Pisuinnaq lastbiilip usisaanik nakkarfigineqartoq

Usisat ilaat nakkarnaveerlugu iluamik qilersorneqarsimanngitsoq lastbiilimit nakkarput. Tamanna Ilulissani tallimanngornermi apriilip sisamaani pivoq.

Nakkartup arnaq eqqorpaa ajoquserlugu, taannalu napparsimmavimmukaanneqartariaqarsimavoq. Kalaallit Nunaanni Politiineersup Jørgen Madsenip Sermitsiamut uppernarsarpaa.

Ajutoorneq Kussangajaannguup aqquserngani pivoq, arnallu ajoquserneqartup qanigisaa Sermitsiamut tamanna pillugu saaffiginnippoq.

Arnaq 55-inik ukiulik niumigut pingasunik napisimavoq, ajutoornerullu kingorna timmisartumik ambulancimik Nuummut Dronning Ingridip Napparsimmavissuanukaanneqarsimasoq qanigisaata oqaluttuaraa.

Ajutoortoqarnera eqqarsaatigalugu aqquserngit qanoq innerat ernummatigalugu qanigisaasoq oqarpoq. Pisuinnaat aqqullummata qanigisaasup Ilulissani aqquserngit misissoqqullugit, pingaartumik illoqarfiup qeqqani, oqartussanut kajumissaarutigaa.

Tallimanngornermi pisoq eqqarsaatigalugu usisat angallannermi isumannaallisillugit qilersorneqartarnissaat inatsimmi allassimasoq politiit pisortaata nassuiaatigaa, taamaaliortoqarsimanngippallu aquttoq akiligassinneqarsinnaalluni.

Ilulissanili pisoq politiinit suli suliarineqarpoq, taamaattumik arlaatigut kinguneqarumaarnersoq pigaartut pisortaata maannakkorpiaq oqaatigisinnaanngilaa.