Aatsaat oqallisigineqanngilaq. Tamannali ministerit ilaata uppisinniarneqareernerani Folketingimilu ilaasortap Savalimmiuneersup tamatumani isummersuuteqareernerani oqallisigineqarneruleqqeriaannarlunilu Danmarkimi aatsaat taama sammineqartigaaq.
Tassa oqallisaaqaaq, aviisitigut isummersuuteqarfigineqartarpoq nutaarsiassaqartitsivimmilu TV2 Newsimi aamma sammineqaqaluni.
Aatsaat oqallisigineqanngilaq. Tamannali ministerit ilaata uppisinniarneqareernerani Folketingimilu ilaasortap Savalimmiuneersup tamatumani isummersuuteqareernerani oqallisigineqarneruleqqeriaannarlunilu Danmarkimi aatsaat taama sammineqartigaaq.
Tassa oqallisaaqaaq, aviisitigut isummersuuteqarfigineqartarpoq nutaarsiassaqartitsivimmilu TV2 Newsimi aamma sammineqaqaluni.
Matumani pineqartut tassaapput Folketingimi ilaasortat sisamat Atlantikup avannaaneersut: Danmarkimimi Folketingip Atlantikup avannaaneersunik ilaasortaatitaqartarnera ilumut isumatsialaanersoq – imaluunniit angerlartitaassanersut oqallisaavoq.
Tamatumani oqallinneq Danmarkimi aallartinneqanngilaq, tassami politikerimit Savalimmiuneersumit aallartinneqarpoq, taassumalu tamanna qangali qaqillattaartarpaa, qaqillattaartagaali ulluni makkunani aatsaat taama sammineqartigaluni.
Tamatumani oqallinneq Folketingimi ilaasortap Aaja Chemnitzip qanoq isumaqarfigineraa paasiniarlugu attavigaarput.
- Tamatumani oqallinneq qanoq nalilerpiuk?
- Piffissartornarpoq, pingaaruteqarlunili, taanna AG-mut oqarpoq.
Aaqqissuussineq equngasoq
Ingammik Savalimmiormiu Folketingimi ilaasortaq Sjúrður Skaale paartiimit Javnaðarflokkurinimeersoq tamatumani pissutsinik isornartorsiuisuuvoq – tamatumalu oqallisigineqarneruleqqeriaannaaneranik Danmarkimi aviisit atuartartoqarnerpaasartut ilaanni isummersuuteqarnermigut aallarniisuuvoq.
Skaale Christiansborgimi politikerini oqallorinnerpaanut ilaallunilu isummaminik tunngavilersuillaqqissorsuuvoq. Tamannalu oqallisaarummini atorluarpaa. Taassuma Weekendavisenimi isummersuutini ima qulequtsersimavaa: “Pissaaneqarnera tunngavissaqanngilaq/Oqartussaaqataanera naapertuutinngilaq”.
Folketingip politikerinik Atlantikup avannaaneersunik ilaasortaatitaqartarnera innuttaasut naalakkersueqataanerat tunngavigalugu aaqqissuussineq equngasutut taaneqarsinnaasoq, Sjúrður Skaale isumaqarpoq.
- Inatsisiliortuni ilaasortaavunga qinersisartut uannut qinersisimanngisaannarsimasut sinnerlugit inatsisiliortarlunga, qinersisartulli (Savalimmiormiut, aaqq.) sinniisuuffigisakka sinnerlugit aamma inatsisiliorsinnaananga, taanna Weekendavisenimi isummersuutimini allappoq, naalagaaffeqatigiinnermilu Savalimmiunit Folketingimi ilaasortassanik qinersisoqartarunnaartariaqartoq naggasiissutigalugu.
Weekendavisenip aaqqissuisuata “aaqqissuussineq aamma eqqunganerarlugu” Sjúrður Skaale pingaarnertut allaatigisamini ilalerpaa. Aaja Chemnitzilli Skaale isumaqatiginngilaa, peqataanertimmi sunniuteqartartoq taanna isumaqarpoq.
- Naalagaaffeqatigeeqartuartillugu Folketingeqartuartillugulu naligiittuassaagut, aamma Folketingimi Kalaallit Nunaat sinnerlugu ilaasortaanerput tunngavissaqartuassaaq. Susassaqarfiit Danmarkip Savalimmiuni suli akisussaaffigisai 13-iupput, Kalaallit Nunaannilu 32-ullutik. Suliassani nunatsinnut tunngasuni Danmarkip suli akisussaaffigisaata nunatsinnit tiguneqarnissaasa tungaannut ulluinnarni suleqataanissarput pingaaruteqartoq, Aaja Chemnitz oqarpoq.
