi “kalaallit suliffeqarfii nunap avataani najugaqartunit pigineqartut nunamit aningaasanik aniatitsinersut” oqallisigineqarnera Sulisitsisut saaffiginnissutimini imikkoortup aappaani aamma qisuariarfigaat.

- Eqqaasitsissutigissavarput suliffeqarfiit, Kalaallit Nunaanni suliaqartut ingerlanneqartunillu pigisaqartut, Kalaallit Nunaanni CVR-eqarlutik ingerlammata taamaammallu tassa kalaallinit pigineqarlutik, piginnittuusut nunatta avataani najugaqartuugaluarpataluunniit, Sulisitsisut pisortaat allappoq, Sulisitsisullu Kalaallit Nunaanni takornarialerinermik suliaqartut naatsorsuusiaat tamaasa misissorsimagaat innersuussutigalugu. Taamaammallu “Kalaallit Nunaannit aningaasanik aniatitsitsinerat sutigulluunniit takuneqarsinnaanngilaq” allapput.

- Killormulli takuneqarsinnaavoq Kalaallit Nunaanni ingerlanneqartunut aningaasalersuisartut isertitanit amerlanerusunik, taamallu Kalaallit Nunaannut aningaasaliisartut kalaallit soqutigisaat sullillugit, Christian Keldsen naqissusiivoq, Kalaallit Nunaannilu akileraartarnermut malittarisassiat peqqutigalugit sinneqartoorutinik nunamit annissuinissaq kajungeqineqanngimmat sinneqartoorutit Kalaallit Nunaannut aningaasaliissutigeqqittarnerarlugit.

Aningaasarsiat iluaqutaasut

Sulisitsisut pisortaata aamma paasissutissiissutigaa “Kalaallit Nunaanni takornarialerineq tunngavigalugu akileraarutitigut isertinneqartut 70%-ingajai pissarsiarineqartarput ingerlatsivinnit, takornarialerinermut inatsisissap piginnittuunermut malittarisassariligassai peqqutigalugit ingerlatsinissamut akuerineqarsinnaajunnaartussanit.". 

- Ingerlatsiviillu pineqartut aamma takornarialerinermi aningaasarsiaasartut annersaannik tunniussuisuupput, taamaammallu tassaallutik Kalaallit Nunaannut A-skat-imik isaatitsinerpaajusartut. Aningaasat nunatsinni najugaqavissunut ilaqutaasunullu iluaqusiisuullutillu nunatta karsianut nakkaatitsissutaasartut, naqissusiivoq.

Christian Keldsen ataatsimiititaliamut naggasiilluni allannermini ajornartorsiutit marluk tikkuarpai:

- Paatsuuinerussaaq kukkunerussallunilu, Inatsisartut sulissappata isumaqarlutik aningaasanik nunatsinnit aniatitsisoqartartoq kiisalu piusunik tigusisinnaanermut apeqqut siunnersuutigineqartoq aqqutigalugu naggataarutaasumik tamanna aaqqinneqalersoq.

Ilassutitut isumaliutissiissut

Inuussutissarsiornermut Aatsitassanullu ataatsimiititaliap inatsisissatut siunnersuutip pingajussaaneerneqarnissaa sioqqullugu novembarip 18-iani ilassutitut isumaliutissiissummi Sulisitsisut saaffiginnissutaat tiguneqarsimasoq paasissutissiissutigaat.Politikerilli Sulisitsisunut tusaaniarpallaarunanngitsut isumaliutersuummi allassimavoq, taakkumi ima allapput:

- Ataatsimiititaliaq saaffiginnissummut qujarusuppoq, piffissaalatsinerli pissutigalugu saaffiginnissut siunnersuutip suliarineqarnerani isummerfigineqarsinnaasimanngilaq.