- Coronap nalaani
pissutsinut assinguvoq: sorpassuit sungiuttariaqarsimavagut.
Taama oqarpoq
Ilinniartitaanermut Aqutsisoqarfimmi pisortaq Kaali Olsen, taassumalu sulisui
ukiup affaata missaani Nuummi sumiiffinni pingasuni assigiinngitsuni allanik
suliffeqalerlutillu suleqateqalertariaqarsimapput. Tamakku tamarmik najugaqarfigisimasaminni
H.J. Rinksvejimi Kissarneqqortuunnguamilu, oqoqarpallaarneranik pissuteqarput.
- Coronap nalaani
pissutsinut assinguvoq: sorpassuit sungiuttariaqarsimavagut.
Taama oqarpoq
Ilinniartitaanermut Aqutsisoqarfimmi pisortaq Kaali Olsen, taassumalu sulisui
ukiup affaata missaani Nuummi sumiiffinni pingasuni assigiinngitsuni allanik
suliffeqalerlutillu suleqateqalertariaqarsimapput. Tamakku tamarmik najugaqarfigisimasaminni
H.J. Rinksvejimi Kissarneqqortuunnguamilu, oqoqarpallaarneranik pissuteqarput.
Ilinniartitaanermut
Aqutsisoqarfiup illup iluata silaannaanik misissuereernermi oqoqarpallaarnera
paasineqareersorlu immikkoortortani Kissarneqqortuunnguaq 20-miittoq
matuneqartariaqartoq siorna oktobarip aallartinnerani nalunaarutigaa. Illorsuaq
siornatigut cementiliorfiullunilu 1960-ikkunni Nuummi sodavandiliorfiit
siullersarisimasaat ilaatigut aqutsisoqarfiup atorniartarfianut (Siammaavik)
kiisalu uninngasuutinut allaffeqarfimmut naqiterinermullu illuutigineqarsimavoq.
Aqutsisoqarfimmiit nalunaarut assingusoq sapaatip akunneri
marluk qaangiummata, oktobarip-18-iani, saqqummiunneqarpoq. Maanna H.J.
Rinksvej 35-mi illuut, ilaatigut Ilinniartitaanermik Aqutsisoqarfimmit
allaffeqarfigineqartoq, misilitsittarfeqartoq, politikkimik suliaqartunut
immikkoortortaqartoq GUX-imilu sulisunut allaffeqartoq pineqarpoq.
Pingaartumik
pisortaqarfiup illuutaasa matuneqarnerata kingorna piffissami siullermi
nalorninartorsiortoqarsimavoq, aqutsisoqarfiup pisortaa Kaali Olsen
oqaluttuarpoq.
Aallaqqaammut
sulisut amerlanersaat angerlarsimaffimminnit sulisarput. Ilaat Namminersorlutik
Oqartussat allaffeqarfianni ilinniartitaanermut naalakkersuisoqarfimmi
sulitinneqarput, Namminersorlutik Oqartussat aningaasaqarnermut sulisunullu
immikkoortortaqarfiat ASA suleqatigalugu "allaffissanik naleqquttunik
nassaarnissamut piffissaq annertooq atorneqalerpoq."
-
Eqqissiviilliorfiulaarpoq. Aamma qaqugu uterumaarnersugut
nalorninartorsiorfiuvoq, Kaali Olsen oqarpoq.
Pisortat allat
peqatigalugit Inuplan a/s-imit, siunnersuisarfimmit, qanoq oqoqartiginersumik
misissuisussatut suliassinneqartumit, aamma suliffimmik
oqoqarunnaartitsinissamut qanoq iluarsaassisoqartariaqarneranik
misissuisussatut suliassinneqartumit, nalunaarusiat marluk sapaatit-akunnerini
makkunani utaqqivaat.
Ilinniartitaanermut
Aqutsisoqarfiup illuutai kusanarlutillu oqaluttuartassaqaraluarlutik
aserfallatsaaliornissaat ajornakusoorsimasoq Kaali Olsenip isertuutinngilaa.
- Illup iluani
silaannaq pitsaanerpaanngilaq. Immaqa silaannarissaatinik nutaaliaasunik
pilerlugu pitsaanerulersinneqarsinnaavoq, siunnersuuteqarpoq, taarsiulluguli
suut kissaatiginerlugit isertunngilaa:
- Allaffiit
nutaarluinnaat pitsaanerpaassagaluarput.
Ininik
attartorneq akisusoq
Soorlu
eqqaaneqareersoq Ilinniartitaanermut Aqutsisoqarfimmi pisortat ASA-lu
aallaqqaammut sulisunut 40-nit amerlanerusunut ininik naleqquttunik ujaasipput.
Ullumikkut,
qaammatit tallimat qaangiuttut, illoqarfiit pingaarnersaanni sumiiffinni
pingasuni assigiinngitsuni inissisimapput: Aqutsisoqarfiup Pisortatut
Ilisimatusarfimmi allaffiit pingasut Aappaattut Qatserisuni inissiat pingasut,
peqqinnissaqarfimmi sulisunut sanaajugaluartut, sulisulli inissianik
attartornissaannut akisuallaalersimasut, attartorneqarput, tamannalu AG-p
arlaleriarluni allaaserinikuuaa. Pingajuattut Ilinniartitaanermut
Aqutsisoqarfimmi sulisut ilaat Nalik Venturesip Nuummi Issortarfimmi illuaniipput.
Aammattaaq
aqutsisoqarfiup ininik attartornera aqutsisoqarfiup missingersuutaanut
ilimaginngisamik sunniuteqarpoq. Attartuinermut aningaasartuutit 1 million
koruunit missaanniissasut Kaali Olsenip missingerpaa, aningaasallu taakku
aqutsisoqarfiup suliassaanit allanit tiguneqartariaqavissut oqaatigaa.
Ineqarnermullu
aningaasartuutit naatsorsuutiginngisat saniatigut, allaffeqarfiit sumiiffinni
assigiinngitsuniinnerat aamma suleqatigiinnermut sunniuteqarpoq, pisortap
tullia Britta T. Hyldgaard oqarpoq.
- Soorunami
immitsinnut maqaasillutalu avatangiisit sungiusimasavut maqaasivagut.
Eqqissiviinneq nalorninartoqarnerlu attatiinnarneqarunik sullivimmi
avatangiisinut sunniuteqaratarsinnaapput, oqarpoq.