Namminiilivinnissamut nunanullu allanut tunngasunut naalakkersuisup Vivian Motzfeldtip marlunngormat unnukkut innuttaasunik ataatsimiititsinissat arlallit siullersaat ammarpaa, tassani inatsisissatut tunngaviusussatut siunnersuut innuttaasunut oqallisigitinniarlugu angalassagami. Ataatsimiinnermi innuttaasut 50-it Nuummi katersortarfimmi katersuupput, nerrivinnut arfinilinnut agguataarlutik issaasimasut.
Peqataasut ilarpassui ulluinnarni politikimik suliaqartuupput, oqallissaarisartut sungiussinerit nerrivinni arfinilinniittunit tallimani oqaaseqarnissamut piffissaliunneqartoq qaangerlugu oqaaseqarput.
Namminiilivinnissamut nunanullu allanut tunngasunut naalakkersuisup Vivian Motzfeldtip marlunngormat unnukkut innuttaasunik ataatsimiititsinissat arlallit siullersaat ammarpaa, tassani inatsisissatut tunngaviusussatut siunnersuut innuttaasunut oqallisigitinniarlugu angalassagami. Ataatsimiinnermi innuttaasut 50-it Nuummi katersortarfimmi katersuupput, nerrivinnut arfinilinnut agguataarlutik issaasimasut.
Peqataasut ilarpassui ulluinnarni politikimik suliaqartuupput, oqallissaarisartut sungiussinerit nerrivinni arfinilinniittunit tallimani oqaaseqarnissamut piffissaliunneqartoq qaangerlugu oqaaseqarput.
Innuttaasut sisamat qallunaatut oqaasillit nerriviit arfernanni issiapput, taakkualu Nunatsinnut namminiilivinnissamut inatsit tunngaviusussatut siunnersuut tusarnaarpaat, oqalliseqataaffiginaguli.
Utaqqineq qaangiuppoq
Oqallisigineqartussaq pingaarneq, Inatsit Tunngaviusussatut siunnersuut, katersortarfimmi saqqumitinneqanngilaq.
Inatsit Tunngaviusussaq pillugu Isumalioqatigiissitap isumaliutissiissutini apriilip 28-anni 2023-mi tunniuppaa, taanna kalaallisut 299-inik aamma qallunaatut 278-inik qupperneqartoq kusanartumik saqqalerneqarsimavoq, eqqumiitsuliortumit Aka Høeghimit suliarineqartumik.
Tassani atuagassat inatsisinut tunngasut oqimaatsut qaammatit 15-it qaangiunneranni paasiuminarnerulersimanngillat aamma nittartakkamik oqallittarfimmik neriorsuutigineqaraluartumik saqqummersoqarsimanngilaq. Aammami inatsisissatut tunngaviusussatut siunnersuut 49-nik paragrafilik Nuummi katersortarfimmi ataatsimiinnermi saqqumitinneqanngilaq, aamma ataatsimiigiartut 50-it ilaasa ikittuinnaat atuarsimassaqqooqqaat. inatsisinut Tunngaviusumik inatsisissatut siunnersuut paragraf
Innuttaasunik ataatsimiititsineq siulleq inatsimmik tunngaviusussamik suliaqarnermi arlalitsigut nutaamik aallartinneruvoq, sulinermi ukiuni arfineq-pingasunngulersuni qaffasissunit taamaallaat ingerlanneqarnerarlugu isornartorsiorneqartarmat.
Kinguaattoornernut amigaatigineqartunullu nassuiaatigineqartut amerlaqaat, Vivian Motzfeldtilli killiliunneqartut oqaatigai.
OQAAATSIT ATAATSIMOORTIPPAATIGUT
Tunngaviusumik inatsisissatut siunnersuut, qaammatit 16-ingajaat matuma siorna tunniunneqartoq, apeqquterpassuarnik ilaqutariinni, suleqatini, kaffillertarfimmi suliffimmilu oqallisigineqartartunik pilersitsivoq.
Naalagaaffik kisimi oqartussaasoq, kiffaanngissuseqarluni peqatigiinneq, naalagaaffeqatigiinneq 2.0?
Kunngeqarfik imaluunniit kunngiitsuuffik?
Ilagiit kalaallit imaluunniit naalagaaffik ilagiinnit oqaasissaqarfigineqanngitsoq?
Kalaallit Nunaanni naalagaaffimmi innuttaassuseqassagaanni suut piumasaqaatigisariaqarpat?
Nuummi Kujataanilu sapaatip akunnerani matumani innuttaasunik ataatsimiititsinerni apeqquterpassuit ilaat marluk oqallisigitinneqassapput.
- Nunatsinni suna ataatsimoorfigaarput; Inuiattut suut assigiissutigaavut?
Nuummi akissut erseqqilluinnarpoq: Oqaatsit ataatsimuulersippaatigut.
- Kulturikkut pingaartitat suut Inatsit Tunngaviusussami ilanngunneqartariaqarpat? Kulturikkut pingaartitat suut illersorniarlugit inatsisissamut ilanngunneqartariaqarpat?
