Pinngitsaaliilluni arneriffiginnittup illersuisuata politiit suliaat isornartorsiorpaa

Kalaallit Nunaanni Eqqartuussivimmiippugut, politiiusimasoq, niviarsiaqqanut pingasunut katillugit 18-eriarluni kinguaassiuutitigut innarliisimasutut, ilaatigut arlaleriarluni pinngitsaaliilluni arneriffiginnittutut, unnerluutigineqartumut, suliaq malinnaaffigilugu.

Tamanna ukiuni arfineq-marlunni pineqaatissinneqarsimasunut inissiisarfimmiittussanngortitsinermik kinguneqartariaqartoq, unnerluussisussaatitaasoq Anne Meulengracht isumaqarpoq.

Illersuisup nassuerutigaa unnerluutigineqartoq ilaatigut eqqunngitsumik iliortarsimasoq. Politiusimasuusimasup nammineq nassuerutigaa niviarsiaqqat ilaat, taamani 14-inik ukiulik, isumaqatigiinneq tunngavigalugu arneriffigisarsimallugu. Inatsit nutaaq malillugu tamanna pinngitsaalilluni arneriffiginninnertut pineqaatissiissutaasussaasoq, allaaserisani siuliini nassuiareerparput.

Aamma niviarsiaraq 15-inik ukioqalereersoq arneriffigisarsimavaa, taassumalu arneriffiginerani tassunga immikkut ittumik inissisimaffeqarsimavoq.

Suliaq isinik allanik isigalugu

Illersuisorli isumaqarpoq pisut arlallit unnerluussisup oqaatigisaanit allaanerusut.

Ilaatigut isumaqarpoq niviarsiaqqat ilaata allaqatigisarsimanerani takussutissaqartoq arnerisimaneq pinngitsaaliinertut taaneqarsinnaanngitsoq.

Finn Meinelilli pineqartut iliuuserisimasai kisiisa oqaasertalinngilai. Aammali pineqartut killisiorneqarneranni periuserineqarsimasoq apeqquserneqartariaqartoq, oqarpoq.

- Suliami aalajangiussereersimasutut nipeqarluni suliamut tunngatillugu killisiuinermik taama aallartittoqartillugu siornatigut tusarsimanngilanga. Tamanna ajorluinnarpoq.

Finn Meinelip ilaatigut isornartorsiorpaa niviarsiaqqat ilaata videokkut immiullugu killisiorneqarnermini politiinut oqaatsini uteqqilligut asserpiaanik oqaluttuarnissaanik politiinit kaammattorneqarsimasoq.

Niviarsiaqqap pingajuat, qanillattorniarneqarsimasoq pillugu, Finn Meinelip oqaatigaa niviarsiaqqap eqqartuussivimmi ataasinngornermi nassuiaanermi nalaani anaanani attaveqarfigisaraa.

Tamanna pissutigalugu eqqartuussisup anaanaq panimminit ungasinnerusumi issiaqqusariaqarsimavaa. Tamanna nassuiaasup tatiginassusaanik apeqqusiinermik kinguneqartariaqartoq, illersuisoq oqarpoq.

Pineqaatissiissut sakkukinnerusariaqartoq

Finn Meinel naapertorlugu pineqaatissiissut ukiunit marlunnit sivisunerusariaqanngilaq. Tamatuma kingorna unnerluutigineqartoq nammineerluni aamma oqaaseqartinneqarpoq:

- Arlalinnik eqqarsaateqartarsimavoq. Kukkussuteqarsimavunga (niviarsiaqqap aappaata aqqa taavaa, aaqq.) Tamatumunnga akisussaaffik tiguara. Taassumalli oqaasii takunnissimasut arlallit nassuiaanerminni illuatungilerpaat.

Unnerluutigineqartup nammineerluni aamma politiit sulinerat isornartorsiorpai. Taassuma nammineerluni salluliuutigineqarsimasut politiinit misissorneqassasut piumasaqartarsimagaluarpoq, iluatsinngitsumilli, oqarpoq.

Niviarsiaq sivisunerusumik attaveqatigisimasani pillugu ima oqarpoq:

- Ukiuni qulini politiitut sulininni pinngitsaaliilluni arneriffigineqartut amerlasuut, inersimasut meeqqallu, pillugit suliaqartarsimavunga. Ataasiaannarlungaluunniit takusaqarsimanngilanga pinngitsaalineqarsimasup pinngitsaaliisorisaminut qanilleqqikkusunneranik, unnerluussaasoq oqarpoq.

Politiit paasiniaasartui isornartorsiorpai niviarsiaqqap imminut isiginnittaasianut sunniiniarsimanerat pillugit, ilaatigut unnerluutigineqartoq psykopatiunerarlugu oqarsimanerat pillugu.

Retsformand Mette Søndergaardip suliaq eqqartuussivimmi ingerlappaa, marlunngornermilu ualikkut eqqartuussineq naammassineqassaaq.