Pinngitsuuisinnaajunnaarnermut katsorsartilertartut amerliartorput

Imigassamik, hashimik aningaasanoornermillu pinngitsuuisinnaannginnermik katsorsaasarfimmi Allorfimmi katsorsartinniarlutik saaffiginnittartut amerlanerpaat imigassamik ajornartorsiuteqarneq suli ajornartorsiutaanni initunersaavoq.

Allorfik 2023-mi ukiumoortumik nalunaarusiaminik saqqummiussaqaqqammerpoq, innuttaasunillu 801-inik katsorsaanissamik Allorfik innersuussisimasoq tassani takuneqarsinnaavoq. Amerlanerit 25-44-nik ukiullit innersuunneqarsimasut, arnallu (57 %) angutinit (43 %) amerlanerusut, ukiumoortumik nalunaarusiami allassimavoq.

Innuttaasut innersuunneqartut ilarpassui imigassamik, hashimik aningaasanoornermillu ataasiinnaanngitsumik ajornartorsiuteqarput. Allorfik ima eqikkaavoq:

• Aanngajaarniummit - aningaasanoornermillu ajornartorsiummut sanilliullugu imigassamut katsorsartinnissaq suli noqqaassutaagajunnerpaajuvoq.

• Imigassamik ajornartorsiuteqarnerup saniatigut hashimik ajornartorsiuteqartut 36 %-iupput

• Hashimik ajornartorsiuteqartut imigassamittaaq ajornartorsiuteqartut 79 %-iupput

• Aningaasanoornermik ajornartorsiuteqartut hashimittaaq ajornartorsiuteqartut 21 %-iupput

• Aningaasanoornermik ajornartorsiuteqartut imigassamittaaq ajornartorsiuteqartut 78 %-iupput

Naammassinnittartut ikileriarnerat ernumassutaasoq

Katillugit 43 %-it katsorsartinnertik naammassivaat, 40 %-it taamaatippaat 17 %-illu katsorsartinnertik suli ingerlallugu.  2022-mut sanilliullugu katsorsarneqarsimasut ikileriarsimasut, tamannalu ernumanartoq, Allorfik inerniliivoq.

'Innuttaasut pisariaqartitaat assigiinngitsorpassuit katsorsartinnermi isumaginninnermillu aaqqissuussinermi ataatsikkut isumagiuminaatsinneqarnerat' naammassinnittartut ikileriarnerinut ersiutaagunartoq Allorfik naliliivoq.

Ukiut tallimat ingerlaneranni affaat ikiortissarsiortarput

Innuttaasut najugaqarfigisaannut qanittumi katsorsaasoqartarnissaanut periarfissanik ataavartumik neqeroortoqartuartartoq, Allorfik erseqqissaavoq.

2023-mi innuttaasut katsorsartilersut 87%-ii illoqarfigisaminni katsorsarneqarlutik aallartissinnaasimapput.

- Siunissaq ungasinnerusoq eqqarsaatigalugu innuttaasut amerlanerit katsorsartinnissaminnik siusinnerusukkut toqqaasarumaartut neriuppugut, Allorfiup pisortaa, Efraim Olsen, oqarpoq.

2023-mi innuttaasut pinngitsuuisinnaannginnerminnik  katsorsartittut affaat ajornartorsiuteqalernerminnit ukiut tallimat qaangiunneranni katsorsartinniarlutik qinnuteqarput.