Apeqqut Nuummi oqallisigineqarluarpoq, tamatumanilu akissut tamarmiusoq tassaavoq inuiaqatigiit ammasut, kalaallinik inuiannik pinngortitamillu illersuisut.
Inatsit Tunngaviusussaq pillugu nittartagassami www.tunngavissaq.gl-imi sapaatip akunneri tamaasa apeqqut nutaaq saqqummiunneqartassaaq, tassanilu kikkut tamarmik, nunami sumiikkaluarunilluunniit, oqallinnermut peqataasinnaassapput.
kurt@sermitsiaq.gl
- Innuttaasut politikerit utaqqiinnanngilaat, inatsilli tunngaviusussatut siunnersuut kaffillertoqarnerani ilaqutariillu ataatsimuualaarneranni oqallisigisarlugu. Oqallinneq maanna pisortatigoortumik ingerlatissavarput, tamatumani innuttaasut katersortarfinni ataatsimiitinnerisigut akuutinneqartassallutik, Vivian Motzfeldt Nuummi ataatsimiinnerup kingorna Sermitsiamut taama oqarpoq.
Ima ajortigisoqanngilaq, tamanut iluaqutaanngitsoqassanani.
Kinguaattoornerup kinguneranik innuttaasunik ataatsimiititsinerit suliassap ingerlateqqinnissaanut Inatsimmullu tunngaviusussap qanoq imaqarnissaanut sunniuteqaqataasinnaassapput, Vivian Motzfeldt oqarpoq.
Oqarasuaat angallattagaq eqqaamallugu
Inatsimmut tunngaviusussamut namminiilivinnissamullu isummat assigiinngitsut qilaap ulloriaasut amerlatigigunarput, aqaguli innuttaasunik taasisitsisoqassagaluarpat qanoq inerneqassanersoq ilisimaneqanngilaq.
Nuummi innuttaasunik ataatsimiititsinermi Vivian Motzfeldt aallarniutaasumik taasisitsivoq, inerneralu nittartaganngortussamut katersukkanut ilanngunneqassalluni. Inernerami maanna qanoq isummersortoqarneranut takussutissaassammat.
Innuttaasunik ataatsimiititsinerni peqataasut oqarasuaatiminnut angallattakkamut QR-kode skannissavaat, taamaalillutillu taaseqataasinnaassallutik.
Nuummi ataatsimiititsinermi peqataasut 50-it tamarmik angallattakkamik oqarasuaateqarput.
- Kikkulli tamarmik angallattakkamik oqarasuaateqarnissaat qulakkeersinnaaviuk?
- Suut tamarmik pissusissamittut ingerlanneqassasuuppata nunaqarfiit 54-it illoqarfiillu 17-it tamaasa tikillugit inatsit tunngaviussaq pillugu oqallitsissagaluarpakka, Nunatsinnili isorartoorujussuarmi piviusut taamaanngillat. Inoqatinut attaveqaqatigiittarfiit atorpavut, innuttaasunillu pappiararsorusunnerusunit isummanik aamma katersissalluta, Vivian Motzfeldt oqarpoq.
2034 nallertinnagu namminiilivinnissaq
Nuummi innuttaasunik ataatsimiititsinermi peqataasunit 50-iusunit 25-it oqaraasuaatikkut angallattakkakkut taasisitsinermut peqataapput.
Namminiilivinnissamut apeqqutit pingaarutillit ilagaat namminiilivinnerup qaqugu atuutilernissaannut apeqqut. Nuummilu tamatuma pilertortumik pinissaanut amerlanerussuteqartoqarpoq.
- Nunarput qaqugu naalagaaffinngussava?
52 %: Ukiut 0-10-t ingerlaneranni.
36 %: Ukiut 10-30-t ingerlaneranni.
12 %: Ukiut 30-it sinnerlugit qaangiuppata.
Inatsit Tunngaviusussaq pillugu Isumalioqartigiissitap sorpassuit tikippai, apeqqutilli tamakkerlugit angumerisinnaasimanagit.
- Inatsit Tunngaviussami qulequtaq sorleq pingaarnersaava?
44 %: Naalagaaffinngornissaq.
28 %: Inuinnaat naalakkersueqataanerat.
16 %: Inuttut pisinnaatitaaffiit.
8 %: Inuiaqatigiinni pissaanerup pingasunut avinneqarnera.
4 %: Illersornissamut isumannaallisaanermullu politikki.
Namminiilivinneq assigiinngitsorpassuarnik iluseqarsinnaavoq – kisimiilluni imaluunniit nunat allat peqatigalugit.
Naalagaaffik qanoq ittoq pilersissavarput?
64 %: Nunarput naalagaaffik namminersortoq
20 %: Nunarput Danmarkilu kiffaanngissuseqarlutik suleqatigiittut.
16 %: Nunarput naalagaaffittut naalagaaffimmik allamik suleqateqartoq.
Taavalu apeqqut tunngaviulluinnartoq:
– Nunarput Inatsit Tunngaviusumik peqalissava?
96 %: Aap.
0 %. Naamik
4 %: Taaseqataanngitsut
Nuummi innuttaasunik ataatsimiititsineq 1-imit 5-imut naliliiffiginerani 3,63-imik karakteerilerneqarpoq.
