Piumassuserinngisaminnik meerartaarsinnaanngitsut ikiorneqarnissamik neqeroorfigineqarsinnaalerput
Peqqinnissaqarfiup piumassuserinngisaminik meerartaarsinnaanngitsunut IVF imal. ICSI atorlugit passussinermik neqerooruteqarnissaq periarfissareqqilerpaa. Naalakkersuisut 2024-mut 3 mio. koruuninik aningaasaliipput
Meerartaarsinnaanngitsut IVF aamma ICSI atorlugit ikiorneqarsinnaanerat Nunatsinni peqqinnissaqarfiup neqeroorutigisinnaanngoqqippaa. Naalakkersuisut 2024-mi 3 mio. koruunit siullermeertumik aningaasaliissutigaat.
Leiff Josefsen
Meerartaarsinnaanngitsunut
Nunatsinni IVF-imik ICSI-millu ikiorneqarnissamik
neqeroorfigineqarsinnaalerput. Naalakkersuisut 2024-mut siullermik 3
mio. koruuninik aningaasaliisut Naalakkersuisoq tusagassiuutinut
nalunaarutigaat.Ikiorneqarnissamut
pisariaqartitsineq annertunerussappat 2024-mut 5,7 mio. koruuninik
atugassanngortitsisoqaqqissinnaasoq paasissutissiissutigineqarpoq.
-
Meerartaarsinnaanngitsut
ajoraluartumik amerliartorput, aappariippassuillu
meerartaarusukkaluarlutit eqqugaaqqapput. Taamaattumik
Peqqinnissaqarfiup piumassuserinngisaminik meerartaarsinnaanngitsunut
reagensglas atorlugu passunneqarsinnaalersitsinera
nuannaajallannarpoq, Peqqissutsimut Naalakkersuisoq Agathe Fontain
(IA) oqarpoq.Aappariinnut
piumassuserinngisamik meerartaarsinnaanngitsunut ikiorsiinissaq
Peqqinnissaqarfiup 2019-imili killilimmik ingerlappaa. Aappariit
meerartaarsinnaanngitsut IVF-imik ICSI-milluunniit
ikiorneqarnissaminnut angalanertik, ineqarnertik passutsinnertillu
namminneq akilertarpaat.
Aningaasanut
inatsimmit peerneqaraluartoq
Peqqissutsimut
isumaqatigiissutip suliarineqarnerani piumassuserinngisaminnik
meerartaarsinnaanngitsunut tapiissutit aningaasaliiffigineqarput.
Tamanna peqqissutsimut naalakkersuisup Agathe Fontainip Demokraatit
paragraf 37 naapertorlugu apeqqutaannut akissummini
ilisimatitsissutigaa.
Passutsissinnaanerup
periarfissanngornera Aningaasaqarnermut Akileraartarnermullu
Ataatsimiititaliap piumassuserinngisamik meerartaarsinnaanngitsut
reagensglas atorlugu passunneqarnissaannut aningaasartuutit
matussuserneqartalernissaanik akuersineratigut iluatsippoq. Aappariit
reagensglas atorlugit passutsikkusuttut amerlassusaat
nalorninartortaqarput, tassami peqqinnissaqarfik passunneqarnermut,
nakorsaatinut, angalanermut najugaqarnermullu tamakkiisumik
akiliilluni siusinnerusukkut neqerooruteqarsimanngimmat.
- Peqqinnissaqarfiup
passunneqarnissamut neqeroorut massakkut aallartissavaa ukiullu affaa
qaangiuppat nalilersuisoqareerpat suliaritittarneq pillugu
sukumiinerusumik pisariaqartitsineq nalilerneqarsinnaalissaaq.
Tassami 2025-mut Aningaasanut Inatsit aqqutigalugu
aalajangersimasunik aningaasaliisoqartalerneratigut reagensglas
atorlugu passunneqarnissamut neqeroorutip ataavartumik
periarfissaalernissaa kissaatiginartikkaluaqigakku, Agathe
Fontain oqarpoq.
