KL

DK

Piaartumik suliaq: Aningaasanik nunanit allanit tapiissuteqartarnerup inerteqqutaalernissaa ataatsimiititaliamut ingerlateqqinneqarpoq

Inatsisartuni partiinut nunanit allanit tapiissutinik inerteqquteqarnissamik siunnersuutip erngertumik suliarineqartup ataatsimiititaliami sivikitsumik suliarineqarnissaa pissutigalugu unitsinneqarallarpoq.

Inatsisartuni siulittaasup Mimi Karlsenip (IA) partiinut nunanit allanit tapiissutinik inerteqquteqalernissamik siunnersuut marlunngornermi saqqummiuppaa.
Thomas Munk Veirum
Tusagassiortoq
Saqqummersinneqarpoq

Inatsisartunut qinersinissap avataanit akuliuffiginiarneqarnissaanut illersorniarlugu inatsisissatut siunnersuut siunertalik Inatsisartut marlunngornermi piaartumik suliaraat.

Partiit nunanit allanit aningaasatigut tapiissuteqarfigisinnaajunnaarsinnissaat siunnersuutip siunertaraa, aamma partiinut inuit tapiissuteqartarnerannut atatillugu arlalitsigut sukaterisoqassalluni.

Nalunaaqutaq 12.15 missaani Inatsisartut ataatsimiinnerat unitsikkallarneqarpoq, tassani Inatsisinik atuutsitsinermut ataatsimiititaliap siunnersuut suliarissammagu.

Ataatsimiinneq nal. 13.30 nanginneqassaaq.

Siunnersuut partiit akornanni tapersersorneqarpoq, Naleqqalli inatsit qanoq paasineqassanersoq apeqquserpaa.

Mimip Naleqqap oqaatigisaa ilumuunnginnerarpaa

Partii naapertorlugu siunnersuut Folketingimit tapiissuteqartarneq inerteqqutigilissavaa.

Taamatut oqarneq Inatsisartut siulittaasuata Mimi Karlsenip (IA) ilumuunnginnerarpaa. Folketingimit Danmarkimilu nunamut namminermut ministeriaqarfimmit tapiissuteqartarneq inatsisissatut siunnersuummi ilaanngitsut oqaatigaa.

Pilersaarutit malillugit siunnersuut Inatsisartuni marlunngornermi pingajussaaneerneqassaaq. Siullermeerneqarnerani ataatsimiinnermi aqutsisup Anders Olsenip politikkerit suliaq pillugu oqallitsinniarlugit ilungersorpoq.

Naleqqap partiinut tapiissutit assigiinngilluinnarnerat, tassami partiit qassinik ilaasortaatitaqarnerannut tunngatillugu tapiissuteqartarneq, naammaginngilluinnarpaa.

Ataatsimiinnermili aqutsisup Anders Olsenip siunnersuut partiinut tapiissutit qanoq annertutigineranut tunngassuteqarani politikkikkut suliniuteqarnermut nunanit allaneersunit aningaasanik tapiisoqartarneranut tunngasoq arlaleriarluni eqqaasitsissutigisariaqarpaa.

Siammasissumik taperserneqartoq

Siullermeerneraniilli siunnersuut tapersersorneqarluanerulersimanera malunnarpoq.

Inuit Ataqatigiit Siumullu siunnersuut taperserpaat, aamma illuatungiliuttut Demokraatit Atassutillu.

- USA-p politikkikkut peqqarniitsuliorpoq. Avataaniit tatiniarneqarpugut – sakkortunerpaamik tatiniarsarineqarluta. Neriuppunga sunniuteqarniarsarineq unitsissinnaagipput. Tamatta akisussaaffigaarput, Atassutip siulittaasua Aqqalu C. Jerimiassen siunnersuut pillugu ilaatigut oqarpoq.

Atassutip siulittaasuata Niuertup tusaamasap Trumpillu suleqataata, Elon Musk, Tysklandimi qinersinermut akuliunnikuunera aamma eqqaavaa.

Kalaallit Nunaat illersorniaraat

Qinisinissap akuliuffiginiarneqarnera arlalinnit aarleqqutigineqarpoq:

- Nunanit allanit pissaaneqartunit Kalaallit Nunaanni tamat oqartussaaqataanerat atorlugu qinersisarnerput sunnerneqarnissaa ernummatigineqarpoq, Doris Jakobsen Jensen (S), siunnersuutip partiimit tapersersorneqarneranik nalunaaruteqartoq, oqarpoq.

Demokraatit siulittaasuata Jens-Frederik Nielsenip oqaaseqaammini USA-p præsidentiata Donald Trumpip oqaasii innersuussutigai:

- Nunarsuarmi pissaanilissuit taamaaliornermikkut paasititsippata, nunatsinnik oqartussaanissamik tigusinissamillu piumassuseqartunik, uppiasutut iliussanngilagut. Immitsinnut illersortariaqarpugut.

- Qulakkeertariaqarparput, politikkikkut isummernigut nunanit allanit aningaasatigut soqutigisat aallaavigalugit sunnerneqassanngitsut, partiinut aningaasaliineruppata imaluunniit politikkerinut ataasiakkaanut isertortumik tapiineruppata, Jens-Frederik Nielsen oqarpoq.

inatsisartut partistøtte donald trump samfund inuiaqatigiit udenlandsk indblanding

ATORFIIT Se alle jobs

Powered by Labrador CMS