Pisortat suliffeqarfiutaanni aqutsisuunikoq kannguttaatsuliorsimasutut pinngitsuutinneqartoq
Angut pisortat suliffeqarfiutaanni aqutsisuunikoq arnamut sulisumut kannguttaatsuliorsimasutut marsimi eqqartuunneqarpoq. Eqqartuussut Nunatta Eqqartuussisuuneqarfianut suliareqqitassanngortinnikuuaa, tassanilu pinngitsuutinneqarluni.
Pisortat suliffeqarfiutaanni aqutsisuusimasoq eqqartuussivimmi ajorsartoq, Nunatta Eqqartuussisuuneqarfiani pinngitsuutinneqarpoq.
Assi: Morten Okkels
Angut 50-it sinnerlugit ukiulik arnamut attuuanninnermini kannguttaatsuliorsimasutut Eqqartuussisoqarfik Sermersuumi marsimi eqqartuunneqarpoq.
Angut pisup nalaani Nuummi pisortat suliffeqarfiutaanni aqutsisuuvoq, arnarlu taanna sulisuisa ilagalugu. Taamaammat pisimasoq Sermitsiami allaaserineqarnera atuarneqarsinnaavoq.
Aalajangiineq suliareqqitassanngortinneqarpoq. Nunatta Eqqartuussisuuneqarfiani angutip oktobarimi eqqartuunneqaqqinnerani allatut aalajangiisoqarpoq. Angut pinngitsuutinneqarpoq.
Attutallakkaa
Angutip isikkaminik arnap nuiluinik attuisimanera pissusissamisuunngitsoq eqqartuussivimmi marsimi pisuutitsinermi tunngavilersuutigineqarpoq. Angut pinerluuteqaqqikkuni ulluni 20-ni pineqaatissinneqarsimasunut inissiisarfimmiittussanngortinneqarlunilu arnamut 7.000 koruuninik taarsiisussanngortinneqarpoq.
Angutip arnaq attutallassimagaa, isikkaminillu attuaalaarsimanngikkaa Nunatta Eqqartuussisuuneqarfiani nalilerneqarpoq.
Pisumi piaaraluni taamaaliortoqarsimanngitsoq Nunatta Eqqartuussisuuneqarfiani nalilerneqarpoq, taamaammallu pinerluttulerinermik inatsit tunngavigalugu kannguttaatsuliortutut pineqaatissiisoqarsinnaanani.
Angut taamaammat pinngitsuutinneqarpoq.
