Peter Olsen utoqqatsertoq
IA-meersup Peter Olsenip Kujataani inuussutissarsiortunut ikiorsiissutit itigartinneqarneranni oqaaserisani ajuusaarutigai.
- Ajuusaarutigaara ataatsimiitsitaliami siulittaasutut suliap inernilerneqarnerani paatsuunganartumik oqaaseqarsimagama, Peter Olsen tusagassiutinut nalunaarummi allappoq.
Leiff Josefsen
Kujataani aasaanerani sikorsuaqarnera pissutigalugu umiarsuit takornariartaatit amerlasuut tikinngitsoornerisa kingorna Naalakkersuisut inuussutissarsiortunut aningaasatigut ikiorseerusupput.
Inatsisartulli Aningaasaqarnermut Akileraartarnermullu Ataatsimiititaliaata aningaasaliissutinik tunniussinissamut akuersissummik itigartitsinerata kingorna ikiuiniarneq politikkikkut aporfeqarpoq. Tamannalu ataatsimiititaliap siulittaasuata Peter Olsenip (IA) uggoraa.
Ataatsimiititaliami ikinnerussuteqarnermi saniatigut Peter Olsenip itigartitaanermini oqaatigisani maanna ajuusarutigai.
Ataatsimiititaliap itigartitsinera aalisartunut piniartunullu kinguneqarnissaa Peter Olsenip ernummatigaa, ikiorsiissutiginiarneqartunili aalisartut piniartullu pineqanngillat.
- Ajuusaarutigaara ataatsimiitsitaliami siulittaasutut suliap inernilerneqarnerani paatsuunganartumik oqaaseqarsimagama, tassalu aalisartut piniartullu qinnuteqaammi ilaanngitsut itigartitaasutut ilanngussimagakkit, Peter Olsen tusagassiuutinut nalunaarummi allappoq.
Ataatsimiititaliami siulittaasutut partiiminit oqariartuutigineqartoq oqariartuutigisimagamiuk ajuusaarutigalugu ilanngullugu oqaatigaa:
- Pisut ilinniarfigaakka utoqqatserpungalu ataatsimiitsitaliami sulinermut tamanna aalassassimaarutaalluni pimmat, Peter Olsen allappoq.
