KL

DK

Pipaluk Lynge (IA): Trumpip pilersaarutaanut tunngatillugu naalakkersuisunik siunersiuinissaq pilersaarutigineqanngilaq

Naalakkersuisut siulittaasuat piffissami nalorninartorsiorfiusumi, Amerikami præsidentinngortussap, Donald Trumpip Kalaallit Nunaata pigilernissaanik aqulernissaanillu piumasaqarnerata kingorna, kalaallit inuiaqatigiinni ataatsimoornissamut kaammattuivoq. Kisianni qanoq ataatsimoornissaq piviusunngortinneqassanersoq suli pilersaarutigineqanngilaq. Nunanut allanut sillimaniarnermullu ataatsimiititaliap siulittaasua, Pipaluk Lynge (IA) oqarpoq, ataatsimiititaliap Naalakkersuisut siunersiorneqarnissaanik pilersaaruteqanngitsut.

Inatsisartut Nunanut allanut sillimaniarnermullu ataatsimiititaliaata siulittaasua, Pipaluk Lynge (IA) oqaluttuarpoq ataatsimiititaliap ilaasortai ataasiakkaarlutik namminneq oqariartuuteqarnertik aqukkaat, aammalu pilersaaruteqartoqanngitsoq inuiaqatigiinni ataatsimoorneq qanoq pilersinneqassanersoq.
Jensine Berthelsen
tusagassiortoq
Saqqummersinneqarpoq

Piffissami matumani nuna qajannartumik inissisimavoq Kalaallit Nunaata pigilernissaanik aqutarinernissaanillu Trumpip pilersaarutai eqqarsaatigalugit.

Pingaartumik ilisimaneqanngimmat taassuma præsidentinngortussap pilersaarutai qanorpiaq ittuunersut, taamaallaalli ilisimaneqarmat inuttaata naammineq uppernarsareeraa ilumut Kalaallit Nunaat pigilerniaraluarlugu aqulerniarlugulu siunertaqarluni, amerlasuut nittaattumi umerniarsarisutut illutik pisut pillugit isummaminnik saqqummiussisarput.

Oqaatsit Qupanuk Olsenimit Politikenimi

Qanorluunniit ikkaluarpat ulluni makkunani nunarsuarmi tusagassiorfinnit kalaallinik Kalaallit Nunaanneersunik oqaaseqartitsiniarlutik ujartuinerat imaaginnavippoq. Tamatuma kingunerisaanik, innuttaasut ataasiakkaatut arlalippassuit isummersortinneqartarput, aamma nalorninartoqaraluartoq, ilumut kalaallit inuiaqatigiit ataatsimoorussaannut sanilliullugu oqariartuutitik naapertuunnersut.

Assersuutigalugu YouTuberi Qupanuk Olsen nunarsuaq tamakkerlugu hundredetusindilikkaanik malinnaasoqartoq  politikilerissalluni toqqaasimavoq, tassanilu Danmarkimut sakkortuumik isornartorsiulluni oqaaseqartarpoq, assersuutigiinnarlugulu taassuma Danmarkimi tusagassiorfinni assigiinngitsuni oqaatigaa Danmark nunarsuarmi nunap assingani peerneqassasoq, Kalaallit Nunaat Trumpip USA-anut ilanngutissappat.

Taamaattoq taamak isummersornera kalaallit sinnerlugit isummersornerua? Taamanna misissorneqarnikuunngilaq. Kisianni kalaallit qallunaallu akornanni  oqallinneq sakkortoorujussuaq tusagassiuutit piusut aamma inuit attaveqaqatigiittarfii aqqutigalugit ingerlanneqartoq pilersitseqataaffigaa peqataaffigalugulu.

Ataatsimoorneq qanoq pilersinneqassava?

Illuatungaani Naalakkersuisut siulittaasuat, Múte Bourup Egede (IA) inuiaqatigiinni ataatsimoornissamik kaammattuuteqarpoq, kisianni qanoq ataatsimoorneq pilersinneqassava tigussaasumillu piviusunngortinneqassava?

