BORGMESTERI STINE EGEDE (IA)
- Pisoq pimoorullugu sulisoqarpoq
Kommune Kujalleq maanna naatsorsuutinik allaqqunneqarsinnaanngitsumik misissuileruttorpoq,
misissuinerillu kingorna borgmesteri kommunip illoqarfiini pingasuusuni innuttaasunik
ataatsimiisitsissaaq.
Kommune Kujallermi bormesteri, Stine Egede (IA) naqissusiivoq pitsanngorsaanissamut aamma aningaasaqarnermut aqutsinermik nukittorsaanissamut suliaqartoqartoq.
Assi: Kommune Kujalleq
Kommunalbestyrelsip aalajangernerata kingorna kommunip akiliutigeriagaannagassatut atugaasa amerlinissai pillugit inuit attaveqartarfiini assigiinngitsunik oqariartuuteqartoqarsimanera tunngavigalugit erseqqissaanissaq pisariaqalersimavoq, Kommune Kujalleq tusagassiuutitigut nalunaarummini allappoq.
Iluarsiinissamut pilersaarut suliarineqarpoq
- Uannut pingaaruteqarpoq oqaatigissallugu aningaasaqarnermi inissisimanerput pillugu pimoorussilluta sulinerput, kommunillu Aningaasaqarnermut Naalakkersuisoqarfik aningaasaqarnermut iluarsiinissamut pilersaarut pillugu attaveqaqatigigaa, borgmesteri Stine Egede (IA) oqarpoq nangillunilu:
- 2023-mut 2024-mullu naatsorsuutit tamakkiisumik takulluarsinnaalerumallugit misissortariaqakkat kommunip maanna ingerlatileruttorpai, taamaasiornikkut aningaasaqarnermik aqutsinermi politikkikkut suliniutinik ingerlatsisoqarsinnaaniassammat.
Aningaasaqarnermut ataatsimiititaliaq, kommunalbestyrelsi innuttaasullu ataatsimeeqatigineqassapput
Aningaasaqarnermut ataatsimiititaliaq juunip qulingani immikkut ittumik ataatsimiissaaq, tassanilu ataatsimiititaliaq killiffimmik iliuusissatullu pilersaarutinik ilisimatinneqassaaq.
Aningaasaqarnermut ataatsimiititaliap ataatsimeereernerata kingorna kommunalbestyrelsi aggersarneqassaaq, tamatumalu kingorna juunip ingerlanerani Narsami, Nanortalimmi Qaqortumilu innuttaasunik ataatsimiisitsisoqarumaarluni, Kommune Kujalleq nalunaarpoq.