Taassuma Folketingimi ilaasortaaqataa Savalimmiormiu Anne Falkenberg Facebookimi ima allappoq:
- Politikkikkut suliani sunniuteqarnissarput pingaaruteqarpoq, inatsisinillu
Savalimmiunut attuumassutilinnik Danmarkimi Folketingimi atortussanngortitsiuartoqartillugu Folketingimi ilaasortaatitaqartuassaagut.
Danmarkip ministeriunera Mette Frederiksen tamatumani oqallinnermut akuliutinngilaq, politikerinilli Kalaallit Nunaanneersunik Savalimmiuneersunillu Folketingimi ilaasortaatitaqarneq pingaartuusoq ukiualuit matuma siorna erseqqissaatigalugu:
- Folketingimi ilaasortat Atlantikup avannaanersut sisamaasut Savalimmiuni Kalaallit Nunaannilu pissutsinut tunngalluinnartunik saqqummiussaqartarmata, Folketingimi sulinermut pingaaruteqarluinnarput, taanna ilaatigut oqarpoq.
Ministerimik uppisitsiniaaneq
Tamatumani oqallinneq Skaalellu tamatumunnga aviisimi isummersuuteqarnera Danmarkimi tusagassiorfiisa silap pissusianut tunngasuni ministeri Lars Aagaard (M) uppisinniarneqareersorlu sammisaloorpaat. Folketingimimi ilaasortat pingasut Atlantikup avannaaneersut ministerip Lars Aagaardip (M) uppisinneqarnissaanik taasinermi danskit naalakkersuisuisa pinngitsoortitsinerannut tapersiipput. Aki-Matilda Høegh-Dam tamatumunnga akuliunniarnani aalajangernikuuvoq.
- Folketingimi ilaasortat Atlantikup avannaaneersut ministerimut tapersersuinertik arlaannik iluaqutissarsiffigisimaneraat tamatuma kingorna isumaliutigineqarpoq. Tamanna ilumoorpa?
- Danskit naalakkersuisui IA-mit tapersersorpagut, qinersinerup kingornali tapersersulerpagut. Tamanna tusarnartaanngilaq. Suleqatigiinnermi tatigeqatigiinnissaq pingaartuuvoq, Aaja Chemnitz akivoq.
Naligiinnerulernissarli ataqqeqatigiinnerunissarlu suli ukkatarineqarnerusariaqartut aamma isumaqarpoq:
- Folketingimi ilaasortat Kalaallit Nunaanneersut pingaannginnerusutut suli isigineqartartut malunnarpoq, taanna oqarpoq nangillunilu: - Folketingimi ilaasortaasuusugut tamatta qineqqusaarsinnaatitaaneq tunngavigalugu qinigaavugut, aamma qinersisivut sinnerlugit politikkikkut sulinermi sapinngisamik sunniuteqarniartussaalluta. Tamanna ilaasortanut Kalaallit Nunaanneersunut Savalimmiuneersunullu aamma atuuppoq.
Naalakkersuisut
Illoriit Frederik aamma Augo Lynge kalaallini siullersaallutik Folketingimut 1953-imi qinigaallutik ilaasortanngornerisa kingornali, politikerit nunatta Christiansborgimi sinniisuutitaat partiitoqaaneersuukkajupput tassaasut, Siumut, Atassut IA-lu.
Tamatumani oqallinneq Naalakkersuisunit aamma malinnaaffigineqartoq, AG-mit siorna ukiukkut oqaluttuaraarput. Tassa Naleqqameersup Pele Brobergip tamatuminnga oqallisiginnereernerani oqaluttuaraarput. Atlantikup avannaaneersunik Folketingimi ilaasortaatitaqartoqassaassanersoq inuiaqatigiinni politikkikkullu itinerusumik oqallisigineqaqqaarnissaa pingaartuusoq, naalagaaffinngornissamut taamanikkut naalakkersuisup Vivian Motzfeldtip erseqqissaatigaa.
- Kalaallit Nunaannut tunngatillugu Kalaallit Nunaanni Namminersornerullutik Oqartussat, kingusinnerusukkullu Namminersorlutik Oqartussat eqqunneqareernerata kingorna Kalaallit Nunaat sinnerlugu Naalakkersuisut isumaqatigiinniarsinnaallutillu sinniisuupput. Inatsisiliornerup tungaatigut Inatsisartut Folketingilu immikkut imminnut aamma atassuteqaqatigiipput. Taamaattumik kalaallit Folketingimi ilaasortaatitaqartarnerannut aaqqissuussinerup oqallisigineqarnissaannut tunngavilersuut Naalakkersuisunit takulluarsinnaavarput. Oqallisigineqarnissaalu Naalakkersuisunit ilassilluarparput, Vivian Motzfeldt taamanikkut oqarpoq.
Susassaqarfiit Naalagaaffimmit Kalaallit Nunaanni suli akisussaaffigisai 30-t missaanniipput.
