Perorsaasut akissarsiaat pillugit isumaqatiginninniarnerit: - Paasineqarluarnerusutut misigivugut
NPK-p, Namminersorlutik Oqartussat kommunillu perorsaasut akissarsiaat pillugit isumaqatiginninnialertuttorput. Naak NPK-p piumasaqaatitik tamakkiisumik suli angunngikkaluaraat isumaqatiginninniarnerit eqqissisimasumik ingerlasut, NPK-p siulittaasuata oqaatigaa.
- Isumalluarpugut, neriuppugut aamma isumalluarnerput piviusunngortikkumaarlugu, Nunatsinni Perorsaasut Kattuffianni siulittaasoq, Arnaq Brønlund naggasiilluni oqarpoq.
Assi: Leiff Josefsen
Perorsaasut akissarsiakkaanerulissappat? Sulinermi atugaat pitsanngorsarneqassappat?
Nunatsinni Perorsaasut Kattuffianni siulittaasup, Arnaq Brønlundip Sermitsiamut oqaluttuaraa eqqissisimasumik isumaqatiginninniartoqartoq:
- Ingerlarujoorpugut suli maannamut, piumasarisatsinnut tamakkiisumik suli qanillinngilagut. Siornatigorniit paasineqarnerusutut misigisimavugut. Soorlu ilinniakkap suuneri, suliassaqarfiup qanoq isikkoqarnera, inunnik sullisseriaaseq, inatsit kommunillu piumasaqaatigisartagaat. Misigisimavugut paasineqarluarnerulluta illuatungitsinniit.
Annerusumik iserfigerusunngikkai
Akissarsiat sulinermilu atugassarititaasut pitsanngorsarnissaat isumaqatiginninniarnermi anguniakkat ilagisuaannaraat, Arnaq Brønlund oqarpoq. Isumaqatiginninniarnermili suut piumasaqaatiginerlugit annerusumik oqaatigerusunngilai:
- Isumaqatiginninniarnermi akissarsiat atugassarititaasullu annerpaasuaannarput, toqqaannarli suunersut oqaatigisinnaanngikkallarpakka.
Siulittaasorli isumalluarpoq, naatsorsuutigalugulu isumaqatiginninniarnerit sapaatip akunnerani 49-mi naammassiumaartut:
- Isumalluarpugut, neriuppugut aamma isumalluarnerput
piviusunngortikkumaarlugu, Nunatsinni Perorsaasut Kattuffianni siulittaasoq, Arnaq Brønlund naggasiilluni oqarpoq.
