Pissanganartorsiorneq, ataatsimoorneq bingolu

Ingammik juullimut puussiaq Bror & Søster-imeersoq soqutigilerpara. Pisiniarfik taanna uannut naleqquttunik peqartuaannarpoq. Imaluunniit atallaat tungujortut timersuutaarniarfimmit Ittu.net-imeersut. Ernerma taakku pissagaluarpai. Imaluunniit aningaasat 40.000 koruunit.

Suliniaqatigiiffik Lions Club ukiumoortumik juullimut bingomik aaqqissuussisarpoq, taannalu peqataaffigaara. Eqquinngisaannartuuvunga, immaqali maanna allaanerusumik pisoqalerpoq? Neriuuteqangaarlunga, erneralu atallaanik tungujortunik atortoq takorluulereerlugu, Nuummi Illorsuup Timersortarfiup tungaanut ingerlavunga.

Uiga peqataatinniarlugu akuersitissimavara, umiatsiaarniarfiullu Yamatekip eqqugassaataa ussassaarutigalugu. Ernerput aamma ilagaarput, taanna ussassaarneqanngikkaluarluni nuannaarluni peqataavoq, anaana ataatalu ilagitillugit nuannaartarami.

Nuummi Illorsuarmut Timersortarfimmut ingerlanitsinni bingo eqqarsaatigaara, meeraaninnimi qanoq initutigisimasoq eqqaamagakku. Aanaga bingoriartuaannartuugami, eqquisimariarlunilu aningaasanik kaasarfimmiussannik tunisarpaanga. Bingo, Issittoq nunallu inoqqaavi ataatsimoorfeqartuaannarsimapput. Arlaatigut.

- Anaana takuuk!

Timersortarfimmut iseratta ernera Inuk, juullip orpia tikkuarlugu taama oqarpoq.

Bingop aallartinnissaanut minutsit 15-iinnanngorput timersortarfillu bingorianik nuannaartunik ulikkaareersimavoq. Nerriviit takisuut arfineq-marluk tamarmik immikkut inunnik 40-t missaanniittunik inoqarsinnaapput, iluatsitsillutalu issiavinnik inoqanngitsunik naammattuuivugut. Arnap utoqqasaap saavanut ingippugut. Ilassillugulu. Qungujulavallaanngilaq, isumaluppalulaarlunilu. Ajunngilaq.

- Lions Clubip ukioq manna juullimi bingortitsineranut tamassi tikilluaritsi, angut oqaluttuusoq mikrofonikkut oqarpoq.

Ingerlaqqinniarta.

Juullimut nuannisarneq

Lions Clubimut nersualaarinnillunga, tassami Mælkebøttenimut aningaasanik tunissuteqarsimammata, angerlarsimaffeqanngitsut juullisiornissaannut, nerrivimmi arsaarartartut pissartanngorniunnissaannut tunissuteqarsimammata, bingornissannut bingotinik arlalinnik piseriarlunga aappaluartumillu toortaateqarlunga piareerpunga.

- Normu 43, kisitsinik taaguisoq oqarpoq.

Toorpara.

Inuit katersuussimasorpassuit qiviarakkit qungujulasut takuakka, bingornerminni qungujulallutik nuannisarput. Tassami juullip nalaa nuannisarluni inoqatinik peqateqartoqarsinnaasarami. Nuan, eqqarsarpunga arnarlu utoqqasaaq akitsinniittoq qiviarlugu. Suli qungujutsissinnaanngilara.

– Normu 12.

Toorpara.

Inuit ilaat nerrivinni inissaqannginnamik isiginnaartut issiaviinnut ingissimapput. Kisitsisinik taaguisoq kisitsisinik assigiinngitsunik taaguissaqqaarpoq.

- Bingo! Arnaq qaamasunik nujalik suaarpoq.

Anersaaruluppunga. Kisitsisinik ujaasinitsinni minutsini arlaqanngitsuni anersaartorsimanngitsutut ippunga. Arraa, arnaq utoqqasaaq isaasigut qiviarpara. Erninnut qungujulluni kulipiinamik tunivaa, bingotit atoriikkat tunuinut titartaaqqullugu. Binngornerup nalaani qiimmakkaluttuinnarpoq. Immaqaana bingorluni eqqissisaatigisaraa?

– Ingerlaqqissaagut. Normu tulliuttoq tassaavoq 42.

– Bingo!

Susoqartoruna?

- Sanimoortunik marlunnik eqqueqqammersoq eqquivoq. Torrak! Kisitsisinik taaguisoq oqarpoq.

Inuit nuannaarput ersaartarlutillu. Taama iluatsitsigajutsigaluni qanoq nuanneq.

Tiguartisimasut

Pissanganaq, meqqummik nakkartoqaraluarpat tusaaneqarsinnaassagaluarpoq. Massakkut eqqugassat katillugit 4.000 koruunit missaannik nalillit eqqugassanngorput.

Normu 90. Gamle Ole.

- Sukkavallaarnak! Malinnaasinnaanngilanga, bingortut ilaat suaarpoq. Taassuma bingotit arfinillit ataatsikkut ingerlappai, ilaat saaminiitillugit ilaallu tunuminiitillugit.

- Qaa! Bingotit ikinnerusut atorlugit bingorniarit, alla suaarpoq.

Arnap bingoterpassuallip akiani issiavoq arnaq saviatsinik qaqortunik siutiminut manngussuisimasoq. Inoqatinut akuliukkumanngitsoq aamma nipinut malussarissoq? Imaluunniit tiguartisimaannarnerluni?

Ini tamaviaarfiorpaseqaaq, inuit tiguartilluinnarsimapput.

- Normu 15.

Toorpara.

- Arraa, uiga oqarpoq. Normumik ataasiinnarmik utaqqisaqalerpoq. Taaguisup 86 taappagu eqquissaaq.

- 46.

Toorpara.

- Qaa, 86! Eqquerusuppugut!

Uummatiga tilleruluppoq. 86. 86. 86. Qaa, juullip inua, inuunerma sinnerani naalallunga inuussaanga.

- BINGO! Bingoqataasut ilaat ungasilaartumit suaarpallappoq!

Hajja, uigalu qungujoruutiinnarpugut. Alaa.

Arnap utoqqasaap akitsinniittup maanna qungujuffigaatigut. Normut tusaasavut amerlanerujartortillugit qungujunneruleriartorpoq. Sapinngisannguarput tamaat qungujulaffigiitigalugu tunniutiinnarluta qaatiguulersorpugut.

Nikuinniariartugut takkuttoqarpoq, taakku utaqqisimapput nikuikkattalu issiavigisimasatsinnut ingillutik.

Neriunnerugaluarput maangaannartoq nukissaqarluarluta timersortarfissuarmit anivugut. Nunatsinnut anillappugut, juullisiorfigissallugu nuannisarfigissallugulu nuannernerpaamut.