Pisortanngortoq isumagisassarpassualik

Naviair Kalaallit Nunaat Nuummi suliffeqarfiup timmisartut angallannerannut nakkutilliivimmi pisortamik nutaamik atorfinitsitsivoq, tassani Nunatta silaannartaani 6 kilometerinit atsinnerusukkut silaannakkut angallannermi nakkutilliinermut aqutsinermullu ulluinnarni akisussaasuuvoq. 

Naviair Kalaallit Nunaata aamma akisussaaffigaa Kalaallit Nunaanni timmisartumik ajutoortoqassagaluarpat annaassiniarnerup ataqatigiissaarnissaa, Issittumi Sakkutooqarfik, Nunatsinni Politiit upalungaarsimasullu suleqatigalugit.

Ingerlatsinermut pisortanngortoq tassaavoq 43-nik ukiulik Henrik Jensen, taanna 2009-miilli Naviair-imi Kalaallit Nunaanni sulisimavoq. Siullermik Kangerlussuarmi – Naviair-ilu 2014-imi illoqarfiit pingaarnersaannut nuummat Nuummi immikkoortortaqarfimmi sulilerluni.

Henrik Jensen Sjællandip qeqqaneersuuvoq, 2009-mili Kangerlussuarmi suliffittaarnermi kingorna Kalaallit Nunaat nuannarilluinnalerlugu, tassanilu Naviairimi silaannakkut angallannermi nakkutilliinermik aqutsinermillu ilinniagaqarluni.

Isumagisassarpassuaqartoq

- Kalaallit Nunaanni silaannakkut angallanneq immikkuullarissuuvoq. Sila sekundialunnguit ingerlaneranni allanngorsinnaasarpoq – ilaannikkullu ilimasaarisoqanngikkaluartoq. Taava ulapputtoqalersarpoq. Piffissaq sivikitsoq atorlugu suliassanik isumagisassarpassuaqartarpoq. Tamanna unammillernartuuvoq – uangali tamanna nuannaraara, Henrik Jensen oqaluttuarpoq.

Henrik Jensenilli ilinniakkani naammassigamiuk, Kangerlussuarmi Naviairimi sulinerminik ingerlatsiinnarneranut silap pissusia imaluunniit silaannakkut angallanneq pissutaanngillat. Asanninneq tamatumunnga patsisaavoq.

Tassami Henrik Jensen Kangerlussuarmiitilluni asalluinnakkani – Nanna Sisimiuneersoq – taamanikkut Kangerlussuarmi Air Greenlandimi sulisuusoq. Taassuma Nuummi Vejle-Rejser maanna suliffigai.

Aappariit katillugit sisamanik meeraqarput.

Aappariit maanna katereersimalersut Nuummi maannamut ukiuni qulini najugaqareersimalerput. Tamaanga nuunnertik sungiulluinnarsimavaat – aamma Henrik Jensen B-67-imi sulorartartunut aamma crossfit INUA-mi peqataasarpoq. Taakku saniatigut piffissaqarfini tamaasa atorlugit aallaaniarlunilu aalisariartarpoq.

Timmisartunik aqutsinermik isumaginnilluartoq

Naviair Kalaallit Nunaanni ingerlatsinermut pisortatut atorfik qanittukkut inuttassarsiuunneqalerpoq, ingerlatsinermut pisortaq Kristoffer Heiselberg Mittarfeqarfinni - ATS-imi pisortatut atorfittaarmat.

Naviair Kalaallit Nunaat Nuummi umiarsualivimmi allaffeqarfimmi Issittumi Sakkutooqarfik matukkut sanileralugu allaffeqarfeqarpoq.

- Ajornartorsiortoqalersillugu Issittumi Sakkutooqarfiup illutaata ilaaniinnerput iluaqutaasorujussuusarpoq, Henrik Jensen nassuiaavoq.

Naviair Kalaallit Nunaata Nunatta silaannartaani 6 kilometerinit appasinnerusumi silaannakkut angallannermi qangattartut, mittut aamma timmisartut ingerlaartut tamaasa attaveqarfigisarpai. 6 kilometerit qulaallugit qutsitsigisukkut ingerlaartunut Canadami Islandimilu timmisartuussinermut aqutsisoqarfiit timmisartuussinermut akisussaasuupput, aviisimili arlaleriarluta oqaluttuarinikuusatsitut timmisartuussinermut aqutsinerup tamatuma ilaata Kalaallit Nunaannut nuunneqarnissaa pilersaarutaavoq. Tamannali siusinnerpaamik 2032-mi pissaaq, politikikkut inaarutaasumik aalajangiisoqaqqaartussaammat.

Naviairip timmisartunik angallannermut aqutsinermik nakkutilliivia ukioq kaajallallugu ulloq unnuarlu sulisoqartuaannarpoq. Angallannermik aqutsinissamut katillugit 16-inik sulisoqarpoq. Taakku tamarmik Nunatsinneersuupput.

- Atorfiit inuttassarsiuunneqartut tamatigut nunaqavissunik inuttassarsiorniartarpavut, aamma Naviair Kalaallit Nunaat 2014-imi Nuummut nuummalli sulisussarsiorneq ajornannginnerulersimavoq, Henrik Jensen oqarpoq.