Perorsaasoq anaanaasorlu: Kangiamiunik meeqqerivimmi sulisoqarneq toqqissisimatitsivoq
Qeqqata Kommuniani meeqqerivimmi utoqqaallu angerlarsimaffianni kangiamiunik sulisoqalissaaq. Tamanna sulisussaaleqineq aaqqiiviginiarlugu siunniunneqarpoq. Sulilersussat nangilersuinermut, nerisitsinermut aneerussinermullu sulisorineqassapput. Kangiamiunik meeqqerivinni sulisoqalernissaq inuiaqatigiinni oqallisaapput. Nuummi meeqqeriviit ilaanni kangiamiunik sulisoqarpoq. Perorsaasutut ilinniarsimasoq ananaasorlu Sermitsiamut oqaluttuarpoq kangiamiunik sulisoqarneq ajunngitsumik misigisaqarfigalugu.
Børnehaven Tikiusaaq har plads til 96 børn, der er 22 ansatte og der er 6 rummer til børnene.
Foto: Kommuneqarfik Sermersooq
Nuummi meeqqerivimmi Tikiusaami kangiamiunik sulisoqarpoq.
Pipaluk Olsen perorsaasutut ilinniarsimasuuvoq, sisamanillu qitornaqarluni. Taassuma qitornami meeqqeriviani kangiamiunik sulisoqarneq nuannersumik misigaa. Toqqissisimanermik aalajaanngermillu taassumunnga misigititsivoq.
- Aallaqqaammut sulisoqalermat nalorsaatigeqqaarpara, nalorsaataanikuuvoq angajoqqaarpassuarnut. Pipaluk Olsen Tikiusaamiittuutilik oqaluttuarpoq.
Oqaatsit kulturilu aallaqqaammut Pipalummut nalorsaataasimavoq.
- Sulisut maanna amigannginneri angajoqqaatut toqqissisimanarpoq, taavalu kulturitsinnut oqaatsitsinnullu naleqqussarluarniarsarinera aamma toqqissisimanarluni
Oqaatsit aallaqqaammut aporfiusut
Pipaluk Olsen oqaluttuarpoq anaanatut perorsaasutullu ilinniarsimasutut misigisarlugit kangiamiut oqaatsitsinnut kulturitsinnullu naleqqussarniarlutik sukataartuusut. Aallaqqaammut oqaatsitsigut unammillernartoqarsimasoq miserratiginngilaa.
- Ukiorpassuit qallunaat oqaasiinut kulturiannullu naleqqussartariaqartarnikuuvugut. Qallunaat kalaallisut oqalunniarsarisut qaqutigoorput, qallunaanullu kangiamiut sanilliullugit oqaatsitsinnik ataqqinninnerupput. Taamaattumik ullumikkut attaveqaqatigiinniarnerput ajunngilaq.
Aalajaassuseq toqqissisimalersitsivoq
Meeqqerivinni sulisussaaleqineq ukiorpassuarni ajornartorsiutaavoq, Pipaluk Olsenillu oqaasii naapertorlugit aalajaatsunik meeqqerivimmi sulisoqarneq meeqqanut angajoqqaanullu toqqissisimalersitsivoq.
- Angajoqqaatut sumiginnaaqataasariaqartarsimavugut meeqqagut meeqqerivimmut sulisunik amigartunut tunniutissallugit, suliniassagatta.
- Ullumikkut sulisunut aalajaatsunut tunniuttarpagut, tamannalu toqqissisimanarpoq, Pipaluk Olsen sisamanut anaanaasoq, perorsaasutullu ilinniarsimasoq oqarpoq.
