Pinngortitaleriffik: Kalaallit Nunaanni orpilersuineq silap pissusianut iluaqutaanavianngilaq - ajoqutaaginnassaarli
Kalaallit Nunaanni orpilersuinerup nunarsuup kissatsikkiartorneranik unikaallatsitsinani sukkanerulersitsisinnaanera Pinngortitaleriffiup mianersoqqussutigaa.
Foto: Kommune Kujalleq
Issittumi orpilersuineq nunarsuup kissatsikkiartorneranik unikaallatsitsinani sukkanerulersitsisoq misissuinerup nutaap takutippaa.
Misissuineq atuagassiami Nature-mi saqqummersinneqarpoq, ilisimatusartullu Pinngortitaleriffimmit, Aarhus Universitetimit Cambridge Universitymillu misissuisimapput.
Tamanna ilisimatuussutsikkut ukiorpassuarni ilisimaneqareersoq Pinngortitaleriffik nittartakkamini allappoq, taamaakkaluartoq silap pissusiata allanngoriartornera annikillisinniarlugu orpilersuinermik suliniutit nunani issittuni, ilaatigut Kalaallit Nunaanni, ingerlanneqartalersimapput.
Pinngortitaleriffiup tamanna pingasunik pissuteqarnerarpaa.
Issittummi orpiliassat annikinnerujussuarmik qaamanermik utertitsiffiusarpoq
Siullertut Issittumi nunat orpeqarfiunngitsut nunarsuatsinni orpeqarfinnit tamanit annertunerpaamik kulstofimik iioraasuupput, issorlu orpilersorneqarnermigut akorngusersorneqassaguni innarlerneqarnerusinnaavoq, orpiillu sorlai ammut ingerlaartussaassallutik.
Aappaattut orpiliassanik orpippassuaqarfik issittup nunaani orpeqanngitsumi apummit qalleqqasuminngarnit pingajorarterutaanik-sisamararterutaanik annikinnerusumik qaamanermik utertitsiffiusarpoq.
Pingajuattullu, assersuutigalugu nunami ikuallattoqaraangat panernersuaqaraangalluunniit naasut toqusarput:
- Orpik naatitaq inerikkaluaruniluunniit orpeqarfiunissaminut akornguseruminarnerusarpoq, kulstoffilu iiorarsimasaa piffissaanngitsukkut silaannartamut anillaqqinnissaa pisinnaasarluni, Pinngortitaleriffik nittartakkamini allappoq.