Inatsisartut Naalakkersuisutillu namminneq piumassuseqarpat inuiaqatigiinni ataatsimoorneq pilersissallugu siuttuuffigissallugulu, pingaartumik piffissami ernumanartorsiornermik pilersitsiffiusumi?

Sermitsiamit paasiniarparput, Naalakkersuisut qanoq pilersaaruteqarnersut Inatsisartuni aammalu kalaallit innuttaasuisa akornanni ataatsimoornissaq pilersissinnaajumallugu, assersuutigiinnarlugumi danskit ministeriunerata ullumi kingusissukkut, danskit folketingimi partiivi ataatsimiigiaqqunikuuai ulluni makkunani pisunut tunngatillugu.

Folketingimi ilaasortaq Aaja Chemnitz (IA) TV2-mut ilisimatitsivoq, ataatsimiinnissamut qaaqquneqarsimalluni, kisianni qaaqqusineq ilaasortaqatiminut sanilliullugu aatsaat kingusinnerusukkut pisimasoq, aammalu statsiministerimut apeqquteqaqqaartariaqarsimalluni, sooq qaaqquneqarsimannginnerminik  tupigusuuteqarnerminik apuussereerami.

Inatsisartummi qanoq pissappat? Naalakkersuisut siulittaasuata pilersaarutigaa kalaallit Inatsisartuini partiit ataatsimiigiaqqunissaat? Tamatuma akissutaa suli pissarsiarinngilarput.

USPU siunersuinissamik pilersaaruteqanngilaq

Paarlattuanik Inatsisartuni nunanut allanut sillimaniarnermullu ataatsimiititaliap siulittaasua, Pipaluk Lynge (IA) pissarsiaraarput, taannalu aperaarput ataatsimiititaliap Naalakkersuisut siunersiussamaarneraat:

- Naamik, siunersiuinissamut Naalakkersuisut qaaqqunissaat pilersaarutiginngilarput, aalajangerpugut, (ataatsimiititaliap ilaasortai, aaqq.) nammineerluta tusagassiorfinnit apeqqutigineqartorpassuarnut akissuteqartassalluta, namminneq isumarput naapertorlugu, USPU-p siulittaasuata, Pipaluk Lynge (IA), akissuteqarpoq.

Nammineq Danmarkimut EU-mullu suleqatiginninneq toqqarpaa

Pipaluk Lynge nammineq Naalakkersuisut siulittaasuata ataatsimoornissamik oqariartuutaanut isumaqataavoq, tassa pingaaruteqartoq inuiaqatigiinni kalaallit ataatsimoortariaqartut, kisianni qanoq ataatsimoorneq pilersinneqassanersoq, aammalu Inatsisartut Naalakkersuisullu ataatsimoornissamut qanoq siuttuusinnaanersut, suli akissutissaqanngilaq.

Taamaakkaluartoq, nammineq isummani saqqummiunnissaanut tunuarsimaanngilaq. Taassuma erseqqissaatigaa Kalaallit Nunaat sakkulersorfiussanngitsoq aalajangiusimaneqartariaqartoq, aammalu Kalaallit Nunaat Danmarkimut EU-mullu suleqatigiinnerup qanittup attatiinnarnissaa qulakkeersimasariaqartoq:

- Kissaatigaarput Issittoq eqqissisimasuussasoq, akersuunnerit annertusarneqarnissaat kissaatiginngilarput. Isumaga malillugu ersippoq, naleqartitagut Europamut naleqqiullugit eqqaanarnerusut, soorlu LGBTQ, arnat meeqqallu pisinnaatitaaffii, silap pissusianut anguniakkat aammalu inuiaqatigiinni isumannaatsuunissaq pillugit isumaqatigiippugut. Suleqatigiinnerup naligiissumik ingerlaannarnissaa kissaatigaarput, nunap allap ataaniilernissarput kissaatiginngilarput, nunanut allanut sillimaniarnermullu ataatsimiititaliap siulittaasua, Pipaluk Lynge (IA) oqarpoq.

samråd samfund donald trump udenrigs- & sikkerhedspolitik inuiaqatigiit naalakkersuisut pipaluk lynge

ATORFIIT Se alle jobs

Powered by Labrador CMS