Pituffik Space Basemi sulisut aningaasarsiaasa qaffannissaat isumaqatigiissutigineqartoq
Danskit kalaallillu amerikamiut sakkutooqarfianni sulisut akissarsiaat isumaqatigiissut nutaaq malillugu qaffanneqassapput.
Amerikamiut sakkutooqarfiat Pituffik Space Base, siornatigut Thulebasenimik ilisimaneqartoq, amerikamiut vicepræsidentiata J.D. Vancep upernaaq manna tikeraarmagu annertunerusumik soqutigineqalerpoq.
Asseq toqqorsivimmit: Jim Watson/Ritzau Scanpix
Isumaqatigiissut nutaaq naapertorlugu Danskit aamma kalaallit sulisut amerikami sakkutooqarfimmi Pituffimmi Space Basemi qaammammut aningaasarsiaat amerlanerusut aamma nalingiinnerusumik atugassaqartititsisut.
Tassunga atatillugu isumaqatigiissummik isumaqatiginninniartartoq Danskit Byggefagimi pisortaq Søren Sand Kirk oqarpoq.
- Isumaqatigiissut kalaallit aamma danskit sulisut akornanni nalingiinnerulersitsivoq. Tamanna iliuuseqarfiginiartuarparput tamatigullu malinnaaffiginiartarlugu. Suut pitsaanerulersinneqarsinnaanersut malinnaaffigaarput, oqarpoq.
Kalaallit sulisut ilaasa ATP - Arbejdsmarkedets Tillægspension (Suliffeqarnermi soraarnerussutisiaqarneq) pissarsiarineq ajorpaat,
- Tamanna maanna allanngortipparput. Naligiinngittoqartoq paasitinneqarpugut, maannalu aaqqiviginiarlugu, Søren Sand Kirk oqarpoq.
Aningaasarsiat 11 procentimik qaffariarnerat ukiuni pingasuni aamma isumaqatigiissut nutaaq tunngavigalugu angusaavoq.
- Sulisut sakkutuujunngitsut tassaapput, sakkutuut suliassaannik toqqaannartumik suliaqartuunngitsuupput. Timmisartuunik orsiisarput, logistikimik isumaginnillutik, sanaartornermik igaffimmilu sulisut.
- Sakkutooqarfimmi qaasuitsup killeqarfianit 1100 kilometerinik avannarpasissumi issittumi najugaqarlutik. Suliffimmi atugassarititaasut aaqqinnissaat pisariaqarpoq, Søren Sand Kirk oqarpoq.
Pituffik Space Base siornatigut Thulebasenimik ilisimaneqarpoq. Marsip naanerani amerikamiut vicepræsidentiat J.D. Vance tikeraarmat tusagassiorfinnut annertuumik saqqummiunneqarpoq.
Tikeraarnermi Danmarkip Kalaallit Nunaanni suliniutai sakkortuumik isornartorsiorpai.
Sakkutooqarfik Pituffik Space Base 1952-imi piareerpoq, taamanili USA Kalaallit Nunaanniilerluni.
- Pituffik Space Base Danmarkip Kalaallit Nunaatalu amerikamiut illersornissaqarfianut isumaqatigiissutaannut ilaavoq. Isumaqatigiissummi suliffeqarfiup qallunaanit kalaallinillu pigineqartup, qallunaanik kalaallinillu sulisoqartup, sakkutooqarfik ingerlatissagaa piumasaqaataavoq, Søren Sand Kirk oqarpoq.
Amerikamiut vicepræsidentiata tikeraarnerata kingorna, taamanikkut sakkutooqarfiup pisortap Susannah Meyersip Danmarkimik pitsaasumik suleqateqarneq erseqqissarlugu sakkutooqarfiup sulisui allaffigai.
Susannah Meyers ullut arlaqanngitsut qaangiummata sakkutooqarfiup pisortaatut soraarsinneqarpoq.
"Sakkutooqarfiup aqunneqarneranut piginnaasai tatiginanngimmata" soraarsitaavoq, amerikamiut sakkutooqarfiat nalunaarpoq.
