Pisiniarfittaap ammarnissaanut inuppassuit siuleriiaattut

Suliniut ukiuni arlalinni suliarineqarpoq, sapaatip-akunneranilu matumani ataasinngornermi Brugseni Natalie nutaarluinnaq pisisartunut siullermeerluni ammarneqarpoq.

- Pisiniarfik nutaaq ullumi ammarneqartoq tulluusimaarutigeqaarput, pisortaaneq Allan Kristoffersen tusagassiorfinnut nalunaarummi oqarpoq.

Brugsenip Butik Nataliep illutaani pisiniarfik 2019-imi ammarpaa. Butik Natalie 1990-ikkut aallartinneranni sananeqarpoq Svend Give Olesenillu namminersortumik niuertutut ingerlanneqarluni. 2019-imilu januaarip aallaqqaataani pisiniarfini Kalaallit Nunaanni Brugsenimut tunivaa.

Brugseni pisiniarfitoqqap saniani pisiniarfissuarmik nutaarluinnarmik maanna sanasimalerpoq, pisortaanerlu Allan Kristoffersen ataasinngornermi ullaap tungaani ammaanersiornermi peqataavoq. Pisisartut ilaasortallu hunnorujukkaat aamma ammaanersiornermi peqataapput:

- Brugseni Natalietoqaq ukiorpaalunni ingerlalluarpoq, tamaani pisiniartartunut ilaasortaasunullu sullissilluarsimalluni.

- Pisiniarfiuvoq siuariartorfiujuartoq, taamaattumillu maanna tulluusimaarluta pisiniarfik nutaarluinnaq nutaaliaalluinnartorlu siunissami suli angusaqarfiulluarnerusussaq saqqummiupparput, Allan Kristoffersen oqarpoq.

Pisiniarfitoqaq isaterneqartussanngortoq Brugsenip nalunaarutigaa. Pisiniarfittaamilu nutaami Jørgen Hammond aqutsisutut ingerlaannassaaq.

- Jørgen Hammond Uummannarmiuuvoq, pisiniarfimmiutullu sulinermini Brugsenimiunerusoq tullersortitut, immikkoortortami aqutsisutut, nerisassanut pisortatut sulisarsimalluni maannalu niuertarfimmi aqutsisutut, Brugseni allappoq.