Piniarsinnaanermut akuersissummik qinnuteqarsinnaanermut malittarisassat nutaat
Piniarnermut akuersissummik nittartakkatigut qinnuteqartoqarsinnaalerlunilu pisat nalunaarutigineqarsinnaalerput.
Sullissivik.gl aqqutigalugu tuttunniarnissamut umimmanniarnissamullu akuersissut qinnutigineqarsinnaalerpoq.
Assi: AP Photo/Igor Novikov
IMMINUT KIFFARTUUSSIVIUP ATORNISSAA IMA IPPOQ
• Periarfissaq tuttunniarnermut umimmanniarnermullu atuuppoq.• Piniarnissamut qinnuteqartarnerit akuersissuteqartarnerillu sullissivik.gl aqqutigalugu qarasaasiaq atorlugu ingerlanneqarsinnaalerput
• Piniartartut piumasaqaatinik naammassinnissimasut pisassat ammanerini sulilu pisassaqartillugu akuersissummik erngerluni tunineqartalissapput.• Pisanik nalunaaruteqartarnerit qarasaasiaq atorlugu sullissivik.gl aqqutigalugu ingerlanneqarsinnaalerputtaaq.
• Piniartartut sullissivik.gl aqqutigalugu akuersissutaatitik tamaasa pissarsiarisinnaalissavaat.
• Piniartartut MitID-imik peqanngitsut sullissivimmut nunaqarfiulluunniit allaffianut saaffiginninnikkut qinnuteqarsinnaapput.
Tuttunniarnissamut umimmanniarnissamullu akuersissutinik qinnuteqarneq maanna ajornannginnerulerlunilu sukkanerulerpoq.
Sullissivik.gl aqqutigalugu qinnuteqartoqarsinnaalerpoq.
Aalisarnermut Piniarnermullu Naalakkersuisoqarfik tusagassiuutinut taama nalunaaruteqarpoq.
Akuersissmmik qinnuteqartut ornigullutik immersuiartortarnerat utaqqisariaqartarnerallu taamaalilluni pinngitsoortinneqarsinnaalerput, tassalu qinnuteqartut piumasaqaatinik naammassinnissimappata piniarfissanilu pisassat killilersugaanngippata akuersissutinik erngerlutik pissarsisinnaalissapput.
Piniarnermut allagartamik pissarsiniarneq eqaannerulernera ilutigalugu pisat nammineerluni nittartakkatigut aamma nalunaarsorneqarsinnaalerput.
Imminut kiffartuunnissamut aaqqiissut nutaaq digitaliseerinerup iluani suliniutinut ilaavoq, pisortat kiffartuussineri innuttaasunut pitsanngorsarneqarlutik.
