Pisortaasimasoq, Naalakkersuisunut ilaasortaasimasoq naalakkersuisoqarfimmilu pisortaq ilisimannittutut apersorneqartut

OBS: Allaaserisami siullermik allaqqagaluarpoq Gujo Thorsteinssonip Lars Møller-Sørensen ikinngutimisut isigigaa. Tamannali eqqortuunngilaq. Ikinngutigiinngillat, allaaserisamilu oqaaseqatigiit peerneqarput.

Kommuneqarfik Sermersuumi pisortaasimasumut Lars Møller-Sørensenimut politikkeriusimasumullu nuimasumut Lars-Emil Johansenimut suliami Kofoeds Skole qitiusutut inissippoq.

Tasiilami Kofoed Skolep immikkoortortaqarfianik pilersitsinissamut Lars-Emil Johansen siunnersortitut atorfinitsinneqarsimasoq illersuisup suliami siusinnerusukkut erseqqissarpaa.

Unnerluussisussaatitaasup Lars-Emil Johansen ukiuni marlunni 730.000 koruunit missaannik aningaasarsisimasoq, naak suliaqarsimanani, unnerluutigaa.

Gujo Thorsteinsson, siornatigut Nuummi Kofoeds Skolemi pisortaasimasoq maannalu soraarneq, marlunngornermi ualikkut ilisimannittutut apersorneqarpoq.

Unnerluussisussaatitaasumit Bo Bjerregaardimit aperineqarami ilisimatitsivoq Lars-Møller Sørensen ilisarisimallugu aammalu Lars-Emil Johansen ukiut 30-t missaani ilisarisimallugu ikinngutigalugulu.

Illersuisut Lars-Emil Johansen Tasiilami suliniummut qanoq akuusimanersoq pisortaasimasoq aperaat, pisortaasimasullu Lars-Emil Johansen suleqataasimasoq uppernarsarpaa.

Gujo Thorsteinssonip Lars-Emil Johansen Tasiilameeqatigisimallugu oqaluttuaraa. Aningaasartuutai Kofoeds Skolemi pisortatut akilerneqarput, ilimagaalu Lars-Emil Johansen kommunimit akiliunneqarsimassasoq, qanorli pisoqarsimanersoq ilisimalluarnagu. Aamma Danmarkimeeqatigiissimapput.

Lars-Emil Johansen atornerluisunik katsorsaariaatsinik ilisimasaqarnini pissutigalugu suliniummi peqataasoq Gujo Thorsteinssonip isumaqarpoq, tamatumali saniatigut Lars-Emil Johansenimik ataatsimeeqateqarnerminik eqqaamasaqanngilaq.

Vittus Qujaukitsoq ilisimannittutut apersorneqartoq

Apersorneqartup tullia tassaavoq Vittus Qujaukitsoq. Taanna Siumumi Naalakkersuisunilu ilaasortaanikuuvoq.

Lars-Emil Johansen kommunimut sinniisuutillugu oqaloqatigisimaneraa aperineqarpoq.

- Naamik, imminut sinnerluni saqqummertartutut nalunngilara, Vittus Qujaukitsoq akivoq.

Illersuisup Ulrik Blidorfip angutit taakkua marluk Kofoeds Skole, KommuneKredit pillugu aamma ineqarnermut suliamut tunngatillugu akunnerminni oqaloqatigiittarsimanersut apeqqutigaa:

- Kofoeds Skole pillugu. Aningaasaqarnermut naalakkersuisutut atugarliortut atugaat soqutigilluarpakka (...) KommuneKredit pillugu aamma oqaloqatiginikuugunarpara. Kommunenut aningaasanik atortitsisartut Kalaallit Nunaannut ilanngunnissaa pillugu eqqartuussissuserisunik suliaqartitsinikuuvunga, Vittus Qujaukitsoq oqarpoq.

Kommunekredit pillugu oqaloqatigiinnerit naalakkersuisoqarfiup pisortaata eqqaamanngikkaa

Ilisimannittutut apersorneqartup tullia aamma nuimavoq. Taannaavoq aningaasaqarnermut naalakkersuisoqarfimmi pisortaq Nikolaj Christensen.

Lars-Emil Johansen kommunimi siunnersortitut attaveqarfigisimanerlugu eqqaamanngilaa.

- Assigiinngitsutigut naapittarpara, ilisimaneqarporlu assigiinngitsutigut sunniiniartartoq. Eqqaamanngilarali Kommuneqarfik Sermersuumut sinniisuusutut attaveqarfigisimanerlugu, naalakkersuisoqarfimmi pisortaq ilaatigut oqarpoq.

Lars-Emil Johansen Kommunekredit pillugu saaffiginnissimanera unnerluussisup immikkut maluginiarpaa. Lars Møller-Sørensenip nassuiaanera naapertorlugu Lars-Emil Johansen kommunimut siunnersortitut suliassaanut ilaammat.

Lars Emil Johansen ukiorpassuarni attaveqarfigisimagaluarlugu naalakkersuisoqarfimmi pisortaq nassuiaavoq, Kommunekreditili pillugu oqaloqatigisimanerlugu eqqaamanagu.

Naalakkersuisut politikkikkut aalajangereersut Kommunekreditimut tunngatillugu suliaqartussamik Sermersuup sunniiniartartumik atorfinitsitsinera Nikolaj Christensenip paasisinnaanngilaa.

Lars Møller-Sørensenip aamma Lars-Emil Johansenip eqqartuunneqarnerat pingasunngornermi nangeqqissaaq. Taakku marluk pinerluuteqaqqissagaluarunik ukiumi ataatsimi pineqaatissinneqarsimasunut inissiisarfimmiittussanngortinneqassasut unnerluussisussaatitaasup piumasaraa.