Piniartoq nakorsamit kangerlummi passunneqartoq

Marcus Jacobsen Nuummeersoq siorna Kangerlussuarmi ukiumoortumik umimmanniarnermi piniartoqatinilu ilimaginngisaminnik nalaataqarput.

Umimmannik pingasoraarlutik angalaneq iluatsilluartutut aallartippaat, nakorsamilli ikiorneqarnissamik pisariaqartitsileriataarput — tupaallannartumik umiarsuarmit takornariartaammit sanioqquttumit ikiorneqarlutik.

Marcus Jacobsen Savalimmiuneersoq 2007-imiilli Kalaallit Nunaanni najugaqarsimavoq 2014-imiillu Nuummi najugaqarluni. Marcus Jacobsen ukiut tamaasa Kangerlussuarmut umimmanniartarluni angalasarpoq. Siornali umimmannik pisassiissutit nutaat pissutigalugit umimmanniarnissaa taamaatiinnarneqaleraluarpoq.

- Makitsinermi iluatsitsingaarpugut, Marcus Jacobsen oqaluttuarpoq.

- Uanga, nuliara panigalu pisassinneqarpugut, taamaammat ikinngutit marluk neqinik assartuinermi ikiuuttussat ilagalugit aallarpugut.

Aattuinermi ajutoortoq

Umimmanniarneq aallartilluarpoq. Ulloq siulleq umimmaat pingasut pisarineqarput, neqillu ilarujussui umiatsialiaanneqarput. Neqerpassuaqarmalli aqaguani qaqqaliaqqittariaqarput. Tassani ajutoorput. Umimmak kingulleq aattortillugu ikinngutaasa ilaat mikileqqamigut kilerujussuarpoq.

- Umimmak ataatsikkut marluullugu aattorpaat, aappaatalu ajoraluartumik aappani mikileraatigut kilertoorpaa, Marcus Jacobsen nassuiaavoq.

Kilernera aanaangaatsiarpoq, ajoqusertulli nammineerluni nimeriarlugu neqinik aqqussueqataavoq. Umiatsiamulli apuukkami kilernera suli aanaangaatsiarpoq.

Nakorsamit ikiorasuarneqartariaqartoq

Aallaqqaammut umiatsiami unnueriarluni ullaakkuani Nuummukarnissaq pilersaarutaagaluarpoq. Kilerneralu aanaarmat pilersaarutit allanngortikkasuarneqarput.

- Kangerlussuup qeqqaannarsuaniippugut, Marcus Jacobsen oqarpoq.

- Kangerlussuup nunaqarfittaanukarniaraanni imaluunniit Kangaamiuliarniaraanni akunnerit marluk umiatsiatoqassaaq, taakkunanili nakorsamit qanoq ikiorneqarsinnaatiginersugut naluara.

Kangerlussuup nunaqarfittaanukarnissaq aalajangiunneqarpoq, Marcus Jacobsenili apuutinngilaq. Kangerliumanermiit umiatsiamik kisarfigisimasaminnit avalakkami ilisimasassarsiortut umiarsuaat nutaaliaq takuaa. Umiarsuaq erngerluni raatiukkut saaffigaa.

- Umiarsuarmi peqqissaasumik ilaasoqarnersoq aperaakka, Marcus Jacobsen oqaluttuarpoq. Umiarsuarmit utaqqilaaqquneqarput, tassani pigaartup umiarsuup naalagaa, innareersimagaluartoq, ilisimateqqaarniarpaa.

- Minutsit tallimat qaangiummata nakorsamik peqqissaasunillu umiarsuarmi ilaasoqartoq, ikiorniaramitigullu umiarsuut sinaanukaannarsinnaasugut, ilisimatippaannga, Marcus Jacobsen eqqaamasalersaarpoq.

Umiarsuarmi tikilluaqqusaaneq

Umiarsuarmi naalagaq innareersimagaluarluni susoqarnersoq paasiniarlugu “tikeraallu” tikilluaqquniarlugit makissimavoq. Ajoqusersimasoq umiarsuup nakorsiartarfianukaanneqarpoq, tassanilu nakorsap ajoqusersimasup kilernera peqqissaarullugu mersorpaa. Taanna Nuummut tikeqqikkuni nakorsiassalluni oqarfigineqarpoq.

- Pissanganarsaarnissaanut peqqutissaqanngilaq, sumiiffimmili passunneqarnera eqqissiallaataavoq, Marcus Jacobsen oqarpoq.

Kilernera, mikileraani assammiuata nalaarpiaani passukkuminaatsumi inissisimasoq, iluatigut silataatigullu mersorneqarpoq, assaalu ullumikkut ajoquteqanngilaq. Inuaa ullualunni pullappoq, ajoqusersimasorli pisumit annerusumik innarlinngilaq.

- Akiligassinneqanngilagut. Arlaannaalluunniit aningaasanik eqqartuinngilaq. Ikiorsinnaagamitigut nuannaarutigiinnarpaat, Marcus Jacobsen naqissusiivoq.

Taamaattoqareersoq Nuummut angerlaqqinnermi aqqutaa atoruminarnerungaarpoq.

- Ajunngitsoq paasivarput, Nuummullu angerlarniarluta tuaviortariaaruppugut. Ingerlaqqinnginnitsinni sineqqaarsinnaavugut, Marcus Jacobsen nassuiaavoq.

Umiarsuit asimiinnermi iluaqutitut

Umiarsuarmut ilaallutik takornariartut napparsimasut Kalaallit Nunaanni peqqinnissaqarfimmut aningaasartuutaanerat siorna aasakkut oqallisigineqangaatsiartoq atuartartorpassit eqqaamassagunarpaat. Oqallinnerlu taannapiaq pillugu Marcus Jacobsenip misigisani AG-mut oqaluttuarerusulerpaa.

- Arlaatigut iluaqutigisinnaallugit eqqarsaatigisariaqaripput isumaqarpunga, Marcus Jacobsen tunngavilersuivoq.

- Eqqatsinni umiarsuaqarnera uagutsinnut iluaqutaangaatsiarpoq, allanullu aamma iluaqutaaratarsinnaavoq. Suulluunniit avataaneersut ajoqutitut isigisariaqanngilagut.